کراچی (10 اگست 2025): شہر قائد کو بجلی فراہم کرنے والے ادارے کے الیکٹرک نے اب صارفین کو فراہم کیے جانے والے نئے بل کی شکل متعارف کرا دی ہے۔
اے آر وائی نیوز کے مطابق ملک کے سب سے بڑے شہر کراچی کو بجلی فراہم کرنے والے ادارے کراچی الیکٹرک (کے الیکٹرک) نے گزشتہ دنوں بجلی کے بل میں تبدیلی کا اعلان کیا تھا۔ اب اس بل کی نئی شکل کی رونمائی بھی کرا دی گئی ہے۔
ترجمان کے الیکٹرک کے مطابق ادارے نے بجلی کے بل کی نئی شکل متعارف کرا دی ہے۔ بل میں کوئی ٹیرف یا سلیب تبدیل نہیں کیا گیا ہے۔
ترجمان کا کہنا ہے کے نیابل کے الیکٹرک کے ماحول دوست عزم کی ایک اور عملی کاوش ہے۔ نیا لے آؤٹ صارف دوست ہے۔ جس میں حسابات اور معلومات کو یکجا کر دیا گیا ہے۔
صارفین کے الیکٹرک کی ویب سائٹ پر نئے لے آؤٹ کی تفصیلات دیکھ سکتے ہیں۔
نئے بجلی بل کا اگلا حصہ
نئے بجلی بل کا پچھلا حصہ
واضح رہے کہ اس سے قبل کے الیکٹرک نے تین سال قبل 2022 میں بجلی کے بل میں تبدیلی کی تھی اور بل کے حجم کم کرتے ہوئے چھوٹے سائز کا ہرے رنگ کا بل متعارف کرایا تھا۔
اس وقت کے الیکٹرک کی جانب سے جاری بیان میں کہا گیا تھا کہ بجلی کے بل کے سائز میں تبدیلی کا مؤثر اقدام لگ بھگ 92 ٹن کاغذ پر مبنی کچرے کو کراچی کی لینڈ فلز سائٹ میں جانے بچانے کے ساتھ ساتھ 4200 سے زائد درختوں کو محفوظ بنائے گا اور سالانہ بنیادوں پر 265 ملین لیٹر پانی کی بچت کو بھی یقینی بنائے گا۔
کے الیکٹرک کا تعارف
کے الیکٹرک (کے ای) ایک پبلک لسٹڈ کمپنی ہے۔ 1913ء میں بنی کمپنی کی پاکستان میں شمولیت کے ای ایس ای کے نام سے ہوئی۔ کے ای پاکستان کی واحد عمودی طور پر مربوط یوٹیلیٹی ہے جو کراچی اور اُس کے ملحقہ علاقوں سمیت 6500 مربع کلومیٹر علاقے کو بجلی فراہم کرتی ہے۔
