Tag: رونالڈو

عالمی شہرت یافتہ فٹبالر کرسٹیانو رونالڈو کا ایک مداح اپنے ہیرو سے ملاقات لیے اتنا بے قرار ہوا کہ اس نے ملنے کیلیے انوکھا طریقہ اختیار کیا۔

دنیا بھر میں کھلاڑیوں، فنکاروں اور دیگر شعبوں سے تعلق رکھنے والی نامور شخصیات کے مداح ہوتے ہیں جو اپنی پسندیدہ شخصیت کی ایک جھلک دیکھنے کے لیے بعض اوقات انوکھے طریقے اختیار کرتے ہیں جیسا کہ رونالڈو کے ایک بھارتی نوجوان مداح نے اختیار کیا

پرتگال سے تعلق رکھنے والے عالمی شہرت یافتہ فٹبالر کرسٹیانو رونالڈو جو سعودی فٹبال کلب سے وابستگی کے باعث گزشتہ سال سے مملکت میں سکونت پذیر ہیں۔ ان کے مداح دنیا بھر میں موجود ہیں جو ان کی ایک جھلک دیکھنے کے لیے بے چین رہتے ہیں مگر ایک بھارتی نوجوان سیون کے پی نے اس کے لیے انوکھا راستہ اختیار کیا۔

عرب نیوز کے مطابق رونالڈو کے مداح سیون نے اپنے پسندیدہ فٹبالر سے ملاقات کے لیے دبئی سے ریاض تک 1200 کلومیٹر کا طویل فاصلہ پیدل طے کیا۔

نوجوان اس امید کے ساتھ کہ سعودی فٹبال کلب النصر کی قیادت کرنے والے اس کے پسندیدہ ہیرو سے ملاقات کا موقع مل جائے دبئی سے ریاض تک کا فاصلہ بنجر اور بیابان راستوں سے گزرتے ہوئے 36 دن میں طے کیا۔

بھارتی شہری جب سعودی دارالحکومت ریاض پہنچا تو الاول پارک جہاں النصر سرکاری سطح پر کھیلتی ہے وہاں پہنچ کر اس کی خوشی دیدنی تھی اور اس کا کہنا تھا کہ میں دبئی سے پیدل چل کر آیا ہوں اور یہ سارا راستہ صرف اس لیے طے کیا کہ دنیا کے بہترین کھلاڑی کے لیے عزت اور اپنی محبت کا اظہار کر سکوں۔

سیوِن کے پی نے اپنے جذبات کا اظہار کرتے ہوئے کہا ’بالآخر میں الاول پارک کے سامنے موجود ہوں جہاں النصر سرکاری سطح پر کھیلتی ہے اور میں امید کرتا ہوں کہ رونالڈو سے مل سکوں۔

بھارتی شہر کیرالا سے تعلق رکھنے والے نوجوان نے اسٹیدیم میں کھینچی ہوئی اپنی تصویر انسٹاگرام اکاؤنٹ پر پوسٹ کی، جس کے کیپشن میں لکھا کہ غیر متوقع لمحہ ہمیشہ زیادہ میٹھا ہوتا ہے اور مزید کے لیے پُر امید ہوں۔

سیون کے پی کو جمعے کے روز النصر اور الفیحا کے درمیان ہونے والا میچ اسٹیڈیم میں جا کر دیکھنے کا موقع ملا لیکن بدقسمتی سے ان کے ہیرو گیم کا حصہ نہیں تھے۔

نوجوان نے اپنی خواہش کا ظہار کرتے ہوئے کہا کہ اگر پرتگالی فٹبال اسٹار کا آٹو گراف اور ان کے ساتھ تصویر کھچوانے کا موقع مل جائے تو یہ  ان کی زندگی کا بہترین لمحہ ہوگا اور میری خدا سے دعا ہے کہ وہ میرا یہ خواب پورا کرے اور میں رونالڈو سے ملوں، اگر ایسا ہو گیا تو اس لمحے کی پوری زندگی قدر کروں گا۔