رنگپور: پنجاب میں ضلع خوشاب کے ٹاؤن رنگپور میں سپر بند کی زد میں آنے والی زمینوں کے معاوضے میں کسانوں سے رشوت لینے کا انکشاف ہوا ہے۔
تفصیلات کے مطابق محکمہ انہار تریموں کی جانب سے کسانوں کا استحصال جاری ہے، دریائے چناب کے کٹاؤ کے بعد بننے والے ناقص سپر بند کی زد میں آنے والی زمینوں کے معاوضے میں کسانوں سے رشوت لینے کا انکشاف ہوا ہے۔
کسانوں سے رشوت لینے کی فوٹیج اے آر وائی نیوز نے حاصل کی ہے، جس میں محکمہ انہار کے پٹواری کو کسان سے رشوت وصول کرتے دیکھا جا سکتا ہے۔
رپورٹ کے مطابق دریائے چناب کے کٹاؤ کی وجہ سے موضع بہرام پور، امیر پور کی سیکڑوں ایکڑ اراضی زیر آب آ چکی ہے، 70 کروڑ کی خطیر لاگت سے سپر بندوں کی تعمیر کی گئی، لیکن محکمہ انہار تریموں کے ٹھیکے دار نے سپر بند نقشے کے مطابق نہیں بنائے۔
سپر بند نقشے کے مطابق نہ بننے کی وجہ سے کٹاؤ ابھی تک جاری ہے، اور اب اس کی زد میں آنے والی زمینوں کے کسانوں سے چیک دیتے وقت رشوت لی جا رہی ہے۔
کسانوں کا کہنا تھا کہ ایک تو سپر بند کو نقشے کے مطابق نہیں بنایا گیا، اوپر سے رشوت بھی لی جا رہی ہے، وزیر اعلیٰ پنجاب اس صورت حال کا نوٹس لیں، اور رشوت لینے والے اہل کار کے خلاف کارروائی کی جائے۔
