Tag: روزگار کی فراہمی

اسلام آباد : وزیر اعظم عمران خان نے کہا ہے کہ ملکی معیشت کا پہیہ بھی چلے گا اور نوجوانوں کو روزگار بھی ملے گا، آئندہ چھ ماہ میں واضح بہتری دیکھنے میں آئے گی۔

ان خیالات کا اظہار انہوں نے اسلام آباد میں کے پی سے تعلق رکھنے والے اراکین اسمبلی سے ملاقات کے موقع پر کیا، اس موقع پر اسپیکر قومی اسمبلی اسد قیصر،پرویز خٹک، علی محمد خان اورمعاون خصوصی نعیم الحق بھی موجود تھے۔

اراکین اسمبلی نے وزیراعظم کو اپنے حلقوں کے مسائل سے آگاہ کیا اور خیبرپختونخوا کی مجموعی صورتحال اور ترقیاتی منصوبوں کے حوالے سے بھی گفتگو کی۔

وزیر اعظم نے اراکین کو حلقوں کے مسائل ترجیحی بنیاد پر حل کرانے کی یقین دہانی کراتے ہوئے کہا کہ امن و امان کا قیام اور قانون کی حکمرانی حکومت کی اولین ترجیح ہے۔

پی ٹی آئی نے مشکل مالی حالات میں حکومتی باگ دوڑ سنبھالی۔ اس وقت ملک مشکل صورت حال سے گزررہا ہے لیکن آئندہ چھ ماہ میں واضح بہتری دیکھنے میں آئے گی۔

وزیر اعظم نے کہا کہ دوست ملکوں کی مدد سے ملکی معیشت کو سہارا دینا ہماری ترجیح تھی، عوام کو مشکلات سے ممکنہ حد تک ریلیف فراہم کرنا چاہتے ہیں، حکومت ایکسپورٹ انڈسٹری کو سہولتیں دینے کیلئے کام کررہی ہے، شہریوں کیلئے صحت، تعلیم اور دیگر سہولتوں کی فراہمی کی کوششیں جاری ہیں۔

وزیراعظم عمران خان نے کہا کہ50لاکھ گھروں کے منصوبوں سے لوگوں کو سہولت میسر آئے گی، معیشت کا پہیہ بھی چلے گا اور نوجوانوں کو روزگار بھی ملے گا، بے سہارا لوگوں کو شیلٹر اور دو وقت کھانا دینے کیلئے اقدامات کررہے ہیں۔

وزیر اعظم نے کہا کہ پی ٹی آئی حکومت اپنے منشور کو عملی جامہ پہنانے اور عوام سے کیے وعدے پورے کرنے کیلئے پرعزم ہے، حکومتی وزراء کی کارکردگی کا جائزہ لینے کی روایت اس ملک میں نہیں ہے، حکومتی وزراء اپنی کارکردگی کے حوالے سے جواب دہ ہیں، حکومتی وزراء کی کارکردگی کا باقاعدگی سے جائزہ لیا جائے گا، احتساب سے خائف عناصر شور کر رہےہیں۔