Tag: رائفل

کینٹکی: امریکا میں رائفل چلانے والے ایک شخص کی رائفل ٹریگر دباتے ہی اس کے چہرے پر خوف ناک طریقے سے پھٹ گئی، اسکاٹ نامی شخص موت کے منہ میں جاتے جاتے بچ گیا۔

تفصیلات کے مطابق امریکی ریاست کینٹکی میں ایک شخص اپنی رائفل سے فائرنگ کی مشق کر رہے تھے، اس دوران ان کے والد ویڈیو بھی بنا رہے تھے، کہ اچانک ایسا حادثہ پیش آیا جس کے بارے میں انھوں نے تصور تک نہ کیا تھا۔

ففٹی کیلیبر رائفل شوٹنگ میز پر دھری تھی، اسکاٹ نامی شخص نے جیسے ہی ٹریگر دبایا، وہ ایک دھماکے سے ٹکڑے ٹکڑے ہو گئی، اور اس کے نوکیلے ٹکڑے کئی جگہ اسکاٹ کو لگے، ایک انچ لمبا ٹکڑا ان کے گلے میں جا گھسا اور شہ رگ کو زخمی کر گیا، ایک ٹکڑے نے گھس کر ان کے دائیں پھیپھڑے میں سوراخ کر دیا۔

اسکاٹ نے اس واقعے کی ویڈیو خود شیئر کی، انھوں نے بتایا کہ اس حادثے نے تقریباً ان کی جان لے ہی لی تھی، وہ ایک پرانے فائر ہائیڈرنٹ پر مشق کر رہے تھے، سب کچھ ٹھیک جا رہا تھا، اس رائفل کو وہ ایک طویل عرصے سے استعمال کرتے آ رہے تھے، کہ اچانک یہ خود ناک حادثہ ہو گیا۔

انھوں نے بتایا کہ یہ راؤنڈز انتہائی نایاب ہیں اور یہ بہت ہی پرانے ہیں، یہ اب کہیں تیار بھی نہیں کیے جاتے۔ ویڈیو کلپ میں وہ خوف ناک لمحہ دیکھا جا سکتا ہے جب بندوق اچانک دھماکے سے پھٹ گئی اور کرسی پر بیٹھے اسکاٹ کو زبردست دھکا لگا، بندوق کے ٹکڑے مختلف اطراف میں اڑے۔

دھماکا اسکاٹ کے عین چہرے پر ہوا تھا، جس سے چہرے کی آربیٹل ہڈی میں تین جگہ فریکچر آ گیا، ناک کی ہڈی بھی ٹوٹی۔

انھوں نے بتایا کہ جیسے ہی میں نے ٹریگر دبایا، رائفل فوراً ہی پھٹ گئی، تو جو چیز سب سے پہلے گئی وہ یہ ٹوپی تھی جو مضبوط اسٹیل سے بنی ہے اور بہت بھاری ہے۔

انھوں نے مزید کہا مجھے گلے پر لگی تھی، لیکن میں پھر نہیں جان سکا کہ کیا ہوا، کیوں کہ دھماکے کے ساتھ ہی میں اندھا ہو گیا تھا، میرے والد وہاں موجود تھے اور ویڈیو بنا رہے تھے اس لیے میں بچ گیا۔