لاہور: وزیر خواندگی و غیررسمی بنیادی تعلیم راجہ راشد حفیظ کا کہنا ہے کہ وزیراعظم نے اسلام کے حوالے سے دنیا بھر میں پائی جانے والی منفی سوچ کے بت کو گرا دیا۔
تفصیلات کے مطابق صوبائی وزیر راجہ راشد حفیظ نے کہا کہ وزیراعظم عمران خان نے تبلیغ اسلام کے حوالے سے برصغیر پاک و ہند کے صوفیائے کرام کی تاریخ کو دہراتے ہوئے دین اسلام کے حوالے سے دنیا بھر میں پائی جانے والی منفی سوچ کے بت کو گرا دیا ہے۔
راجہ راشد حفیظ نے کہا کہ وزیراعظم نے پوری دنیا کی توجہ کے مرکز اقوام متحدہ میں اسلام اور کشمیر کی وہ خدمت کی ہے جس کے نتائج بہت جلد سامنے آئیں گے
انہوں نے کہا کہ نہ صرف پاکستان کے عوام بلکہ پوری امت مسلمہ اپنے لیڈر عمران خان کو سلام پیش کرتی ہے اور ان کا شکریہ ادا کرتی ہے۔
اللہ کی خوشنودی حاصل کرنے کے لیے کشمیریوں کے ساتھ کھڑے رہیں گے، عمران خان
خیال رہے کہ گزشتہ روز وزیراعظم عمران خان نے اسلام آباد ایئرپورٹ پر اپنے خطاب میں کہا تھا کہ دنیا کشمیریوں کے ساتھ کھڑی ہو نا ہو لیکن پاکستان کشمیریوں کے ساتھ کھڑا ہے، میں وعدہ کرتا ہوں کہ مودی فاشسٹ اور مسلمانوں سے نفرت کرنے والی حکومت کو بے نقاب کروں گا۔
یاد رہے کہ وزیراعظم عمران خان نے اقوام متحدہ کی جنرل اسمبلی کے اجلاس میں دنیا کے سامنے بھارت کا مکروہ چہرہ بے نقاب کیا اور مقبوضہ کشمیر سے کرفیو فوری ہٹانے کا مطالبہ کیا تھا۔
وزیراعظم نے دنیا کو خبردار بھی کیا تھا کہ اگر دو جوہری ممالک کے درمیان جنگ ہوئی تو پھر اس کے اثرات دنیا بھر تک پھیلیں گے۔
