Tag: راجہ بشارت

راولپنڈی : پاکستان تحریک انصاف کے رہنما محمد راجہ بشارت کو گرفتار کرکے تھانہ نیو ٹاون منتقل کردیا گیا۔

تفصیلات کے مطابق پولیس نے رہنما پاکستان تحریک انصاف محمد راجہ بشارت کو گرفتار کرلیا، پولیس نے بتایا کہ وہ راولپنڈی الیکشن ٹریبیونل میں این اے 55 کے کیس کی تاریخ پر آئے تھے۔

پی ٹی آئی رہنما کا کہنا تھا کہ تمام مقدمات میں ان کی ضمانت کی تصدیق ہو چکی ہے اور اس طرح کے بزدلانہ ہتھکنڈوں سے گھبرانے والے نہیں۔

پنجاب کے سابق سینئر صوبائی وزیر  کی گرفتاری کے لیے پولیس کی بھاری نفری نے الیکشن ٹریبیونل کے افس کو گھیر لیاتھا اور مرکزی گیٹ بند کر دیئے تھے۔

پولیس کا کہنا تھا کہ ہمارے پاس ان کی وارنٹ گرفتاری ہے نو مئی اور دیگر مقدمات میں مطلوب ہیں۔

جس کے بعد راولپنڈی پولیس نے پی ٹی آئی رہنما  کو حراست میں لینے کے بعد چھوڑ دیا، وکیل نے بتایا ضمانتی دستاویز کی تصدیق کے بعد پولیس نے ان کو رہا کیا۔

گذشتہ روز راولپنڈی میں انسداد دہشت گردی کی عدالت (اے ٹی سی) نے نومبر کے احتجاج سے متعلق کیسز میں پاکستان تحریک انصاف (پی ٹی آئی) کے کئی رہنماؤں کے وارنٹ گرفتاری جاری کیے تھے۔

جن کے وارنٹ گرفتاری جاری کیے گئے ان میں وزیر اعلیٰ خیبر پختونخوا علی امین گنڈا پور، پاکستان کے سابق صدر عارف علوی اور پی ٹی آئی کی کئی دیگر سینئر شخصیات شامل ہیں۔

اسلام آباد : پاکستان تحریک انصاف (پی ٹی آئی) رہنما نے جوڈیشل کمپلیکس حملہ اور توڑ پھوڑ کے مقدمات عدالت میں سرنڈر کردیا۔

تفصیلات کے مطابق جوڈیشل کمپلیکس حملہ اور توڑ پھوڑ کے دو مقدمات میں وارنٹ گرفتاری جاری ہونے کے معاملے پر پی ٹی آئی رہنما نے دونوں مقدمات میں عدالت میں سرنڈر کردیا۔

راجہ بشارت کیجانب نے وارنٹ گرفتاری کی منسوخی کیلئے انسداد دہشت گردی عدالت درخواست دائر کردی۔

عدالت نے پی ٹی آئی رہنما کی وارنٹ منسوخی کی درخواست منظور کرلی اور کیس کی سماعت 7 اپریل تک ملتوی کردی۔

تحریک انصاف کے رہنما جوڈیشل کمپلیکس حملہ اور توڑ پھوڑ کے 2 کیسز میں نامزد ہیں۔

عدالت نے جوڈیشل کمپلیکس حملہ ،ٹوڑ پھوڑ کے مقدمات کے جیل ٹرائل کیلئے متعلقہ وزارت کو خط لکھ رکھا ہے بانی پی ٹی آئی سمیت دیگر پارٹی رہنماوں کیخلاف جوڈیشل کمپلیکس حملہ توڑ پھوڑ پرتھانہ رمنا میں مقدمات درج ہے۔

مزید پڑھیں : پی ٹی آئی رہنما مراد سعید، حماد اظہر اور فرخ حبیب اشتہاری قرار

یاد رہے جوڈیشل کمپلیکس حملہ کیس میں انسدادِ دہشت گردی عدالت نے پی ٹی آئی رہنما مراد سعید، حماد اظہر اور فرخ حبیب کو اشتہاری قرار دے دیا تھا جبکہ عدالت نے واثق قیوم عباسی، راجہ بشارت سمیت دیگر غیر حاضر ملزمان کے وارنٹ گرفتاری بھی جاری کر دیے تھے۔

واضح رہے بانی پی ٹی آئی کی توشہ خانہ کیس میں جوڈیشل کمپلیکس میں پیشی کے موقع پر شدید ہنگامہ آرائی ہوئی تھی، جس میں پولیس اور کارکنان کے درمیان جھڑپیں اور جلاؤ گھیراؤ سے صورتحال کشیدہ ہوگئی تھی۔

پولیس ترجمان کے مطابق مشتعل مظاہرین نے25سے زائد موٹرسائیکلیں اور گاڑیوں کو جلایا، اس کے علاوہ پولیس چوکی اور درختوں کو بھی آگ لگائی تھی جبکہ نذر آتش کی جانے والی گاڑیوں میں اسلام آباد پولیس کی دو اور بم ڈسپوزل اسکواڈ کی گاڑی بھی شامل تھی۔

راولپنڈی : انسداددہشت گردی کی خصوصی عدالت نے جی ایچ کیو حملہ کیس میں اپوزیشن لیڈر عمر ایوب اور راجہ بشارت کو رہا کرنے کا حکم دے دیا۔

تفصیلات کے مطابق راولپنڈی میں انسداد دہشت گردی کی خصوصی عدالت میں جی ایچ کیو حملہ کیس کی سماعت ہوئی۔

