نئی دہلی: بھارتی وزیر اعظم نریندر مودی اور ان کی پالیسیوں کی سخت ناقد مسلمان بھارتی صحافی رعنا ایوب کو بیرون ملک جانے سے روک دیا گیا، رعنا جرنلسٹ فیسٹول میں بھارتی جمہوریت پر ایک تقریر کرنے جارہی تھیں۔
بھارتی صحافی اور وزیر اعظم نریندر موری کی ناقد رعنا ایوب کو جرنلسٹ فیسٹول میں شرکت کے لیے برطانیہ جانے سے روکنے پر سوشل میڈیا پر صارفین اور صحافتی تنظیمیں مودی حکومت پر تنقید کررہی ہیں اور مطالبہ کررہی ہیں کہ صحافی کے بیرون ملک سفر کرنے پر عائد پابندی کو ختم کیا جائے۔
رعنا ایوب نے 29 مارچ کو اپنی ایک ٹویٹ میں لکھا تھا کہ انہیں ممبئی کے ایئرپورٹ پر سفر کرنے سے روکا گیا، وہ جرنلسٹ فیسٹول میں بھارتی جمہوریت پر ایک تقریر کرنے جارہی تھیں۔
I was stopped today at Mumbai immigration from travelling to deliver this address & onwards to @journalismfest to deliver d keynote speech on Indian democracy. I had made this announcement public over weeks, yet the ED summon very curiously arrived in my inbox after i was stopped https://t.co/BGNm8pcjlD
— Rana Ayyub (@RanaAyyub) March 29, 2022
اس سے قبل انٹرنیشنل سینٹر فار جرنلسٹ نے ایک ٹویٹ میں لکھا تھا کہ وہ رعنا ایوب کو برطانیہ مدعو کر رہے ہیں اور وہ آن لائن تشدد پر ہونے والے ایک ایونٹ میں بات چیت کریں گی۔
رعنا ایوب کو بیرون ملک سفر سے روکنے کو ایمنسٹی انٹرنیشنل نے صحافی کے حقوق کی خلاف ورزی قرار دیا ہے۔
اپنے بیان میں ایمنسٹی انٹرنیشنل کا کہنا تھا کہ رعنا ایوب پر سفری پابندیاں بھارتی حکام کی جانب سے صحافیوں، سول سوسائٹی، انسانی حقوق کے کارکنان اور میڈیا اداروں کے حقوق کی خلاف ورزیوں کی فہرست میں تازہ اضافہ ہے۔
The travel restrictions on Rana Ayyub are the latest in a long list of human rights violations by Indian authorities against journalists, human rights activists, civil society groups and media outlets in India. The crackdown on dissent must STOP.
— Amnesty International (@amnesty) March 30, 2022
سفری پابندیوں کے خلاف رعنا ایوب نے دہلی ہائی کورٹ میں پٹیشن دائر کر رکھی ہے جس کی سماعت کل متوقع ہے۔
رعنا ایوب پر سفری پابندی کا حوالہ دیتے ہوئے اقوام متحدہ کے سابق مندوب ڈیوڈ کائے نے لکھا کہ میں کئی سالوں سے اقوام متحدہ کے لیے انسانی حقوق کی صورتحال کے مشاہدے کے لیے بھارت میں داخل ہونے کی کوشش کر رہا ہوں لیکن کوئی فائدہ نہیں ہوا۔، اب صحافی رعنا ایوب کو جانے سے روک دیا گیا ہے۔
برطانوی نشریاتی ادارے کی صحافی میگھا موہن نے رعنا ایوب سے یکجہتی کا اظہار کرتے ہوئے کہا کہ صحافت جرم نہیں ہے۔
واضح رہے کہ صحافی رعنا ایوب گجرات فائلز کی مصنف ہیں جس میں انہوں نے سنہ 2002 میں گجرات میں ہونے والے فسادات کے حوالے سے اس وقت کی بی جے پی حکومت کو مورد الزام ٹھہرایا تھا۔
