اسلام آباد: وزیراعظم پاکستان میاں محمد نوازشریف نے کہا ہے کہ ہم نے عالمی امن کے لیے بے مثال قربانیاں دیتے ہوئے ہمیشہ صبروتحمل کا مظاہرہ کیا تاہم آئندہ بھی خطے میں امن کو برقرار رکھنے کے لیے اپنا کردار ادا کرتے رہیں گے۔
تفصیلات کے مطابق نوازشریف کی زیر صدارت وزیر اعظم ہاوس میں اعلی سطح کا اجلاس منعقد کیا گیا جس میں پاکستان کی اعلی سطح کی قیادت نے شرکت کی۔ اجلاس میں آرمی چیف جنرل راحیل شریف،ڈی جی ملٹری آپریشنز،وزیر داخلہ چوہدری نثار،وزیر خزانہ اسحاق ڈار سمیت دیگر اعلی سیاسی و عسکری قیادت نے بھی شرکت کی۔
اجلاس میں مقبوضہ کشمیر میں انسانی حقوق کی خلاف ورزیوں، بھارت کی جانب سے جنگی جنون اور دھمکی آمیز رویے کا جائزہ لیا گیا اور بھارتی فوج کی نہتے کشمیریوں پر ظلم و بربریت کی مذمت بھی کی گئی۔
میاں محمد نواز شریف نے مظلوم کشمیریوں سے اظہار یکجہتی کرتے ہوئے اس عزم کا اظہار کیا کہ ’’ مقبوضہ کشمیر میں بھارتی افواج کا تشدد کسی صورت برداشت نہیں کیا جائے گا، کشمیری اپنے حق خودارادیت کیلئے جدوجہد کررہے ہیں جس کا وعدہ اقوام متحدہ کی سلامتی کونسل کی قراردادوں میں کیا گیا ہے‘’۔
اُن کا کہنا تھا کہ مظلوم کشمیری نہ صرف پاکستان بلکہ پوری دنیا کی حمایت کے حق دار ہیں، جب تک کشمیری عوام کی خواہشات کے مطابق مسئلہ کشمیر حل نہیں ہوتا پاکستان کشمیریوں کی اخلاقی سفاری حمایت جاری رکھے گا‘‘۔
سندھ طاس معاہدے پر گفتگو کرتے ہوئے میاں محمد نوازشریف نے کہا کہ ’’پاکستان اور بھارت نے 1960 میں عالمی بینک کے زیراہتمام پانی کی منصفانہ تقسیم کے حوالے سے سندھ طاس معاہدے پر مشترکہ اتفاق کیا تھا تاہم اس معاہدے کو تن تنہا منسوخ نہیں کرسکتا‘‘۔
پڑوسی ملک کے جنگی جنون اور اڑی حملے کے حوالے سے وزیراعظم کا کہنا تھا کہ ’’پاکستان نے عالمی امن کیلئے بے مثال قربانیاں دیں اور ہمیشہ صبروتحمل کا مظاہرہ کیااور آئندہ بھی خطے میں امن کیلئے کوشش جاری رکھے گا تاہم اگر پڑوسی ملک کی جانب سے جنگ مسلط کرنے کی کوشش کی گئی تو اُس کا بھرپور جواب دیا جائے گا‘‘۔
ملکی دفاع اور بھارت کی جانب سے جنگی جنون سے نمٹنے اور ملکی دفاع و سلامتی کو یقینی بنانے کےلیے اجلاس میں شرکت کرنے والے تمام افراد نے مسلح افواج کی تیاریوں پر اطمینان کا اظہار کرتے ہوئے اُن کے کردار کو سراہا۔
وزیر اعظم نے مسلح افواج کی صلاحیتوں کو سراہتے ہوئے کہا کہ ’’پاکستان کی بہادر مسلح افواج کسی بھی جارہیت سے نٹمنے کی مکمل صلاحیت رکھتی ہے اور اس کے لیے پوری قوم اُن کے شانہ بشانہ کھڑے ہیں‘‘۔
اسلام آباد: وزیر اعظم میاں نواز شریف کے لیے اگلے کچھ ہفتوں میں ایک اہم فیصلہ سامنے آ چکا ہے جو انہیں ہر حال میں کرنا ہے، یہ فیصلہ آرمی چیف کی مدت ملازمت میں توسیع یا نئے آرمی چیف کی تقرری سے متعلق ہے، انہیں کسی ایسے آرمی چیف کا انتخاب کرنا ہے جو پاکستان کے امریکا اور بھارت سے تعلقات میں بہتری کے لیے کردار ادا کرے۔
