ARYNews.tv | Urdu – Har Lamha Bakhabar

Tag: راجہ پرویزاشرف

  • نندی پور کیس: راجہ پرویزاشرف اوربابراعوان سمیت 7 ملزمان پر فرد جرم عائد

    نندی پور کیس: راجہ پرویزاشرف اوربابراعوان سمیت 7 ملزمان پر فرد جرم عائد

    اسلام آباد: احتساب عدالت نے نندی پور پاور پراجیکٹ ریفرنس میں سابق وزیراعظم راجہ پرویز اشرف اور بابراعوان سمیت 7 ملزمان پر فرد جرم عائد کردی۔

    تفصیلات کے مطابق احتساب عدالت میں بابر اعوان کے خلاف نندی پور پاور پراجیکٹ میں تاخیر سے متعلق ریفرنس پر سماعت احتساب عدالت کے جج محمد ارشد ملک نے کی۔

    معزز جج ارشد ملک نے نندی پور پاور پراجیکٹ ریفرنس میں فرد جرم پڑھ کر سنائی، سابق وزیراعظم راجہ پرویز اشرف، بابراعوان سمیت تمام ملزمان نے صحت جرم سے انکار کیا۔

    احتساب عدالت نے نندی پور پاور پراجیکٹ ریفرنس میں ملزمان کا ٹرائل کرنے اور ان کے خلاف گواہوں کو بھی طلب کرنے کا فیصلہ کرلیا۔

    نندی پور پاور پراجیکٹ میں بابراعوان، سابق وزیراعظم پرویز اشرف، سابق سیکٹری قانون مسود چشتی ، ریاض کیانی، ڈاکٹر ریاض محمود، سابق ریسرچ کنسلٹنٹ وزارت قانون شمائلہ محمود ملزمان میں شامل ہیں۔

    سپریم کورٹ کے حکم پر منصوبے میں تاخیر پرجوڈیشل کمیشن تشکیل دیا گیا تھا، جوڈیشل کمیشن نے تحقیقات کے لیے معاملہ نیب کوبھیجا تھا۔

    پیپلزپارٹی کے دورمیں وزرا کی ملی بھگت سے منصوبے میں 2 سال کی تاخیر ہونے سے قومی خزانے کو 27 ارب کا نقصان پہنچا تھا۔

    یاد رہے گزشتہ ماہ 11 فروری کو عدالت نے فریقین کے دلائل مکمل ہونے پر بابر اعوان کی بریت پر فیصلہ محفوظ کیا گیا تھا۔

    نندی پور ریفرنس : بابراعوان پر پیر کو فرد جرم عائد کی جائے گی

    واضح رہے نیب نے پاکستان تحریک انصاف کے رہنما اور وزیراعظم کے مشیر برائے پارلیمانی امور بابر اعوان کے خلاف نندی پور پاور پراجیکٹ میں کرپشن کا ریفرنس دائر کیا تھا اور بابر اعوان، راجہ پرویز اشرف سمیت 7 ملزمان کو نامزد کیا گیا تھا۔

    بعدازاں وزیر اعظم کے پارلیمانی مشیر بابر اعوان ایڈووکیٹ قومی احتساب بیورو کے ریفرنس میں عائد الزامات پر اپنے عہدے سے مستعفی ہوگئے تھے اور ان کا استعفیٰ وزیر اعظم عمران خان نے منظور کیا تھا۔

    نندی پور منصوبے کی تاخیر سے قومی خزانے کو 27 ارب روپے کا نقصان پہنچایا گیا تھا۔

  • ساہیوال واقعے پر پورے ملک کے عوام میں غم و غصہ پایا جاتا ہے، راجہ پرویزاشرف

    ساہیوال واقعے پر پورے ملک کے عوام میں غم و غصہ پایا جاتا ہے، راجہ پرویزاشرف

    اسلام آباد : پیپلز پارٹی کے رکن قومی اسمبلی راجہ پرویزاشرف نے کہا ہے کہ ساہیوال واقعے پر پورے ملک کے عوام   میں شدید غم و غصہ ہے، جس معاملے کو سرد خانے میں ڈالنا ہو تو اس کی جے آئی ٹی بنادی جاتی ہے۔

    ان خیالات کا اظہار انہوں نے قومی اسمبلی کے اجلاس کے موقع پر خطاب کرتے ہوئے کیا، انہوں نے کہا کہ جس ادارے نے لوگوں کو دہشت گردی سے بچانا ہے اسی نے بےگناہوں کو قتل کیا، معصوم بچوں کے سامنے ان کے والدین کو مار دیا گیا۔

