پاکستانی نژاد برطانوی اداکار رض احمد نے ‘دی لانگ گڈ بائی’ کے لیے اپنا پہلا آسکر ایوارڈ جیت لیا۔
برطانوی ایکٹر رض احمد نے اپنے کیریئر کا پہلا آسکر ایوارڈ جیت لیا ہے، ان کو بہترین لائیو ایکشن شارٹ فلم کے آسکر ایوارڈ سے نوازا گیا ہے۔
رض نے 12 منٹ کی شارٹ فلم ‘دی لانگ گڈ بائے’ میں اداکاری کے زبردست جوہر دکھائے، کہانی برطانیہ میں آئے ہوئے پناہ گزینوں کی جو ایک شادی کی تیاری کر رہے ہیں لیکن پھر ایک شدت پسند گروہ ان پر حملہ آور ہوتا ہے۔
گزشتہ سال بھی فلم ساؤنڈ آف میٹل میں رض احمد کی اداکاری کو دیکھتے ہوئے انھیں بہترین اداکار کے آسکر ایوارڈ کے لیے نامزد کیا گیا تھا، رض، آسکر کی تاریخ میں پہلے پاکستانی اور مسلمان اداکار ہیں جنھیں اس ایوارڈ کے لیے نامزد کیا گیا۔
رض احمد نے دی لانگ گڈ بائے میں نہ صرف مرکزی کردار ادا کیا بلکہ ہدایت کار انیل کاریا کے ساتھ مل کر اس کی اسکرپٹ بھی لکھا،
دی لانگ گڈ بائے رض کے اسی البم پر مبنی ہے، جو پچھلے سال ریلیز ہوا تھا، اس البم کا نام بھی دی لانگ گڈ بائے ہی ہے۔
واضح رہے کہ پاکستانی نژاد برطانوی اداکار کا اصلی نام رضوان احمد ہے، لیکن انھیں عرف عام میں ‘رض’ کے نام سے جانا جاتا ہے، رضوان احمد نے اپنے کیریئر کی شروعات 2006 میں فلم روڈ ٹو گوانتانامو سے کی تھی، وہ 2013 میں بھارتی ہدایت کار میرا نائر کی فلم ‘ دی ریلکٹنٹ فنڈامینٹلسٹ’ میں بھی نظر آئے تھے۔
2016 میں ان کی ٹی وی سیریز ‘دی نائٹ آف’ کو ناقدین کی جانب سے مثبت ردعمل ملا تھا اور ان کی شان دار اداکاری کو دیکھتے ہوئے انھیں 2017 میں ایمی ایوارڈز کے لیے نامزد بھی کیا گیا تھا، رض موسیقار بھی ہیں۔
