Tag: روزویلٹ ہوٹل

اسلام آباد: وفاقی وزیر خواجہ سعد رفیق کا کہنا ہے کہ روز ویلٹ ہوٹل ایک سال کے لیے 100 فیصد لیز پر دے دیا ہے، روز ویلٹ ہوٹل کے 1 ہزار 25 کمرے لیز پر لگ گئے ہیں۔

تفصیلات کے مطابق وفاقی وزیر خواجہ سعد رفیق کا کہنا ہے کہ روز ویلٹ ہوٹل پاکستان کا قیمتی اثاثہ ہے، روز ویلٹ سنہ 2020 میں کرونا وائرس کے دوران بند کر دیا گیا تھا، بند ہوٹل کی لاگت 25 ملین ڈالر ہیں۔

خواجہ سعد رفیق کا کہنا تھا کہ خطرہ تھا کہ ہوٹل کو استعمال نہ کیا تو لینڈ مارکنگ کی زد میں آجائے گا، ایسا ہونے سے ہوٹل کی قیمت بھی کم ہوجاتی، گزشتہ حکومت نے فیصلہ کیا ہوٹل کو پرائیوٹ پبلک سیکٹر کی طرف لے جایا جائے۔

انہوں نے کہا کہ روز ویلٹ ہوٹل کے لیے حکومت کا نیویارک سٹی ایڈمنسٹریشن سے معاہدہ ہوگیا، روز ویلٹ ہوٹل 1 سال کے لیے 100 فیصد لیز پر دے دیا ہے، روز ویلٹ ہوٹل کے 1 ہزار 25 کمرے لیز پر لگ گئے ہیں۔

سعد رفیق کا کہنا تھا کہ ہمارا ارادہ ہے ہوٹل کو 3 سال تک لیز پر دیں گے، پہلے سال 202، دوسرے سال 250 اور تیسرے سال 210 ڈالر پر ڈے رینٹ ملے گا۔ پرائیوٹ پبلک پارٹنر شپ کے تحت ہوٹل کی مزید تزئین آرائش ہوگی۔

انہوں نے کہا کہ وفاق نے لاہور، کراچی اور اسلام آباد ایئرپورٹ کی آؤٹ سورسنگ کا فیصلہ کیا ہے، ایئر پورٹس کا آپریشن انٹرنیشنل فرم کے حوالے کیا جائے گا۔ ایئر پورٹس کو آؤٹ سورس کرنے کا مطلب بیچنا نہیں ہے۔