انقرہ: ترکیہ میں صدارتی اور پارلیمانی انتخابات کا میدان سج گیا ہے، ترک صدر رجب طیب اردوان اور اپوزیشن رہنما کمال قلیچ دار اوغلو کے درمیان سخت مقابلہ ہے۔
تفصیلات کے مطابق ترکیہ میں عام انتخابات کے لیے ووٹنگ کا عمل شروع ہو گیا ہے، جس کے ذریعے پانچ سالہ مدت کے لیے ترک صدر اور پارلیمنٹ دونوں کا انتخاب ہوگا، صدر رجب طیب اردوان کو اپنے دو دہائیوں کے دورِ اقتدار کے سب سے بڑے سیاسی چیلنج کا سامنا ہے۔
پارلیمان کی 600 نشستوں کے لیے 24 پارٹیاں اور 151 آزاد امیدوار انتخابات میں حصہ لے رہے ہیں۔ تاہم صدر رجب طیب اردوان کا مقابلہ اپوزیشن اتحاد کے رہنما کمال قلیجدار اوغلو سے ہے، دونوں رہنماؤں نے جم کے انتخابی مہم چلائی ہے، مہم کے آخری روز ترک صدر اور ان کے حامیوں نے تاریخی آیا صوفیہ مسجد میں نماز ادا کی اور کامیابی کی دعائیں مانگیں، جب کہ دوسری طرف اپوزیشن لیڈر کمال نے اتاترک میوزیم کا دورہ کیا۔
ترک میڈیا کے مطابق صدارتی امیدوار کو کامیابی کے لیے 50 فی صد سے زائد ووٹ حاصل کرنا ہوں گے، فیصلہ نہ ہو سکا تو زیادہ ووٹ حاصل کرنے والے دو امیدواروں کے درمیان 28 مئی کو دوبارہ مقابلہ ہوگا۔
ساڑھے 6 کروڑ سے زائد ووٹرز رائے شماری میں حصہ لیں گے۔
