کیف: یوکرین کے شہر خارکیف پر روسی ڈرون حملے میں 50 افراد زخمی جب کہ انفرا اسٹرکچر تباہ ہو گیا۔
روئٹرز کے مطابق روس نے جمعہ کو رات گئے یوکرین کے دوسرے بڑے شہر خارکیف پر ایک بڑا ڈرون حملہ کر دیا ہے، ایک ڈرون ایک بلند اپارٹمنٹ بلاک سے ٹکرایا جس سے عمارت میں آگ بھڑک اٹھی اور چھیالیس افراد زخمی ہو گئے۔
یہ حملہ ایسے وقت میں کیا گیا ہے جب یوکرین اور امریکا کے درمیان یوکرین میں معدنیات کی تلاش کے لیے ایک اہم معاہدہ طے پایا ہے۔
یوکرینی شہر خارکیف روسی سرحد کے قریب واقع ہے اور ماسکو کے حملے کے آغاز سے ہی مسلسل نشانہ بنتا آ رہا ہے، حالیہ ہفتوں میں روسی افواج کے یوکرینی شہری علاقوں پر بڑھتے ہوئے حملوں کے نتیجے میں درجنوں ہلاکتیں ہو چکی ہیں، باوجود اس کے کہ امریکا دونوں ممالک کے ساتھ بات چیت میں مصروف ہے۔
روس یوکرین جنگ میں شمالی کوریا کے سیکڑوں فوجیوں کی ہلاکت کا انکشاف
خارکیف کے میئر ایہور تیریخوف نے ٹیلی گرام میسجنگ ایپ پر لکھا کہ شہر کے 4 مرکزی اضلاع میں 12 مقامات پر حملے ہوئے ہیں، یوکرین کے صدر ولودیمیر زیلنسکی نے ڈرون حملوں کی مذمت کی۔ انھوں نے کہا کہ روس نے درجنوں ڈرونز لانچ کیے ہیں، وہ ہفتے میں کئی بار یوکرین کے شہروں کو نشانہ بناتا ہے، جب کہ یوکرین کے اتحادی ہماری کی فضائی دفاعی صلاحیت کو بڑھانے میں مدد کرنے میں بہت سست روی سے آگے بڑھ رہے ہیں۔
زیلنسکی نے ٹیلی گرام پر لکھا، ’’کوئی فوجی اہداف نہیں تھے، اور نہ ہی کوئی ہو سکتا ہے، روس مکانات پر حملہ کرتا ہے جب یوکرین کے باشندے اپنے گھروں میں ہوتے ہیں، جب وہ اپنے بچوں کو بستر پر سلا رہے ہوتے ہیں۔‘‘ انھوں مزید لکھا کہ جیسے جیسے دنیا فیصلوں میں تاخیر کرتی ہے، یوکرین میں تقریباً ہر رات ایک ہولناکی میں بدل جاتی ہے، جس کے نتیجے میں جانوں کا ضیاع ہوتا ہے۔
