کراچی: کے ایم سی اور لوکل گورنمنٹ سندھ میں رسہ کشی بڑھ گئی، لوکل گورنمنٹ نے حکم عدولی پر سینئر ڈائریکٹر ایچ آر ایم بلدیہ عظمیٰ کو عہدے سے ہٹا دیا۔
تفصیلات کے مطابق لوکل گورنمنٹ سندھ نے عہدے کا چارج نہ چھوڑنے پر جمیل فاروقی کو معطل کر کے رپورٹ کرنے کا حکم دے دیا، جمیل فاروقی گریڈ 18 میں بحال ہونے کے باوجود گریڈ 19 کی تنخواہ وصول کر رہے تھے۔
اے آر وائی نیوز کے مطابق میٹروپولیٹن کمشنر کے ایم سی نے جمیل فاروقی کے تبادلے کے خلاف لوکل گورنمنٹ کو خط لکھا تھا، جس میں انھوں نے جمیل فاروقی کو ادارے کا سینئر اور قابل ترین افسر قرار دیا۔ میٹروپولیٹن کمشنر نے جمیل فاروقی کے تبادلے پر کے ایم سی کو اعتماد میں نہ لینے کا شکوہ بھی کیا تھا۔
دوسری طرف نجم الزماں کی خدمات ادارہ ترقیات کراچی کے سپرد کر دی گئی ہیں، وہ بلدیہ عظمیٰ کراچی میں سینئر ڈائریکٹر تعینات تھے، نجم الزماں گریڈ 19 کے افسر ہیں۔
ذرائع کا کہنا ہے کہ کے ڈی اے کی مجاز اتھارٹی ان کے مساوی گریڈ کے لحاظ سے تعیناتی عمل میں لائے گی، تعیناتی کا حکم نامہ لوکل گورنمنٹ سندھ نے جاری کیا، ڈیپوٹیشن پر تعیناتیوں پر کے ڈی اے افسران میں کھلبلی مچ گئی ہے۔
کے ڈی اے کے ایک افسر نے احتجاج کرتے ہوئے کہا ہے کہ ڈیپوٹیشن زدہ افسران کو تعینات کر کے ادارہ ترقیات کراچی کو نقصان پہنچایا جا رہا ہے، کے ڈی اے میں کئی افسران کو کھڈے لائن لگا دیا گیا ہے۔
افسر نے کہا کہ خاص سسٹم کے تحت افسران کی تعیناتیاں عمل میں لائی جا رہی ہیں، ڈیپوٹیشن پر تعیناتیاں سپریم کورٹ کے احکامات کی کھلی خلاف ورزی ہے، یہ سلسلہ جاری رہا تو عدالتی دروازہ کھٹکھٹائیں گے۔
