Tag: راجہ پرویز اشرف

اسلام آباد: پاکستان پیپلز پارٹی کے رہنماؤں نے کارکنوں کی ہنگامہ آرائی پر پولیس تشدد کے خلاف رد عمل دیتے ہوئے کہا ہے کہ ہم قانون پر یقین رکھنے والے لوگ ہیں لیکن تنگ کیا گیا تو دما دم مست قلندر ہوگا۔

تفصیلات کے مطابق جیالوں پر پولیس کی جانب سے واٹر کینن کے استعمال اور گرفتاریوں پر سابق وزیر اعظم اور پی پی رہنما راجہ پرویز اشرف نے دھمکی دیتے ہوئے کہا ہے کہ ہم پر امن اور قانون پر یقین رکھنے والے لوگ ہیں، لیکن کارکنوں کو تنگ کیا گیا تو دما دم مست قلندر ہوگا۔

سینیٹر شیری رحمان نے بھی کہا ہے کہ تبدیلی والے ایک نہتے لڑکے سے ڈرتے ہیں، کارکنان کو گرفتار اور سخت گرمی میں تشدد کیا گیا۔

شیری رحمان نے ٹویٹر اکاؤنٹ پر اپنے پیغام میں کہا کہ نیب دفتر جاتے ہوئے کارکنوں پر شیلنگ کی گئی اور واٹر کینن کا استعمال کیا گیا، ہمارے ورکرز کو گرفتار اور سخت گرمی میں تشدد کیا گیا۔

ان کا کہنا تھا کہ اسلام آباد بند کر دیا گیا ہے، یہ لاٹھی گولی کی سرکار کس سے ڈرا رہے ہیں؟ تمام کوششوں کے با وجود یہ کسی کو روک نہیں سکیں گے۔

یہ بھی پڑھیں:  قانون ہاتھ میں لیں گے تو قانون حرکت میں آئے گا: فیصل جاوید کا جیالوں کی ہنگامہ آرائی پر رد عمل

پیپلز پارٹی کی رکن قومی اسمبلی شازیہ مری نے کہا کہ اسلام آباد پولیس کی کارکنوں کی گرفتاریاں نا قابل برداشت ہیں، رکن قومی اسمبلی شازیہ ثوبیہ اور مسرت مہیسر کو بھی گرفتار کیا گیا ہے۔

انھوں نے کہا کہ کارکنوں پر لاٹھی چارج اور آنسو گیس کی شیلنگ کی گئی، پولیس نے خواتین پارلیمنٹرینز اور کارکنان پر بھی تشدد کیا۔

پی پی رہنما چوہدری منظور نے بھی کہا کہ جیالوں کو روکنا بزدلانہ کارروائی ہے، حکومت بلاول بھٹو کی للکار سے گھبرا چکی ہے۔

اسلام آباد: سابق وزیر اعظم اور پیپلز پارٹی کے سینئر رہنما راجہ پرویز اشرف کا کہنا ہے کہ پیپلز پارٹی عدالتوں کا احترام کرتی ہے ، لیکن احتساب سب کے لیے برابر ہونا چاہیے۔

تفصیلات کے مطابق سابق صدر آصف زرداری اور پیپلز پارٹی کے چیئرمین بلاول بھٹو کی نیب میں پیشی کے موقع پر راجہ پرویز اشرف کا کہنا تھا کہ دفاعی پوزیشن پر لانے کے لئے این ار او کاشوشہ چھوڑا جا رہا ہے۔

انہوں نے مزید کہا کہ مسلم لیگ ن کے صدر راجہ پرویز اشرف کے این آراو مانگنے کاعلم نہیں ہے، جس سے این آر او مانگا جارہا ہے وہ سامنے آئے۔ کوئی بھی کسی کو این آر او نہیں دے سکتا۔ راجہ پرویز نے یہ بھی کہا کہ کوئی بھی کبھی بھی بیمار ہوسکتا ہے، نواز شریف کی صحت پر سیاست کرنا اچھی بات نہیں ہے، ان کی رپورٹس تشویشناک ہیں۔

راجہ پرویز اشرف نے یہ بھی کہا کہ سیاستدانوں کو بغیر کسی ثبوت گرفتارکرلیاجاتاہے،گرفتاری کےبعدثبوت تلاش کرنااحتساب کے عمل پرسوال ہے۔کسی کو سیاسی مخالفت کا نشانہ نہیں بنانا چاہیے ۔سیاسی مخالفت کانشانہ بنانےسےجمہوریت کو خطرہ ہو گا۔