راحیل شریف نے یہ اعلان کر رکھا ہے کہ وہ اپنی مدت میں توسیع نہیں لیں گے اور ان کی مدت نومبر میں تمام ہو رہی ہے، اس لیے پاکستان کے اس سب سے اہم عہدے کے لیے اب نئے حق دار ملٹری افسران کی نظر میں ہیں، یہ عہد کس کے حصے میں آئے گا یہ فیصلہ نواز شریف کو کرنا ہے۔
ڈی جی آئی ایس پی آر عاصم سلیم باجوہ نے اپنی آخری پریس بریفنگ میں کہا تھا کہ آرمی چیف کی مدت ملازت میں توسیع سے متعلق اندازے لگانا بند کیا جائے، ملٹری قیادت کی طرف سے واضح فیصلہ کیا جا چکا ہے، ملٹری نے اس سے زیادہ تبصرہ کرنے سے انکار کیا اور کہا کہ جنرل راحیل شریف انٹرویو کے لیے تیار نہیں ہیں۔
رائٹرز کے مطابق ایک ایسا ملک جہاں فوجی بغاوت ایک معمول رہی ہے اور نواز شریف خود 1999 میں بغاوت کا سامنا کر چکے ہیں، کچھ لوگ یہ شک ظاہر کر رہے ہیں کہ راحیل شریف اپنا عہدہ نہیں چھوڑیں گے۔
اس طرح کے خیالات رکھنے والوں میں وزیر اعظم کے قریبی ساتھی بھی شامل ہیں، البتہ اس خیال سے اتفاق کرنے کے لیے رائٹرز کے پاس کوئی ثبوت نہیں ہے، بہت جلد آرمی چیف حضرات کو محسوس ہوتا ہے کہ وہ ناقابل تسخیر شخصیت ہیں، نواز شریف کے ایک قریبی ساتھی نے اپنا نام ظاہر نہ کرنے کی شرط پر بتایا۔
دوسرے ممالک میں بھی پاکستان کی ملٹری قیادت کی تبدیلی کے معاملے کو بہت غور سے مانیٹر کیا جا رہا ہے۔
کون ہوگاپاکستان اگلا آرمی چیف ؟
وزیراعظم کے قریبی ساتھیوں اور ایک سینیئر ملٹری آفیشل کے مطابق ملٹری ہائی کمانڈ نے وزیر اعظم کو چار نام فراہم کیے ہیں۔ سب سے زیادہ جو شخص اس عہدے کے لیے پسندیدہ سمجھا جا رہا ہے وہ لیفٹیننٹ جنرل جاوید اقبال رمدے ہیں جو xxxi کارپس کے کمانڈر ہیں جنہوں نے 2009 میں تحریک طالبات کے خلاف آپریشن کرتے ہوئے طالبان کو سوات کی وادی سے نکال باہر کیا تھا۔
لیفٹینینٹ جنرل جاوید اقبال رمدے
بقیہ حق دار لیفٹیننٹ جنرل زبیر حیات چیف آف جنرل اسٹاف، لیفٹیننٹ جنرل اشفاق ندیم احمد کمانڈنگ افسر ملتان اور لیفٹینینٹ جنرل قمر جاوید باجوہ آرمی ٹریننگ اینڈ ایویلیوایشن ونگ ہیں۔
رمدے کو سب سے زیادہ پسندیدہ سمجھا جا رہا ہے کیونکہ وہ مسلم لیگ ن کے سربراہ نواز شریف کے قریب رہ چکے ہیں، کچھ لوگ انہیں جنرل راحیل شریف کی معیت میں رہنے کی وجہ سے مشہور شخصیت مانتے ہیں۔
اب تک نواز شریف نے اس سلسلے میں میڈیا سے کوئی اظہار خیال کرنے سے گریز کیا ہے لیکن پچھلے سال جب آرمی چیف نے سیاسی حکومت کو اپنی خدمات بہتر کرنے کا مشورہ دیا تو وزیر اعظم نے کہا تھا کہ ہر ادارے کو اپنے اختیارات کے اندر رہ کر کام کرنا ہو۔