    راجہ پرویز اشرف نے کہا کہ حکومت کے وزرا کا واقعے کے بعد بیان حد درجہ قابل اعتراض ہے، ساہیوال واقعے پر ادارے کی طرف سے بہانے بازی کی کوشش کی گئی، اس واقعے کے بعد ہر آدمی اپنے آپ کو ریاست میں غیرمحفوظ سمجھ رہا ہے۔

     سانحے پر پوری دنیا کے لوگوں میں غم و غصہ ہے، واقعہ موجودہ حکومت کی نااہلی کا منہ بولتا ثبوت ہے، انہوں نے کہا کہ کیا جن کے ماں باپ کو بے دردی سے قتل کردیا جائے کیا ان بچوں کو پھول دیئےجاتے ہیں۔

    ان کا مزید کہنا تھا کہ یہ کس ریاست کا نقشہ ہے جو ہمارے سامنے رکھا جارہا ہے، یہ کیسی ریاست ہے جہاں محافظ معصوم لوگوں کو قتل کررہے ہیں، یاد رکھیں کہ جب ظلم حد سےبڑھتا ہے تو مٹ جاتا ہے۔

    واقعے کی تحقیقات سے متعلق ان کا کہنا تھا کہ جے آئی ٹی مذاق بن کر رہ گئی ہے، جس معاملے کو سرد خانے میں میں ڈالنا ہوتاہے تو جےآئی ٹی بنادی جاتی ہے، وزیراعظم کو اخلاقی طورپر اس واقعے پر استعفیٰ دے دینا چاہیے۔

  • نندی پور پاور پروجیکٹ ریفرنس، راجہ پرویزاشرف اور بابراعوان کو ضمانتی مچلکے جمع کرانے کا حکم

    نندی پور پاور پروجیکٹ ریفرنس، راجہ پرویزاشرف اور بابراعوان کو ضمانتی مچلکے جمع کرانے کا حکم

    اسلام آباد : نندی پور پاور پروجیکٹ میں مبینہ تاخیر پر ریفرنس کی سماعت میں احتساب عدالت نے راجہ پرویزاشرف اور بابراعوان کو ضمانتی مچلکے جمع کرانے کا حکم دیتے ہوئے سماعت دو اکتوبرتک ملتوی کردی۔

    تفصیلات کے مطابق اسلام آباد کی احتساب عدالت میں جج ارشد ملک نے نندی پورپروجیکٹ میں مبینہ تاخیرپرریفرنس کی پہلی سماعت کی، سابق وزیراعظم راجہ پرویزاشرف اور بابراعوان عدالت میں پیش ہوئے۔

    عدالت نے دونوں ملزمان کو ضمانتی مچلکے جمع کرانے کا حکم دیا جبکہ سابق وزیراعظم راجہ پرویزاشرف کو حاضری یقینی بنانے کیلئے 2لاکھ کے ضمانتی مچلکے جمع کرانے کا حکم دیا۔

    بعد ازاں کیس کی سماعت بغیر کارروائی کے دو اکتوبرتک ملتوی کردی گئی۔

    یاد رہے احتساب عدالت نے پی ٹی آئی رہنما بابراعوان اور راجہ پرویز اشرف کو آج طلب کررکھا تھا۔

    ریفرنس میں 2 سابق وفاقی وزرا بابر اعوان کے خلاف گواہ بن گئے،دستاویز کے مطابق نوید قمراور خواجہ آصف نندی پور ریفرنس کے گواہ بنے اور وزارت پانی و بجلی اور وزارت قانون کے افسران بھی 35 گواہوں میں شامل ہیں جبکہ نیب کے 3 تفتیشی افسران نندی پور ریفرنس میں گواہ ہیں۔

    ریفرنس میں بابر اعوان، راجہ پرویز اشرف سمیت 7 ملزمان کو نامزد کیا گیا ہے۔

    خیال رہے وزیر اعظم کے پارلیمانی مشیر بابر اعوان ایڈووکیٹ قومی احتساب بیورو کے ریفرنس میں عائد الزامات پر اپنے عہدے سے مستعفی ہوگئے تھے اور ان کا استعفیٰ وزیر اعظم عمران خان نےمنظور کرلیا تھا۔

    واضح رہے کہ سپریم کورٹ میں بھی نندی پورپاور پلانٹ میں بد انتظامی کیس کی سماعت کے دوران چیف جسٹس میاں ثاقب نثار نے نیب سے تمام زیرالتوا ریفرنسز کی تفصیلات طلب کررکھی ہے۔

