اسلام آباد: وزیر اعظم پاکستان شہباز شریف نے کہا ہے کہ گزشتہ حکومت میں روس سے تجارت کرنے پر جھوٹا پروپیگنڈہ کیا گیا تھا، آج روس سے تیل اور گندم آ رہی ہے۔
وزیر اعظم شہباز شریف نے اسلام آباد اور راولپنڈی میں مختلف ترقیاتی منصوبوں کے افتتاح کی تقریب سے خطاب کرتے ہوئے کہا روس سے تجارت کرنے پر جھوٹا پروپیگنڈہ کیا گیا تھا، آج روس سے تیل اور گندم آ رہی ہے، ہم نے اربوں روپے کی قیمتیں کم کروا کر گندم درآمد کی، روس سے جو تیل منگوایا ہے وہ عالمی مارکیٹ سے کم از کم 15 ڈالر پر بیرل سستا ہے۔
انھوں نے کہا تمام منصوبے مکمل کریں گے، بجلی سے چلنے والی بسیں بھی جولائی تک آئیں گی، معاشی مشکلات کے باوجود عام آدمی کو اس بجٹ میں ریلیف ملا ہے، اتحادی حکومت مل کر پاکستان کو مشکل سے نکالے گی۔
شہباز شریف کا کہنا تھا کہ جعلی خط لہرا کر ہماری آئینی حکومت کو بدنام کرنے کی کوشش کی گئی، چیئرمین پی ٹی آئی نے پاکستان کو بدنام کیا، انھوں نے کہا پچھلی حکومت نے آئی ایم سے معاہدہ توڑا، اور ہم دن رات اب معاہدے کی کوشش کر رہے ہیں، آئی ایم ایف کی شرائط بھی من و عن قبول کر لی ہیں۔
وزیر اعظم نے کہا چیئرمین پی ٹی آئی نے 4 سال پوری اپوزیشن کو دیوار سے لگایا، آج توشہ خانہ میں ان کے خلاف ثبوت ملے تو کہتے ہیں ہمیں دیوار سے لگایا جا رہا ہے، ہمیں 4 سال دیوار سے لگایا گیا تھا۔
انھوں نے کہا لاہور میں سالڈ ویسٹ کا نظام بنایا تھا، پچھلی حکومت نے اس کا بیڑا غرق کر دیا، اب اسلام آباد میں بھی لاہور طرز کا سالڈ ویسٹ سسٹم لا رہے ہیں۔