انہوں نے وفاقی حکومت پر تنقید کرتے ہوئے کہا کہ ’’حیرت ہےوزیر خزانہ نےکہا کہ ابھی عوام کی چیخیں نکلیں گی۔ پتا نہیں کون پلاننگ کر رہا ہے اور کون ایسے فیصلے کر رہا ہے؟۔

یاد رہے کہ پیپلزپارٹی کے چیئر مین بلاول بھٹو زرداری اور سابق صدر آصف زرداری آج راولپنڈی میں نیب کے سامنے پیش ہوئے۔ نیب نے دونوں سے علیحدہ سوالات کیے اور بیان قلم بند کیا۔ دونوں کو سوال نامے بھی فراہم کردیے گئے ہیں۔

نیب ذرائع کے مطابق آصف زرداری اور بلاول بھٹو کو پارک لین کمپنی کیس میں طلب کیا گیا ہے، پارک لین کیس میں اربوں روپےکی ترسیلات جعلی بینک اکاؤنٹس سے کی گئیں، آصف زرداری پرپارک لین کمپنی میں 1989 میں فرنٹ مین کے ذریعے خریداری کاالزام ہے۔

ذرائع کا کہنا ہے 2009 میں آصف زرداری اور بلاول بھٹو کمپنی کے شیئرہولڈر بنے،دونوں 25،25فیصد کےشیئر ہولڈر ہیں، آصف زرداری بطور کمپنی ڈائریکٹر اکاؤنٹس استعمال کرنےکااختیار رکھتے تھے جبکہ 2008 میں کمپنی کے دستاویز پر آصف زرداری کےبطور ڈائریکٹر دستخط موجود ہیں، پارک لین کمپنی نے قرضوں کی مد بھی بینکوں سے اربوں روپے لیے۔

اس موقع پر نیب دفترکے باہر پیپلزپارٹی کارکنان جمع ہوگئے تھے اور حکومت کےخلاف نعرے بازی کی گئی ، پی پی کارکنان نے نیب دفترمیں گھسنےکی کوشش کی، نادرہ چوک کے قریب 2 پولیس اہلکار پتھر لگنے سے زخمی ہوئے۔ مجموعی طور پرجیالوں اورپولیس کےدرمیان ہاتھا پائی میں 5 پولیس اہلکار زخمی جبکہ 50 افراد کو زیرحراست لے لیا گیا۔

اسلام آباد: سابق وزیر اعظم راجہ پرویز اشرف کی مشکلات بڑھ گئی ہیں، سابق وزیر اعظم کے خلاف رینٹل پاور منیجر وعدہ معاف گواہ بن گئے ہیں۔

تفصیلات کے مطابق رینٹل پاور کیس کے مقدمے میں سابق وزیر اعظم راجہ پرویز اشرف کے خلاف منیجر وعدہ معاف گواہ بن گئے ہیں جبکہ نیب نے راجہ پرویز اشرف کے خلاف ضمنی ریفرنس دائر کرنے کا فیصلہ کرلیا ہے۔

نیب نے احتساب عدالت میں رانا امجد کو گواہوں کی فہرست میں شامل کرنے کی درخواست کی اور کہا کہ رانا امجد کو ملزموں کی فہرست سے نکال کر گواہوں میں فہرست میں شامل کیا جائے۔

مزید پڑھیں: ہمارے ہاتھ صاف ہیں‘امید ہےعدالت سے انصاف ملے گا‘ راجہ پرویز اشرف

عدالت نے نیب کی درخواست منظور کرلی، عدالت نے نیب کو آئندہ سماعت تک ضمنی ریفرنس دائر کرنے کی ہدایت بھی کی۔

واضح رہے کہ رانا امجد اس مقدمے کے ملزمان میں شامل تھے اور وعدہ معاف گوا بننے کے بعد اب وہ استغاثہ کے گواہ بن گئے ہیں۔

یاد رہے کہ رینٹل پاور کیس میں پیپلزپارٹی کے رہنما راجہ پرویز اشرف سمیت دیگر ملزمان پر سابق وزیراعظم یوسف رضا گیلانی کے دور میں کرپشن اور عہدے کا غلط استعمال کرنے کا الزام ہے۔

راجہ پرویز اشرف نے بطور وزیر برائے پانی و بجلی کرائے کے بجلی گھروں کے منصوبوں کی منظوری دی تھی جس سے قومی خزانے کو اربوں روپے کا نقصان پہنچا تھا۔