پیرس: ڈرون طیاروں اور مختلف روبوٹک جانوروں کے بعد اڑنے والی روبوٹک مکھی بھی تیار کرلی گئی جسے میٹا فلائی کا نام دیا گیا ہے۔
فرانس کے ایرو ناٹیکل انجینئر ایڈون وان رایومبکے نے اڑنے والی روبوٹک مکھی تیار کی ہے، یہ وہی انجینئر ہیں جنہوں نے کچھ عرصہ قبل اڑنے والا روبوٹک پرندہ بھی تیار کیا تھا۔
میٹا فلائی نامی اس روبوٹک مکھی کا وزن 10 گرام اور لمبائی ساڑھے 7 انچ ہے۔ اس کے پر مرکزی ڈھانچے میں لگی کورلیس موٹر کے ذریعے حرکت کرتے ہیں۔
پروں کی حرکت سے پیدا ہونے والی حرارت جذب کرنے کے لیے مکھی میں ایلومینیئم ہیٹ سنک بھی لگایا گیا ہے۔
یہ روبوٹ زیادہ سے زیادہ 100 میٹر کی بلندی تک پرواز کرسکتا ہے۔ 15 منٹ کے ریچارج پر یہ 8 منٹ تک پرواز کرسکتا ہے۔
روبوٹک مکھی کا سر، دھڑ اور ٹانگیں کاربن فائبر سے بنائی گئی ہیں اور لچکدار ہیں یہی وجہ ہے کہ کسی چیز سے ٹکرانے پر یہ نہ تو خود ٹوٹتا ہے نہ کسی اور شے کو نقصان پہنچاتا ہے۔