برلن: آرمی چیف جنرل راحیل شریف نے کہا ہے کہ بھارت نہیں چاہتا کہ مسئلہ کشمیر حل ہو، بھارتی خفیہ ادارے را سمیت دشمن ایجنسیاں معصوم افراد کا خون بہانے کی حکمت عملی پر عمل پیرا ہیں۔
آئی ایس پی آر کے مطابق آرمی چیف راحیل شریف جرمنی پہنچ گئے جہاں یو ایس سینٹ کام کے زیر اہتمام کانفرنس سے خطاب کرتے ہوئے ان کا کہنا تھا کہ بھارت مقبوضہ کشمیر کی صورتحال پر دنیا بھر میں غلط فہمیاں پیدا کررہا ہے اور نہیں چاہتا کہ کشمیر جیسا تاریخی مسئلہ حل ہو درحقیقت را سمیت دشمن ایجنسیاں خون بہانے کی حکمت عملی پر عمل پیرا ہیں۔
اے آر وائی نیوز کے نمائندے لئیق الرحمان کے مطابق راحیل شریف کا کہنا تھا کہ قوم دہشت گردوں کے نظریات کو مسترد کرچکی ہے،دہشت گردوں کی پناہ گاہیں اور کمین گاہیں ختم کرد ی ہیں،پاکستانی فورسز دہشت گردی کے خلاف جواں مردی سے لڑ رہی ہیں۔
افغنستان کے معاملے پر بات کرتے ہوئے انہوں نے کہا کہ افغانستان میں دیرپا امن و استحکام کے لیے موثر اقدامات کرنے ہوں گے،ہمسایہ ممالک کے مخلص تعاون کے بغیر دہشت گردی کا خاتمہ ممکن نہیں۔
راولپنڈی: عوامی تحریک کےسربراہ طاہر القادری نے کہا ہے کہ آرمی چیف جنرل راحیل شریف نے ہمیں سانحہ ماڈل ٹائون پر انصاف دلانے کا وعدہ کیا تھا، ان کی ریٹائرمنٹ قریب ہے، آخر ہمیں کب انصاف ملے گا، ہم فوج یا جنرل راحیل شریف سے بھیک نہیں مانگتے لیکن راحیل شریف کو ان کا وعدہ یاد دلا رہے ہیں، ہم انصاف ملنے تک اپنی جنگ جاری رہیں گے۔
یہ بات انہوں نے راولپنڈی کے علاقے رحمان آباد میں قصاص مارچ سے خطاب کر تے ہوئے کہی۔ ان کے ساتھ عوامی مسلم لیگ کے سربراہ شیخ رشید، صاحبزادہ حامد رضا، ابوالخیر زبیر اور دیگر موجود ہیں۔
زندگی بھیک میں نہیں ملتی، چھینی جاتی ہے،قادری
طاہر القادری نے کہا کہ عوام اور کارکنوں کی وفاداروں کو سلام پیش کرتا ہوں، زندگی بھیک میں نہیں ملتی، چھینی جاتی ہے، میں نے اپنے کارکنوں کو جھکنا اور ڈرنا نہیں سکھایا، پرامن بنایا ہے۔
احتجاجی تحریک کے تین مرحلے ہیں، قادری
انہوں نے کہا کہ ہماری تحریک کے تین مرحلے ہیں، قصاص مارچ کے پہلے مرحلے کا آغاز سترہ جون کو ہوا تھا، ہمارا پہلا رائونڈ آج ختم ہونا تھا، اب کیا کرنا ہے میں ابھی اشارہ دیتا ہوں، میرا جلسے میں آنے کا آخر ارادہ نہیں تھا تاہم آخری وقت پر فیصلہ کیا۔
رائے ونڈ یا اسلام آباد، دوآپشن ہیں، قادری
طاہر القادری نے کہاکہ میرے پاس اسلام آباد اور رائے ونڈ، دو آپشن ہیں، اب ہمیں فیصلہ کرنا ہوگا کہ ہمارا احتجاجی مارچ اب اسلام آباد جائے یا رائے ونڈ،فیصلہ عوام کریں۔ انہوں نے کہاکہ اگر میں اپنے کارکنوں کو حکم دے دوں کہ رائے ونڈ چلنا ہے تونواز شریف سوچ لیں کیا منظر ہوگا۔
راحیل شریف ریٹائرمنٹ قریب ہے، انصاف کا وعدہ کب وفا ہوگا؟ قادری
