واشگٹن: امریکا آنے والے غیر ملکیوں کو 30 دن سے زائد قیام پر لازمی رجسٹریشن کرانا ہوگی۔
تفصیلات کے مطابق سیکریٹری ڈی ایچ ایس کرسٹی نوئم کے مطابق صدر ڈونلڈ ٹرمپ کے ایگزیکٹیو آرڈر کے تحت غیر ملکیوں کی رجسٹریشن کا ایکٹ نافذ کر دیا گیا ہے، اب امریکا آنے والے غیر ملکیوں کو 30 دن سے زائد قیام پر لازمی رجسٹریشن کرانا ہوگی۔
غیر ملکیوں کو رجسٹریشن ساتھ رکھنے کی ہدایت کر دی گئی ہے، ورک پرمٹ اور گرین کارڈ ہولڈر اس سے مستثنٰی قرار دیے گئے ہیں، غیر ملکیوں کا رجسٹرڈ نہ ہونا جرم ہے، جس پر قید اور جرمانے ہوں گے۔
یاد رہے کہ صدر ٹرمپ نے 20 جنوری کو امیگریشن سسٹم کے تحت غیر ملکیوں کی رجسٹریشن ایکٹ پر دستخط کیے تھے، 14 سال کی عمر کو پہنچنے والے غیر ملکیوں کو بھی رجسٹرڈ ہونے کی ہدایت کی گئی ہے، تمام غیر ملکیوں کو رجسٹریشن ہر وقت پاس رکھنے کی ہدایت بھی کی گئی ہے۔
امریکا میں غیرملکیوں کی رجسٹریشن کی ڈیڈ لائن ختم، سخت احکامات جاری
واضح رہے کہ امریکا میں غیر ملکیوں کی سخت جانچ پڑتال کا آغاز ہو گیا ہے، غیرملکیوں کی رجسٹریشن کی ڈیڈ لائن ختم ہو گئی ہے، اور غیر رجسٹرڈ افراد مجرم قرار دے دیے گئے ہیں، امریکا میں موجود غیر ملکیوں کی رجسٹرڈ ہونے کے لیے آخری تاریخ 11 اپریل تھی۔
سیکریٹری ہوم لینڈ سیکیورٹی کرسٹی نوئم نے ایک بیان میں کہا ہے کہ غیر قانونی طور پر امریکا میں موجود غیر ملکی اب چلے جائیں، اگر غیر ملکی ابھی چلے جاتے ہیں تو واپس لوٹنے کا موقع مل سکتا ہے۔ انھوں نے کہا ہمیں یہ جاننا ہے کہ امریکیوں کی سلامتی کے لیے ہمارے ملک میں کون موجود ہے۔
ترجمان وائٹ ہاؤس کیرولائن لیوٹ نے کہا ہے کہ ملکی سلامتی کے لیے ضروری ہے ہر غیر ملکی کی جانچ پڑتال ہو، نئے کانگریس بل کے تحت ووٹر کو امریکی شہریت کا ثبوت دکھانا ہوگا۔