5پی ٹی آئی رہنماؤں کو اے ٹی سی میں پیش کیا گیا، عدالت نے عمر ایوب ، راجہ بشارت سمیت دیگر رہنماوں کو رہا کردیا۔

عدالت نے اظہار برہمی کرتے ہوئے کہا کہ پشاور ہائیکورٹ سے ضمانت منظور ہونے کے باوجود کیوں گرفتار کیا۔

مزید پڑھیں : پی ٹی آئی کے اہم رہنماؤں کی گرفتاری ڈال دی گئی

یاد رہے گزشتہ روز بانی پی ٹی آئی سمیت سو ملزمان پر فرد جرم عائد کی گئی تھی، جس کے بعد راولپنڈی پولیس نے ایوب، بشارت اور احمد چٹھہ کو اڈیالہ جیل کے باہر سے گرفتار کرلیا تھا۔

پولیس نے پی ٹی آئی رہنماوں کوگرفتاری کےبعداڈیالہ چوکی میں رکھا بعد ازاں رہنماؤں کو رات کو پولیس لائن میں منتقل کردیا گیا تھا۔

خیال رہے پی ٹی آئی کے بانی عمران خان کو 9 مئی 2023 کو اسلام آباد ہائی کورٹ کے احاطے سے گرفتار کیا گیا تھا جہاں وہ کرپشن کیس کی سماعت میں شریک تھے، ان پر بیرون ممالک سے غیر قانونی تحائف اور اثاثے وصول کرنے کا الزام تھا۔

عمران خان کی گرفتاری کے بعد ملک بھر میں بڑے پیمانے پر احتجاج اور ہنگامے پھوٹ پڑے، جب کہ ان کے حامی اور پارٹی کارکنان ان کی رہائی کا مطالبہ کرنے سڑکوں پر نکل آئے۔

پی ٹی آئی کے مظاہرین نے راولپنڈی میں فوج کے جنرل ہیڈ کوارٹرز (جی ایچ کیو)، لاہور میں جناح ہاؤس، میانوالی ایئربیس سمیت کئی سول اور فوجی تنصیبات پر حملہ کیا اور توڑ پھوڑ کی۔

مظاہرین نے گاڑیوں کو نذر آتش کیا، سڑکیں بلاک کیں اور پولیس اور سیکورٹی فورسز کے ساتھ جھڑپیں بھی ہوئیں۔

راولپنڈی: پولیس کا کہنا ہے کہ پی ٹی آئی رہنما عمرایوب، راجہ بشارت سمیت کسی رہنما کی کسی مقدمے میں بھی گرفتاری نہیں ڈالی گئی۔

اے آر وائی نیوز کے مطابق پی ٹی آئی رہنماؤں کی اڈیالہ جیل کے باہر سے گرفتاری کے معاملے پر پولیس ذرائع کا کہنا ہے کہ پی ٹی آئی رہنماؤں پر درج مقدمات کی چھان بین کی جارہی ہے، عمرایوب، راجہ بشارت سمیت کسی رہنما کی کسی مقدمے میں بھی گرفتاری نہیں ڈالی گئی۔

پولیس ذرائع کا کہنا ہے کہ پی ٹی آئی رہنماؤں کو اڈیالہ پولیس چوکی میں رکھا گیا ہے۔

بعدازاں وکیل غلام مرتضیٰ نے انسداد دہشت گردی عدالت میں درخواست دائر کی جس پر جج نے زیر حراست پی ٹی آئی رہنماؤں کو عدالت میں پیش کرنے کا حکم دے دیا۔

عدالت نے کہا کہ زیر حراست رہنماؤں کو ساڑھے 7 بجے تک اے ٹی سی میں پیش کیا جائے۔

واضح رہے کہ چند گھنٹوں قبل اڈیالہ جیل کے باہر سے پاکستان تحریک انصاف کے رہنماؤں  عمر ایوب، احمد چٹھہ، راجہ بشارت اور عظیم الدین کو گرفتار کیا گیا۔

پی ٹی آئی رہنماؤں کو اڈیالا جیل کے احاطے سے گرفتار کرکے جیل چوکی منتقل کردیا گیا۔

عمر ایوب کے وکیل رانا مدثر نے میڈیا سے گفتگو کرتے ہوئے کہا تھا کہ عمرایوب، راجہ بشارت کو اڈیالہ جیل چوکی والوں نے حراست میں لیا۔

ان کا کہنا تھا کہ ابھی نہیں معلوم ان کو کس کیس میں گرفتار کیا ہے۔

سابق صوبائی وزیر قانون پنجاب راجہ بشارت نے کہا ہے کہ آخر کار حکومت کو انتخابات کی طرف آنا ہی پڑے گا۔

سابق صوبائی وزیر قانون پنجاب راجہ بشارت نے میڈیا سے گفتگو کرتے ہوئے کہا کہ عمران خان نے سنجیدگی کا مظاہرہ کرتے ہوئے مذاکرات کو تسلیم کیا، حکومت کی جانب سے تاخیری حربے استعمال کیے جا رہے ہیں۔

سابق وزیر  قانون کو کہنا تھا کہ آخر کاران کو انتخابات کی طرف آنا ہی پڑے گا، ملکی مفاد میں یہی بہتر ہے اور اسی سے استحکام آسکتا ہے، مذاکرات سے کوئی حل نکلتا ہے تو صورتحال تبدیل ہوسکتی ہے۔

راجہ بشارت کا مزید کہنا تھا کہ سپریم کورٹ نے اپنا حکم جاری کر رکھا ہے، فیصلے کے خلاف حکومت یا اسپیکر نے مقررہ وقت میں اپیل بھی نہیں کی۔