انہوں نے آرمی چیف جنرل راحیل شریف کو مخاطب کیا کہ سانحہ ماڈل ٹائون کی ایف آئی آر آپ کے حکم پر درج ہوئی اور آپ نے انصاف دلانے کا وعدہ کیا تھا، آپ کی ریٹائرمنٹ قریب ہے، آپ کا وعدہ کب وفا ہوگا، آپ شریف آدمی ہیں میں بھی شریف آدمی ہوں، اگر ریٹائرڈ ہو کر گھر چلے گئے اور چودہ شہیدوں کو انصاف نہ ملا تو سوچیں کہ اللہ کے حضور کیا جواب دیں گے یہ آپ کے سوچنے کے لیے چھوڑنا چاہتا ہوں۔
فوج یا راحیل شریف سے بھیک نہیں مانگ رہے، قادری
انہوں نے کہا کہ ہم جنرل راحیل شریف یا فوج سے بھیک نہیں مانگ رہے ، ہم بھکاری نہیں، ہم صرف وعدہ یاد دلا رہے ہیں، نواز شریف یاد رکھیں، ہم بھیک نہیں مانگ رہے، ہمیں انصاف لینا آتا ہے اور سات دن میں وصول کرسکتے ہیں صرف تاریخ کا اعلان کرنا ہے۔
پشاور اور مردان حملہ نواز شریف نے کرایا، قادری
قبل ازیں اے آر وائی سے گفتگو میں انہوں نے کہا تھا کہ ان لوگوں نے پشاور اور مردان پر حملہ کرایا اور لائن آف کنٹرول پر اپنے حامیوں کو کہہ کر فائرنگ کرائی،جب تک نواز شریف کا اقتدار ختم نہیں ہوگا ملک محفوظ نہیں رہے گا۔
نواز شریف کی شوگر مل میں 300 بھارتی موجود ہیں، قادری کا انکشاف
انہوں نے تقریرکے دوران دس بھارتی باشندوں کے نام پڑھے اور کہا کہ یہ صرف دس افراد ہیں، ایسے تین سو افراد ایک سال میں بھارت سے یہاں آکر نواز شریف کی شوگر ملوں میں موجود ہیں، میرے پاس ان کا تمام ڈیٹا موجود ہے، ان کی آمد کی تاریخیں اور پاسپورٹ تک موجود ہیں، یہ لوگ انجینئرز کے ویزے پر ہیں، قانوناً اس عہدے کے افراد پاکستان سے بھارت یا بھارت سے پاکستان نہیں آسکتے لیکن شریف خاندان ایسے افراد کو باقدعدگی سے بلارہا ہے اور یہ لوگ آ اور جارہے ہیں۔
کلبھوشن یادیو کا ٹیلی فون ریکارڈ شریف برادران کی ملز سے ملا،قادری
انہوں نے کہا کہ بھارتی ایجنٹ کلبھوشن کی ٹیلی فون کالز کا ریکارڈ شریف برادران کی شوگر مل سے ملا تھا، یہ لوگ پاکستان کی سالمیت کے خلاف سازشوں میں ملوث ہیں انہوں نے بھارتی ایجنٹوں کو اپنی ملوں میں رکھا ہواہے، ملکی سالمیت کے ادارے چاہیں تو مجھ سے یہ دستاویزات حاصل کرلیں۔
کوئٹہ کا ایک لیڈر پڑوسی ملک کا ایجنٹ ہے، اس کے اکاؤنٹ میں 10 لاکھ ڈالر کی ٹرانزیکشن ہوئی، قادری
انہوں نے کوئٹہ کے ایک لیڈر کا تذکرہ کیا اور نام نہیں لیا، انہوں نے تقریر کے دوران ایک سرکاری لیٹر پیش کیا جو کہ وزارت داخلہ کی جانب سے سیکریٹری خارجہ اور کوئٹہ کی حکومت کو لکھا گیا جس میں کہا گیا کہ یہ شخص پڑوسی ملک کی فلاں ایجنسی کے پے رول پر ہے، اسے دس لاکھ امریکی ڈالر کی ایک ٹرانزیکشن ملی ہے، ایسے افراد کا اب تک محاسبہ کیوں نہیں کیا گیا؟؟ یہ شخص نواز شریف کا اتحادی ہے اور قومی اسمبلی کا ممبر ہے۔
