بالی ووڈ کے نامور اداکار رنبیر کپور نے اپنی اور عالیہ بھٹ کی فلم براہمسترا کی مزید تشہیر کرنے سے انکار کردیا۔
اداکارہ عالیہ بھٹ نے ویڈیو اینڈ شیئرنگ ایپ انسٹا گرام پر رنبیر کپور کی ایک ویڈیو شیئر کی ہے جس میں انہیں دیکھا جاسکتا ہے کہ وہ فون پرکسی سے بات کرتے ہوئے فلم کی تشہیر کرنے سے انکار کررہے ہیں۔
ویڈیو میں انہوں نے کہا کہ براہمسترا ڈزنی پلس اور ہاٹ اسٹار پر آرہی ہے اس کا مطلب ہے اس کی تشہیر ہورہی ہے، تو اب بار بار تشہیر کرکے کیا کرنا ہے۔
رنبیر نے کہا کہ عالیہ بھٹ نے فلم میں اتنی بار شیوا نہیں بولا، اور میں ہر تشہیر میں ڈانس کرکے بھوت بن چکا ہوں، ہر ایونٹ پر کیسریا گانا گاکر عالیہ کی آواز بیٹھ چکی ہے۔
اداکار نے کہا کہ ہم نے ڈیڑھ سو ڈرون اڑا دیے، ڈھائی سو لڈو بانٹ دیے، اب کیا کروں اسکی تشہیر کے لیے سب کے گھر جاؤں اور کہوں کہ ہماری فلم ڈزنی اور ہاٹ اسٹار پر آرہی ہے پلیز آپ لوگ دیکھیں۔
View this post on Instagram
انہوں نے مزید کہا کہ براہمسترا ویسے ہی ہٹ ہے، آیان کو کیا لگتا ہے براہمسترا کی تشہیر کے علاوہ میری کوئی زندگی نہیں ہے، باپ بننے والا ہوں۔
ویڈیو میں دیکھا جاسکتا ہے کہ گفتگو کے دوران ان کے پاس ایک اور کال آتی ہے جس میں رنبیر کہتے ہیں کہ ہاں یار میں براہمسترا کی تشہیر کے لیے آرہا ہوں، یہ فلم سب کو دیکھنی ہوگی میں ضرور آؤں گا۔
ویڈیو کے اختتام پر کال رکھنے کے بعد اداکار رنبیر اداس نظر آتے ہیں اور ایک تکیہ اٹھا کر اپنے سر پر مارتے نظر آرہے ہیں۔
ویڈیو شیئر کرتے ہوئے عالیہ بھٹ نے کیپشن میں لکھا کہ ’ہارڈ فیکٹ‘ ساتھ ہی ایک ایموجی کا بھی استعمال کیا۔
واضح رہے کہ حال ہی میں ریلیز ہونے والی فلم ’براہمسترا‘ میں رنبیر کپور اور عالیہ بھٹ نے مرکزی کردار ادا کیا ہے۔
اس فلم کو 9 ستمبر کو دنیا بھر میں تیلگو، تامل، ملیالم، اور ہندی سمیت متعدد زبانوں میں ریلیز کیا گیا اور فلم نے صرف 3 دنوں میں دنیا بھر میں 425 کروڑ روپے کا بزنس کرلیا ہے۔
فلم ’براہمسترا‘ ایک ساتھ سب سے زیادہ اسکرینز پر ریلیز ہونے والی اب تک کی پہلی بھارتی فلم ہے، اسے دنیا بھر میں 8000 اسکرینز پر ریلیز کیا گیا ہے۔
