چین زمانہ قدیم سے ہی حیرت و اسرار کی سر زمین رہا ہے جہاں کے طور طریقے ہمیشہ ہی الگ رہے ہیں۔ دنیا کی معیشت پر راج کرنے والی چینی قوم ہمیشہ سے ہی عقل و دانش کا مرقع رہی ہے۔
یہ قوم نہایت محنتی اور امن پسند ہے جس کا ایک ثبوت دنیا کے عجائبات میں سے ایک دیوار چین ہے۔ یہ دیوار چین بیرونی حملہ آوروں سے تحفظ اور اپنا دفاع کرنے کے لیے بنائی گئی۔
مزید پڑھیں: جاپان کو ترقی یافتہ بنانے والے 10 حقائق
دیوار چین آج بھی جوں کی توں برقرار ہے اور اس کی بناوٹ کو دیکھ کر اندازہ ہوتا ہے کہ چینی قوم کس قدر جفاکش اور محنتی تھی جو کئی صدیوں قبل بھی ایسی مضبوط دیوار بنا گئی جو آج بھی موسموں کے آگے سینہ تانے کھڑی ہے۔
چین میں 2 مذاہب کنفیوشس ازم اور تاؤ ازم کی بنیاد بھی پڑی۔ ان دونوں مذاہب کی تعلیمات نے دنیا کی تاریخ اور فلسفہ پر گہرے اثرات مرتب کیے۔ ارشاد نبویﷺ ہے، ’علم حاصل کرو چاہے اس کے لیے تمہیں چین جانا پڑے‘۔ یہ حدیث نبوی اس دور میں چین کے تعلیمی مرکز ہونے کا واضح ثبوت ہے۔
مزید پڑھیں: عظیم فلسفی کنفیوشس کے 12 رہنما افکار
چین کے رہنے والے اپنی صحت کا بھی بے حد خیال رکھتے تھے۔ آج ہم آپ کو چینیوں کے وہ راز بتارہے ہیں جو انہوں نے تا دیر صحت مند رہنے کے لیے صدیوں چھپا کر رکھے۔
اپنی عمر کو فراموش کردو
انسان کی عمر اسے کوئی بھی کام کرنے سے نہیں روکتی۔ زندگی سے لطف اندوز ہونا ہو، کچھ نیا سیکھنا ہو، یا کوئی نیا تجربہ کرنا ہو، یہ بھول جاؤ کہ تمہاری عمر اس کے لیے زیادہ یا بہت کم ہے۔
کسی کو اس کی عمر سے مت جانچو
ذہانت اور دانش مندی عمر کی قید نہیں ہوتی۔ یہ ایک خدا داد صلاحیت ہے اور کسی بچے میں بھی موجود ہوسکتی ہے۔ لہٰذا کسی کو اس کی عمر سے نہ جانچا جائے، بلکہ کوئی چھوٹا ہو یا بڑا، اس کی گفتگو کو سمجھنے کی کوشش کی جائے، کیا خبر اس میں علم کے خزانے چھپے ہوں۔
اپنے لیے ضروری چیزیں
قدیم چینی تعلیمات کے مطابق چند چیزوں کو اپنی زندگی کا لازمی جز بنا لیا جائے۔ ورزش، موسم کے مطابق گرم یا سرد درجہ حرارت، اور درختوں اور گھاس کی خوشبو سے اپنے آپ کو محروم مت رکھو۔
غذا
چینی تعلیمات جن غذاؤں پر زور دیتی ہے ان میں چاول، چائے اور سبزی کے ساتھ گوشت شامل ہے۔
گردوں کو فعال اور سر کو پرسکون رکھو
چینی تعلیمات کے مطابق انسان کو صحت مند ہونے کے لیے ضروری ہے کہ وہ اپنے گردوں کو فعال رکھے اور سر کو پرسکون اور ٹھنڈا رکھے، یعنی غصہ سے پرہیز کرے۔
کھل کر ہنسو
ہنسنے کے بے شمار فوائد ہیں۔ ہنسی انسانی دماغ سے دباؤ اور تناؤ پیدا کرنے والے کیمیائی عناصر کو ختم کر کے دماغ کو پرسکون کرتی ہے اور خون کی روانی کو بہتر بناتی ہے۔ قدیم چینی تعلیمات کے اس اصول کی جدید سائنس نے بھی تصدیق کردی ہے۔
مزید پڑھیں: کیا آپ ہنسنے کے فوائد جانتے ہیں؟
برے وقت کو بھول جاؤ
برے وقت کو یاد کر کے اداس، پریشان اور مایوس رہنا ہرگز دانش مندی نہیں۔ یہ زندگی میں نئی آنے والی خوشیوں اور کامیابیوں کی طرف توجہ کرنے سے روک دے گی۔ لہٰذا برے وقت کی تکلیف کو ذہن سے نکال دیا جائے۔
رحمدلی
ہر انسان، جانور اور پودے سے رحمدلی کا برتاؤ کرو۔ یہ بہت سے نقصانات سے محفوظ رکھے گا۔ لیکن یاد رہے کہ دماغ پرسکون ہوگا تو رحمدلانہ جذبات پیدا ہوں گے، اور جسمانی طور پر صحت مند رہو گے تو دماغ پرسکون ہوگا۔
دوسروں سے محبت کرو
دنیا میں موجود ہر شے سے محبت کرو اور جو لوگ دوسروں سے محبت نہیں کرسکتے ان سے کوئی تعلق نہ رکھو۔
خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہچانے کے لیے سوشل میڈیا پر شیئر کریں۔