یہ بھارتی انرجی پلانٹ اپنی کمپنیوں میں لگوارہے ہیں، قادری
انہوں نے کہا کہ شریف برادران نے شارجہ اور دبئی میں نئی ناموں سے کمپنیاں کھول کر بھارتی انرجی پلانٹ اپنی کمپنیوں میں لگوارہے ہیں بعد میں یہ لوگ پاکستانی باشندوں کو بجلی فروخت کریں گے انہوں نے بھارت سے قانونی معاہدہ (لیگل ایگرمنٹ) کیا ہوا ہے میں اسے بھی سیکیورٹی اداروں کو طلب کرنے پر حوالے کردوں گا، ڈاکیومنٹ غلط ثابت ہو تو جو سزا چاہیں مجھے دیں تاکہ اتنا بڑا الزام عائد کرنے والے کو سزا ملے۔
انہوں نے کہا کہ یہ بھارت کی مدد سے 16 ہزار میگا واٹ بجلی کے پروجیکٹ لگا رہےہیں یہ منصوبے 2018ء تک مکمل ہوجائیں گے، نواز شریف سے قومی سلامتی کا کوئی ادارہ پوچھ گچھ کیوں نہیں کرتا؟
انتظامیہ کو تین گھنٹے میں کنٹینر ہٹانے کا کہا تھا، شیخ رشید
قبل ازیں عوامی مسلم لیگ کے سربراہ شیخ رشید نے کہا ہے کہ حکمرانوں نے رات سے ہی کنٹینر لگا کر راستے بند کردیے تھے، انتظامیہ کو تین گھنٹے میں کنٹینر ہٹانے کا کہا تھا اگر کنٹینر نہیں ہٹائے تو اسلام آباد پہنچ جائوں گا۔
جنرل جیلانی کی انگلی پکڑ کر نہیں آیا، شیخ رشید
انہوں نے کہا کہ میں جنرل جیلانی کی انگلی پکڑ کر نہیں آیا، میں نے جنرل ضیا الحق کا جھوٹا نہیں کھایا، ڈپٹی کمشنر نے خط لکھ کر آگاہ کیا کہ میری جان کو خطرہ ہے لیکن پھر بھی جلسے میں آیا۔
غریب مرگئے، نواز شریف نے 32 فیکٹریاں بنالیں، شیخ رشید
انہوں نے کہا کہ حکمرانوں کے منہ سے مودی کے خلاف الفاظ نہیں نکلتے،میں مودی کایار نہیں ہوں، یہ کرپٹ حکمران ہیں یہ لوگ جلسوں اور تقاریر سے نہیں جائیں گے، غریب مرگئے لیکن نواز شریف نے 32 فیکٹریاں بنالیں۔
نواز شریف بزدل سیاست دان ہیں،میں ان کی طرح چیخیں نہیں مارتا،شیخ رشید
انہوں نے کہا کہ نواز شریف نے جس کو میٹرو ٹرین کا ہیڈ بنایا وہ دو ٹن ایفی ڈرین کے کیس میں ملوث ہے، نواز شریف بزدل سیاست دان ہیں، میں ان کی طرح چیخیں نہیں مارتا، نواز شریف جارہے ہیں اور میں طلوع ہورہا ہوں۔
آخری دم تک طاہر القادری کا ساتھ دیں گے، حامد رضا
قبل ازیں سنی اتحاد کونسل کے سربراہ صاحبزادہ حامد رضا نے خطاب کرتے ہوئے کہا کہ آخری دم تک طاہرالقادی کا ساتھ دیں گے، وہ دن دور نہیں جب یہ سب لوگ کٹہرے میں کھڑے ہوں گے، رانا ثنا اللہ وزیرلاقانون ہیں اپنی سوچ درست کریں۔
ایبٹ آباد : آرمی چیف جنرل راحیل شریف نے کہا ہے کہ آرمی میڈیکل کور کا دہشت گردی کیخلاف جنگ میں کردارقابل تعریف ہے۔
تفصیلات کے مطابق آرمی چیف جنرل راحیل شریف نے آرمی میڈیکل سینٹر ایبٹ آباد کا دورہ کیا۔ اس موقع پر آرمی چیف کا کہنا تھا کہ آرمی میڈیکل کورکا دہشت گردی کیخلاف جنگ میں کردار قابل تعریف ہے۔
