لاہور : وزیراعظم شہباز شریف اور حمزہ شہباز کیخلاف رمضان شوگر ملز ریفرنس مین اہم پیش رفت سامنے آئی مدعی بیان سے منحرف ہو گیا۔
تفصیلات کے مطابق اینٹی کرپشن عدالت میں وزیراعظم شہباز شریف اور حمزہ شہباز کیخلاف رمضان شوگر ملز ریفرنس کی سماعت ہوئی۔
سماعت میں مقدمہ کے مدعی ذوالفقار اپنے بیان سے منحرف ہو گیا، اس نے عدالت میں بیان حلفی دیا۔
جس میں کہا گیا کہ رمضان شوگر ملز گندہ نالہ تعمیر سے قومی خزانہ کو نقصان نہیں ہوا، میں نے رمضان شوگر ملز کیخلاف ایسی کوئی درخواست دائر نہیں کی۔
مقدمہ کے مدعی کا کہنا تھا کہ رمضان شوگر ملز ریفرنس بنانے کیلئے میرا نام استعال کیا گیا۔ مجھے درخواست کے نکات تک کا علم نہیں ہے۔
مدعی نے استدعا کی کہ وہ اپنی درخواست واپس لینا چاہتا ہے، جس پر پراسکیوشن نے منحرف مدعی زولفقار سے بیان پر جرح مکمل کی۔
عدالت نے مدعی سے استفسار کیا کہ کیا ہوئی دباو ہے اس پر تو اس نے کہا کہ اپنی مرضی سے بیان دے رہا ہوں کوئی دباو نہیں ۔
عدالت نے کیس کی سماعت 30 جنوری تک ملتوی کر دی اور آئندہ سماعت پر شہباز شریف اور حمزہ شہباز کی بریت کی درخواست پر دلائل طلب کر لیے۔
