لوگ اپنی بات منوانے کے لیے دوسرے کی خوش آمد کرتے ہیں جس کو مسکا لگانا کہا جاتا ہے لیکن مسکا صرف لگایا ہی نہیں بلکہ کھایا بھی جاتا ہے۔
ہر ایک کو مسکا لگانے کا تجربہ ہوگا کیونکہ بہنیں اپنی فرمائشیں پوری کرنے کے لیے بھائیوں کو مسکا لگاتی ہیں، بیوی شوہر کی خوش آمد کرتی ہیں، لیکن آج ہم آپ کو کراچی کے علاقے رنچھوڑ لائن لے جا رہے ہیں جہاں مسکا لگایا نہیں جاتا بلکہ کھایا جاتا ہے۔
جی ہاں رنچھوڑ لائن میں شہاب الدین چاچا کے نام سے مشہو ر بزرگ 73 سال سے مسکا بن بیچ رہے ہیں اور اس کو کھانےکے لیے دور دور سے ہر عمر کے لوگ شوق سے یہاں آتے ہیں۔
بن پر مکھن، جیلی، انڈا اور دیگر لوازمات لگا کر پیش کیا جاتا ہے۔ اس کا ذائقہ منفرد ہے کہ جس نے نصف صدی پہلے بچپن میں کھایا تھا۔ وہ اب بڑھاپے میں بھی اس مسکا بن کا رسیا ہے اور نہ صرف خود شوق سے کھاتا بلکہ اپنے بچوں کو بھی کھلاتا ہے۔
مسکا بن بنانے والے شہاب الدین چاچا کا کہنا ہے کہ انڈیا سے پاکستان آئے تھے، تب سے یہ کام کر رہے ہیں۔ ہمارا بن پورے پاکستان میں مشہور ہے۔ ہم یہ دکان صبح 7 بجے کھولتے ہیں اور رات 3 بجے بند کرتے ہیں۔
ان کا کہنا ہے کہ وہ لوگ اپنے جو بیرون ملک جا بسے ہیں۔ وہ بھی اب تک مسکا بن کا ذائقہ نہیں بھولے ہیں اور کوئی آنے جانے والا ہو تو ان سے مسکا بن لانے کی فرمائش ضرور کرتے ہیں۔
اس دکان پر مسکا بن کھانے والوں میں بچوں سے لے کر 80 سال تک کے بزرگ سمیت ہر عمر کے لوگ موجود تھے۔ ان کا کہنا ہے کہ پہلے ہمارے والد ہمیں لاکر کھلاتے تھے، اب ہم اپنے بچوں کو کھلاتے ہیں۔ ایک بزرگ کا کہنا ہے کہ وہ بچپن کی یادیں تازہ کرنے یہاں آتے ہیں۔