جنرل راحیل شریف نے کہا کہ آرمی کے ڈاکٹرز اور پیرا میڈیکل اسٹاف نے ہمیشہ صحت عامہ کا معیار بلند رکھا، انہوں نے کہا کہ آرمی کے اسپتالوں اور طبی مراکز کی اپ گریڈیشن کی کوششیں قابل قدر ہیں۔
آرمی چیف کا کہنا تھا کہ قدرتی آفات میں میڈیکل کور نےہمیشہ لبیک کہا۔ اس موقع پر آرمی چیف جنرل راحیل شریف نے لیفٹیننٹ جنرل آصف ممتازسکھرا کو آرمی میڈیکل کور کے کرنل کمانڈنٹ کےبیجز لگائے۔
علاوہ ازیں آرمی چیف جنرل راحیل شریف نے یاد گار شہداء پر پھول چڑھائے اور فاتحہ پڑھی۔
راولپنڈی: آرمی چیف آف اسٹاف جنرل راحیل شریف نے خیبرایجنسی کی وادی راجگال کا دورہ کر اگلے مورچوں پر تعینات فوجی جوانوں سے ملاقات کی اور آپریشن میں حصہ لینے والے جوانوں کے حوصلے کو سراہا۔
پاک فوج کے تعلقات عامہ سے جاری اعلامیہ کے مطابق آرمی چیف آف اسٹاف نے خیبرایجنسی پاک افغان بارڈر کے قریب راجگال میں جاری آپریشن کا جائزہ لینے پہنچ گئے، اس موقع پر کور کمانڈر پشاور سمیت دیگر اعلیٰ فوجی افسران نے آرمی چیف آف اسٹاف کا استقبال کیا۔
آئی ایس پی آر کے اعلامیے میں مزید کہا گیا ہے کہ ’’آرمی چیف کو راجگال میں جاری آپریشن پر بریفنگ دی گئی جسے انہوں نے سراہتے ہوئے آپریشن میں حصہ لینے والے فوجیوں کے کردار کو سراہا‘‘، اس موقع پر آرمی چیف نے آپریشن میں حصہ لینے والے جوانوں سے ملاقات کی اور اُن کے حوصلے بلند کیے‘‘۔
آرمی چیف آف اسٹاف نے فوجی جوانوں سے خطاب کرتے ہوئے کہا کہ ’’دہشت گردی کے خلاف قوم اور پاک افواج نے بھاری قیمت ادا کی ہم آخری دہشت گرد کے خاتمے تک اس جنگ کو جاری رکھیں گے، انہوں نے اگلے مورچوں پر تعینات فوجی جوانوں کو ہدایت کی کہ ’’وہ سرحد پار دہشت گردوں کی نقل و حرکت روکنے لیے ہر وقت چوکس رہیں‘‘۔
جنرل راحیل شریف نے اس عزم کا اظہا کیا کہ ’’ملک بھر سے دہشت گردوں کے سلیپرسیلز کے خاتمے تک چین سے نہیں بیٹھیں گے، آرمی چیف کا کہنا تھا کہ ’’ملک بھر سے دہشت گردوں کے تمام ٹھکانے ختم کیے جائیں گے اور دہشت گرد جس مقام پر بھی موجود ہوں گے اُن کے خلاف کارروائی کی جائے گی‘‘۔
جنرل راحیل شریف نے خیبر ایجنسی کے آپریشن میں حصہ لینے والے فوجی جوانوں کی صلاحیتوں کو سراہتے ہوئے کہاکہ ’’راجگال آپریشن ایک کٹھن مرحلہ ہے مگر جوانوں کے بلند حوصلے سے اس میں کامیابی حاصل کر یں گے اور سرحدوں کے دونوں طرف موجود دہشت گردوں پر بہتر نظر رکھیں گے‘‘۔
واضح رہے پاک افغان بارڈر سے متصل خیبرایجنسی کی وادی راجگال کے مقام پر پاکستان آرمی کی جانب سے آپریشن شروع کیا گیا ہے، جس میں دہشت گردوں کے خلاف زمینی و فضائی کارروائی کی جارہی ہے۔ گزشتہ روز آرمی کی جانب سے فضائی حملوں میں دہشت گردوں کے 9 ٹھکانے تباہ کیے گئے تھے۔
راولپنڈی : آرمی چیف جنرل راحیل شریف نے 12 دہشت گردوں کی سزائے موت کے فیصلے کی توثیق کردی ہے، تمام ملزمان ملک بھر میں دہشت گردی سمیت سنگین جرائم میں ملوث تھے۔
