ممبئی: کیمپگوڈا انٹرنیشنل ایئرپورٹ پر سونا اسمگل کرنے کی کوشش میں گرفتار کنڑ فلم انڈسٹری کی اداکارہ رانیا راؤ نے دوران تفتیش اہم انکشاف کیا ہے۔
14 کلو گرام سے زائد سونے کی اسمگلنگ کے جرم میں گرفتار بھارت کی تمل فلم انڈسٹری کی مشہور اداکارہ اور آئی پی ایس افسر کی بیٹی رانیا راؤ نے ایک حیران کرنے والا انکشاف کیا ہے۔
بھارتی میڈیا کا بتانا ہے کہ دوران حراست ڈائریکٹوریٹ آف ریونیو انٹیلی جنس (ڈی آر آئی) کی جانب سے کی گئی تفتیش کے دوران رانیا راؤ نے انکشاف کیا کہ مجھے دبئی انٹرنیشنل ائیرپورٹ کے ٹرمینل 3 کے گیٹ اے سے سونا لینے کے لیے بذریعہ انٹرنیٹ کال موصول ہوئی تھیں، اس سفر سے 2 ہفتے قبل ہی غیر ملکی نمبرز سے کال آرہی تھی جس کے بعد میں نے پہلی بار سونا اسمگل کیا۔
یہ بھی پڑھیں: رانیا راؤ نے پولیس کو کیا بتایا؟
رانیا راؤ نے سونا اسمگل کرنے کا اعتراف کر لیا
اداکارہ نے بتایا کہ مجھے ائیرپورٹ کے ڈائننگ لاؤنج میں سفید گاؤن میں ملبوس ایک نامعلوم شخص نے دو پیکٹ دیے تھے جبکہ میں نے سونا چھپانے کا طریقہ یوٹیوب سے سیکھا تھا۔
رانیا نے کہا کہ اس نے اسمگلنگ کا طریقہ یوٹیوب پر دیکھا اور اس کے بعد اسی تکنیک پر عمل کیا، رانیا کا کہنا تھا کہ وہ اسمگلنگ کے لیے استعمال کیے جانے والے راستوں اور چھپانے کے طریقوں کو جاننے کے لیے آن لائن ویڈیو ٹیوٹوریلس کا سہارا لے رہی تھی۔
بھارتی میڈیا رپورٹ کے مطابق ائیرپورٹ پر رانیا راؤ نامعلوم شخص سے سونا لینے کے بعد اسے واش روم میں لے گئیں، بعد ازاں اداکارہ نے کپڑوں میں ٹیپ سے چپکا کر سونا اسمگل کرنے کی کوشش کی تھی، رانیا نے اپنے جوتوں اور جیبوں میں بھی سونے کے چھوٹے ٹکڑے چھپا رکھے تھے۔
واضح رہے کہ چند روز قبل اداکار رانیا راؤ کو 12 کروڑ56 لاکھ بھارتی روپے کی مالیت کے 14.2 کلو گرام سونا اسمگل کرنے کے الزام میں گرفتار کیا گیا تھا۔
