ایم ڈی واسا نے کہا ہے کہ جڑواں شہروں راولپنڈی اور اسلام آباد میں موسلادھار بارش کے بعد رین ایمرجنسی نافذ کردی گئی ہے۔
تفصیلات کے مطابق اسلام آباد اور راولپنڈی میں ان دنوں شدید بارشوں کی لپیٹ میں ہے جس کی وجہ سے وہاں کی صورتحال کافی خراب ہے، ایم ڈی واسا نے بتایا کہ سیدپور کے مقام پر سب سے زیادہ 124 ملی میٹر بارش ریکارڈ کی گئی۔
ایم ڈی واسا نے بتایا کہ گولڑہ 46 ملی میٹر، پی ایم ڈی کے مقام پر16 ملی میٹربارش ریکارڈ کی گئی، نشیبی علاقوں میں عملہ ہیوی مشینری کے ساتھ تعینات ہے۔
واسا کا کہنا ہے کہ نالہ لئی کی نگرانی جاری ہے، نالہ لئی میں کٹاریاں کے مقام پر 10 فٹ اور گوالمنڈی پل پر پانی کا لیول 5 فٹ ہے۔
خیال رہے کہ جڑواں شہروں اسلام آباد اور راولپنڈی میں ہونے والی طوفانی بارش کے باعث وفاقی دارالحکومت کے تمام ڈیمز میں تیراکی پر پابندی عائد کی گئی تھی۔
یہ پابندی ڈپٹی کمشنر اسلام آباد کی جانب سے عائد کی گئی تھی اس حوالے سے ان کا کہنا تھا کہ بارشوں کے باعث پانی کا بہاؤ کسی بھی وقت بڑھ سکتا ہے۔
انھوں نے مزید کہا کہ پانی کے بہاؤ کے پیش نظر تمام ڈیمز میں تیراکی پر پابندی عائد کردی گئی ہے جب کہ کشتی رانی پر بھی پابندی عائد کی جارہی ہے۔
https://urdu.arynews.tv/pakistan-braces-for-more-rains-as-monsoon-death-toll-rises-to-216/