آئی ایس پی آر کے مطابق مذکورہ دہشت گرد ملک بھر میں دہشت گردی کی مختلف کارروائیوں میں ملوث تھے اور تمام افراد نے دوران سماعت دہشت گردی کی سنگین وارداتوں کا اعتراف کیا ہے، تمام افراد کے خلاف فوجی عدالت میں کیس چلایا گیا جہاں تمام گواہوں اور ثبوتوں کو مد نظر رکھتے ہوئے پھانسی کی سزا دینے کا فیصلہ کیا گیا۔
پھانسی کی سزا پانے والے دہشت گردوں میں قیوم ولد سعید، حسن ڈار، بہرام شیر، اسحاق، عزیزالرحمان، آصف، طیب، اکبر، ایاز سمیت دیگر افراد شامل ہیں، آئی ایس پی آر کے مطابق دہشت گردوں کا تعلق تحریک طالبان اور دیگر دہشت گرد تنظیموں سے ہے۔
آئی ایس پی آر نے مزید کہا کہ دہشت گرد قیوم ولد سعید پاک فوج کے افسران اور جوانوں کے قتل میں ملوث رہا جبکہ دیگر دہشت گرد اغوا برائے تاوان، بم دھماکوں سمیت دیگر سنگین جرائم میں ملوث پائے گئے ہیں۔
پاک فوج کے تعلقات عامہ نے مزید تصدیق کی ہے کہ دہشت گردوں کی کارروائیوں سے کئی شہری جاں بحق ہوئے ہیں اور انہیں آپریشن ضرب عضب کے دوران ملک کے مختلف علاقوں سے گرفتار کیا گیا۔
راولپنڈی:آرمی چیف جنرل راحیل شریف کی جنرل جان نکلسن سے جی ایچ کیو راولپنڈی میں ملاقات ہوئی ہے۔
تفصیلات کے مطابق افغانستان میں متعین امریکی ریزولوٹ سپورٹ مشن کے سربراہ جنرل جان نکلسن نے ایک ہفتے کے دوران دوسری بار پاکستان کا دورہ کیا ہے اور پاک فوج کے سربراہ جنرل راحیل شریف سے جی ایچ کیو راولپنڈی میں ملاقات کی ہے۔
آئی ایس پی آر کے ایک ترجمان کے مطابق اس ملاقات میں خطے میں سکیورٹی کی صورتحال سمیت باہمی دلچسپی اور پیشہ وارانہ دلچسپی کے امور پر تبادلہ خیال کیا گیا جبکہ ملاقات میں پاک افغان بارڈر کی صورتحال اور پاک افغان بارڈر مینجمنٹ میکنزم سے متعلقہ امور بھی زیر غور آئے ۔
ذرائع کے مطابق ملاقات کے دوران دہشت گردوں کے خلاف کارروائیاں اور تعاون جاری رکھنے پر اتفاق کیا گیا جبکہ پاکستان کی جانب سے ایک بار پھر ملا فضل اللہ سمیت دیگر مطلوب دہشت گردوں کا نشانہ بنانے پر بھی بات کی گئی۔
پاکستان کی جانب سے ایک بار پھر اس عزم کا اعادہ کیا گیا کہ دہشت گردوں کے خلاف بلا امتیاز کارروائیاں جاری رہیں گی تاکہ ان کا خاتمہ یقینی بنایا جاسکے ۔
راولپنڈی: آرمی چیف جنرل راحیل شریف کا دورہ چین مکمل ہوگیا، اس موقع پر دونوں جانب سے باہمی تعلقات اور اہم امور پر تبادلہ خیال کیا گیا۔
تفصیلات کے مطابق آرمی چیف آف اسٹاف جنرل راحیل شریف دو روز قبل سرکاری دورہ مکمل کر کے وطن واپس پہنچ گئے، اس دورے میں سی پیک منصوبے اور اقتصادی راہداری سمیت خطے میں امن و امان کی صورتحال حال پر تفصیلی بات چیت کی گئی۔