    نندی پور منصوبے کی تاخیر سے قومی خزانے کو 27 ارب روپے کا نقصان پہنچایا گیا تھا۔

  • ہم نے کبھی عدالتوں پرحملہ نہیں کیا، راجہ پرویزاشرف

    ہم نے کبھی عدالتوں پرحملہ نہیں کیا، راجہ پرویزاشرف

    لاہور : سابق وزیراعظم راجہ پرویز اشرف نے کہا ہے کہ حسن اور حسین نواز آسمان سے نہیں اترے، ذوالفقارعلی بھٹو اور بے نظیر سمیت کئی لیڈر عدالتوں میں پیش ہو چکے ہیں۔ ہم نے کبھی عدالتوں پر حملہ نہیں کیا۔

    ان خیالات کا اظہار انہوں نے احتساب عدالت میں گیپکو میں غیر قانونی بھرتیوں کے حوالے سے ریفرنس کی سماعت کے بعد سابق وزیرِ اعظم راجہ پرویز اشرف نے میڈیا سے گفتگو کرتے ہوئے کیا۔

    انہوں نے کہا کہ پیپلزپارٹی عدلیہ کا احترام کرنے والی جماعت ہے اور کبھی عدالتوں پر حملہ نہیں کیا، ہم اپنی بے گناہی عدالت میں ہی ثابت کرتے ہیں۔

    راجہ پرویز اشرف نے کہا کہ شریف برادران کے خلاف بھی نیب میں کیسز ہیں، ان کے متعلق نیب کیا کارروائی کر رہی ہے، کیا ن لیگ اور پیپلز پارٹی کے لیے قانون الگ الگ ہے؟

    پانامہ کیس کی جے آئی ٹی کے حوالے سے انہوں نے کہا کہ وزیراعظم کے بیٹے کی پیشی پرواویلا مچایا جارہا ہے، شہید بینظیر اورذوالفقار علی بھٹو عدالت میں آسکتے ہیں تو وزیر اعظم کے صاحبزادے حسن اور حسین نواز آسمان سے نہیں اترے اگر وہ عدالتوں میں پیش ہورہے ہیں تو کون سی انوکھی بات ہے؟

    راجہ پرویز اشرف نے خارجہ پالیسی پر کڑی تنقید کرتے ہوئے کہا کہ حکومت نے ناکام ترین خارجہ پالیسی اختیار کی ہے اب مغربی ممالک ہمارے وزیراعظم کو تقریر تک نہیں کرنے دیتے۔

  • غیرقانونی بھرتیاں،سابق وزیراعظم راجا پرویزاشرف کے وارنٹ گرفتاری جاری

    غیرقانونی بھرتیاں،سابق وزیراعظم راجا پرویزاشرف کے وارنٹ گرفتاری جاری

    کراچی: احتساب عدالت نے سابق وزیراعظم راجا پرویز اشرف کی حاضری سے استثنیٰ کی درخواست مسترد کرتے ہوئے وارنٹ گرفتاری جاری کردیئے۔   

    تفصیلات کے مطابق سابق لاہور کی احتساب عدالت میں سابق وزیر اعظم راجاپرویز اشرف کیخلاف گیپکوبھرتیاں کیس کی سماعت شروع ہوئی توسابق وزیراعظم کے وکیل نےموقف اختیار کیا کہ راجہ پرویز اشرف ملک سے باہر ہیں، پیش نہیں ہو سکتے۔

    جس کے بعد عدالت نے ایک بار پھر سابق وزیراعظم راجا پرویزاشرف کے وارنٹ گرفتاری جاری کرتے ہوئے اٹھارہ اپریل کو راجا پرویز سمیت تمام ملزمان کو پیش کرنے کاحکم دیدیا۔

    دوسری جانب راجا پرویز اشرف کیجانب سے حاضری سے استثنٰی کی درخواست دائر کی گئی تھی ، جس میں استدعا کی گئی کہ سابق وزیراعظم کو عدالت میں حاضری سے استثنی دیا جائے تاہم احتساب عدالت نے سابق وزیراعظم کی حاضری سے استثنی کی درخواست مستردکردی۔

    عدالت نے راجہ پرویز اشرف کی حاضری کے موقع پر پہلے ہی فول پروف سیکیورٹی فراہم کرنے کی ہدایت کر رکھی ہے، نیب ریفرنس میں سابق وزیراعظم راجہ پرویز اشرف کو گیپکو میں 437 غیر قانونی بھرتیوں کے کیس میں ملزم نامزد کیا گیا ہے۔ عدالت نے کیس کی مزید سماعت انیس اپریل تک ملتوی کر دی۔

