کرسٹیانو رونالڈو دنیائے فٹبال کے بہترین کھلاڑیوں میں اول نمبر پر فائز ہیں۔ فٹبال کے میدان میں اپنے گولز سے حریف ٹیم کو پریشان کردینے والے رونالڈو کے مداح دنیا بھر میں موجود ہیں۔

تاہم رونالڈو کی شہرت اور کامیابی ان کے ایک دوست کی مرہون منت ہے جو اگر ان پر احسان نہ کرتا تو رونالڈو کی قسمت کا ستارہ شاید کبھی نہ چمکتا۔

یہ ان دنوں کی بات ہے جب رونالڈو جونیئر ٹیم کے ساتھ کھیلتے تھے اور ابھی دنیا رونالڈو نامی کھلاڑی سے ناواقف تھی۔ رونالڈو کے بہترین دوست البرٹو فانتراؤ بھی ان کے ساتھ اسی ٹیم کا حصہ تھے۔

ایک میچ کے دوران پرتگال کے مشہور اسپورٹس کلب سپورٹنگ لزبن سے ایک اسکاؤٹ میچ دیکھنے پہنچے۔ انہوں نے کھلاڑیوں سے وعدہ کیا کہ جو بھی گول اسکور کرے گا اسے کلب کی اکیڈمی میں داخلہ ملے گا۔

اس میچ میں رونالڈو اور فانتراؤ دونوں ہی نے ایک ایک گول کیا۔ ایک موقع پر فانتراؤ آگے نکل گئے اور ان کے پاس گول کرنے کا نہایت آسان موقع تھا لیکن انہوں نے فٹبال رونالڈو کی جانب پھینک دیا جنہوں نے باآسانی گول کردیا۔

اس طرح میچ میں رونالڈو نے 2 گول کیے جس کے بعد انہیں پرتگال کی بہترین فٹبال اکیڈمی میں داخلہ مل گیا۔

رونالڈو نے بعد میں فانتراؤ سے پوچھا کہ انہوں نے ایسا کیوں کیا، تو فانتراؤ نے جواب دیا، ’تم مجھ سے بہتر ہو‘۔

اس کے تھوڑے ہی عرصے بعد فانتراؤ کا فٹبال کیریئر ختم ہوگیا اور وہ بے روزگار ہوگئے۔ دوسری جانب رونالڈو کو ایک کے بعد ایک مواقع ملتے گئے اور بہت جلد وہ دنیائے فٹبال کا روشن ستارہ بن کر چمکے۔

انہی دنوں ایک صحافی فانتراؤ کے بارے میں جاننے نکلا تو اسے علم ہوا کہ وہ ایک بڑے سے گھر میں رہتے ہیں جبکہ ان کے پاس اسپورٹس کار بھی ہے۔

صحافی نے ان سے سوال کیا کہ بے روزگار ہونے کے باوجود یہ سب آپ کے پاس کیسے آیا، تو فانتراؤ نے جواب دیا، ’یہ سب رونالڈو کی طرف سے تحفہ ہے‘۔

رونالڈو آج بھی بخوشی اس بات کو تسلیم کرتے ہیں کہ وہ اپنے اس دوست کے احسان مند ہیں جو  ٹیلنٹ میں ان کے جیسے ہی تھے۔

خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