China Visit-Impressions;Very intense,highly productive,focused visit.Strategic relationship manifested in talks&interactions
ڈی جی آئی ایس پی آر میجر جنرل عاصم سلیم باجوہ نے اپنے ٹویٹر پیغام میں کہا ہےکہ آرمی چیف کا دورہ چین نہایت بامقصد اور ثمر آور رہا ، اس دورے میں دونوں ممالک کے درمیان اقتصادی تعلقات ، خطے میں امن و استحکام کے علاوہ اہم امور پر تبادلہ خیال کیا گیا, اس دورے سے دونوں ممالک کے درمیان اقتصادی تعلقات میں بہتری اور استحکام پیدا ہو گا۔
واضح رہے دو روز قبل آرمی چیف جنرل راحیل شریف دو روزہ سرکاری دورے پر چین پہنچے تھے، اس دور ے میں ان کی ملاقات وزیر اعظم لی کی چیانگ کے علاوہ سیاسی و عسکری سربراہان سے بھی ہوئی۔
دو روزہ سرکاری دورے میں اقتصادی راہداری اور سی پیک منصوبے کے حوالے سے آنے والی سیکورٹی صورتحال پر تفصیلی بات کی گئی، دونوں ممالک کے سربراہان نے اس بات کا عزم کیا کہ منصوبوں کی کی تکمیل سے دونوں ممالک کو اس کے ثمرات میسر ہونگے۔
راولپنڈی: آرمی چیف جنرل راحیل شریف نے پاکستان آرڈیننس فیکٹری واہ کا دورہ کیا،آئی ایس پی آر ترجمان کے جاری کردہ بیان کے مطابق آرمی چیف جنرل راحیل شریف نے آپریشن ضرب عضب کے دوران اسلحہ و گولہ بارود کی ضروریات پوری کرنے پر پی او ایف کارکردگی کو سراہا۔
آئی ایس پی آرترجمان کے مطابق پی او ایف کی جدید صلاحیت اور پیش رفت کا جائزہ لینے کے لیے یہ دوسرا دورہ تھا۔ چیئرمین پی او ایف لیفٹیننٹ جنرل عمر محمود حیات کی جانب سے صنعتی کمپلیکس کی کارکردگی اور مستقبل کی توسیع کے منصوبوں کے بارے میں آرمی چیف کوتفصیلی بریفنگ دی۔
پی او ایف دورے کے دوران آرمی چیف جنرل راحیل شریف نے مینجمنٹ اور عملے سے خطاب میں کہا کہ پی او ایف پاکستان کی مسلح افواج کی جنگی قابلیت کو برقرار رکھنے کے لئے پریمیئر دفاعی صنعت ہے۔آرمی چیف نے جاری آپریشن جرب عضب کے لئے اسلحہ اور گولہ بارود کی کل ضرورت کو پورا کرنے پی او ایف کوششوں کو سراہا۔
ترجمان کے مطابق آرمی چیف جنرل راحیل شریف کا کہنا تھا کہ کہناتھا کہ مسلح افواج کو ہتھیاروں کیلئے خود انحصاری کی طرف جانا ہو گا ،پی او ایف کی مزید ٹیکنیکل اپ گریڈیشن کیلئے مزید اقدامات کیے جائیں ،اعلیٰ معیار کے پاکستانی ہتھیاروں کی دنیا میں مانگ بڑھ رہی ہے ،پی او ایف ہتھیاروں کی برآمد کیلئے نئی مارکیٹ تلاش کرے۔
General Raheel Sharif, Chief of Army Staff visited Pakistan Ordnance Factories, Wah today. This was his second visit to see the progress of envisaged modernisation and capacity enhancement of POF. COAS was given detailed briefing by Lieutenant General Omar Mahmood Hayat, Chairman POF Wah about performance of their Industrial complex and future expansion plans.