    راجہ پرویز اشرف کے وکیل افتخار شاہد نے کہا ہے کہ احتساب عدالت کے فیصلے کو ہائیکورٹ میں چیلنج کیا جائے گا۔

    خیال رہے کہ سابق وزیر اعظم راجا پرویز اشرف پر گیپکو میں چار سو سے زائد مبینہ طور پرغیرقانونی بھرتیوں کا الزام ہے۔

    مزید پڑھیں : ہمارے ہاتھ صاف ہیں‘امید ہےعدالت سے انصاف ملے گا‘ راجہ پرویز اشرف

    یاد رہے  گزشتہ ماہ کے آغاز میں گلف رینٹل پاور کیس کی سماعت کے بعد راجہ پرویز اشرف نے میڈیا سے گفتگو کرتے ہوئے کہا تھا کہ مجھ پر مالی کرپشن کا کوئی الزام نہیں ہے، تاہم اختیارات کے ناجائز استعمال کے کیس بنائے گئے ہیں، ہم اپنی پاک دامنی کوعدالت میں ثابت کریں گے۔

    راجہ پرویز اشرف کا کہنا تھا کہ ہمیں یقین ہے کہ ہم عدالت میں سرخروہوں گے، کیونکہ ہمارے ہاتھ صاف ہیں، امید ہےعدالت سےانصاف ملے گا۔

     

  • نواز شریف نے جرم کیا ہے تو استعفیٰ دیں، راجہ پرویزاشرف

    نواز شریف نے جرم کیا ہے تو استعفیٰ دیں، راجہ پرویزاشرف

    لاہور: پیپلزپارٹی پنجاب کی تینظیموں کی تحلیل کے بعد پانچ رکنی تنظیمی کمیٹی نے اپنا کام شروع کردیا ہے ، راجا پرویز اشرف کہتے ہیں کہ پیپلزپارٹی نے ہر دور میں اداروں اور عدالتوں کا سامنا کیا اب وزیر اعظم بھی اخلاقی طور پر مستعفی ہو جائیں۔

    سابق وزیراعظم راجا پرویزاشرف کی زیر صدارت لاہور میں تنظیمی کمیٹی کے پہلے اجلاس میں ارکان نے کسی بھی گروپنگ اور لابی سے لا تعلقی کا حلف اٹھایا اور ازم کا اظہار کیا کہ تین ماہ کے اندر ہر سطح پر عہدیداروں کی تعیناتی کی سفارشات کےلیے ہر ضلع میں نچلی سطح تک کارکنوں سے مشاورت کی جائے گی ۔

    اس موقع پر میڈیا سے گفتگو کرتےہوئے راجا پرویز اشرف کا کہنا تھا کہ تین ماہ کے اندر ضلعی سطح تک اہل عہدیداروں کی نشاندہی کا ٹاسک مکمل کرینگے ، جمہوریت کے لیے قربانیاں دینے والے اور کسی بھی وجہ سے ناراض ہونے والوں کے پاس جا کر اُن کے تحفظات دور کرینگے، راجا پرویز اشرف کا کہنا تھا کہ دوسری جماعتوں میں جانے والوں کو واپس لایا جائے گا، ہرسطح پر تنظیم اور رکنیت سازی ہوگی ۔

    راجا پرویز اشرف کا کہنا تھا کہ کمیٹی کے تمام ارکان نے حلف دیا ہے کہ وہ کسی بھی لابی اور گروپس سے تعلق نہیں رکھتے صرف بھٹو کے فلسفے پر عمل کرتے ہیں ،اُن کا کہنا تھا کہ پیپلزپارٹی ہی موجودہ حکمرانوں کے خلاف تحریک کی قیادت کررہی ہے، آصف زرداری نے کرپشن کے الزامات پر بارہ سال جیل کاٹی اور وہ بری ہوئے ۔

    راجا پرویز اشرف کا کہنا تھا کہ پاناما لیکس کے بعد وزیر اعظم کو اخلاقی طور پر مستعفی ہو جانا چاہیے ، سستی روٹی ، میٹرو بس ، اورنج ٹرین ، دانش اسکول اور نندی پور پاور پروجیکٹ کی لیکس بھی آنے والی ہیں، ہمارے پیٹ پھاڑنے کے دعوی کرنے والوں کے پیٹ ابھی کھلے نہیں اُن کا سب کچھ نظر آگیا۔

  • طاہرہ آصف کا قتل ،راجہ پرویزاشرف کا الطاف حسین سے اظہارافسوس

    طاہرہ آصف کا قتل ،راجہ پرویزاشرف کا الطاف حسین سے اظہارافسوس

    raja-ashraf-01