ماسکو: روس نے افغانستان میں غیر علاقائی عناصر کی بڑھتی شمولیت پر اظہارِ تشویش کیا ہے۔
غیر ملکی میڈیا رپورٹس کے مطابق افغانستان کی صورت حال پر روس کے شہر کازان میں ایک اجلاس منعقد ہوا، جس میں افغانستان میں غیر علاقائی عناصر کی بڑھتی شمولیت پر روس نے تشویش کا اظہار کیا۔ اجلاس میں روس، چین، پاکستان، ایران، بھارت اور افغانستان نے بھی شرکت کی۔
روسی نمائندہ خصوصی نے کہا کہ طالبان دہشت گرد گروہوں اور خاص طور داعش کا مقابلہ کرنے میں غیر مؤثر رہے ہیں، روسی نمائندے کا کہنا تھا کہ طالبان بھی افغانستان کے شدید اقتصادی مسائل کا حل تلاش کرنے میں ناکام رہے ہیں۔
دوسری طرف افغان وزیر خارجہ مولوی امیر خان متقی نے مطالبہ کیا کہ دیگر ممالک بھی چین کی طرح اپنے سفیر کابل بھیجیں۔
روسی حکام نے جمعہ کو کہا کہ انھوں نے علاقائی خطرات پر مذاکرات کے لیے طالبان کے نمائندوں کی میزبانی کی، صدر ولادیمیر پیوٹن کے خصوصی نمائندے برائے افغانستان ضمیر کابلوف نے کہا کہ روس آزادانہ طور پر اور ورلڈ فوڈ پروگرام کے ذریعے افغانستان کی مدد جاری رکھنے کا خواہاں ہے۔
