کراچی رکشا ایسوسی ایشن نے شہر میں چنگچی رکشے پر پابندی کے خلاف کراچی پریس کلب پر احتجاجی کیمپ قائم کر دیا ہے اور دھرنا دے کر بیٹھ گئے ہیں۔
کراچی رکشا ایسوسی ایشن کے صدر سید عمران زیدی نے کمشنر کراچی کی جانب سے شہر کی 20 شاہراہوں پر چنگ چی رکشے پر پابندی کا نوٹیفکیشن واپس لینے کا مطالبہ کیا اور کہا کہ نوٹیفیکیشن واپس نہیں لیا گیا تو شہر کی تمام سڑکوں پر رکشوں سمیت دھرنا دیں گے۔
رکشا ڈرائیورز کا کہنا تھا کہ ٹریفک پولیس اہلکار ان شاہراہوں پر بھی چالان کرنے لگے ہی، جہاں رکشہ چلانے پر پابندی نہیں ہے۔ ایک طرف عوام پریشان تو دوسری طرف اس کاروبار سے وابستہ افراد معاشی مسائل سے دوچار ہو گئے ہیں۔
کراچی کی 11 مرکزی سڑکوں پر پابندی کے باوجود رکشے کیوں رواں دواں ہیں؟ ویڈیو رپورٹ
ایسوسی ایشن کے رہنماوٴں نے کہا کہ ان کے رکشے سندھ حکومت اور محکمہ ٹرانسپورٹ سے منظور شدہ ہیں، اس لیے 144 کے تحت شہر میں رکشے کو چلنے سے روکا نہیں جا سکتا۔ کمشنر کراچی کی پابندی سے رکشا ڈرائیوروں کے گھروں کے چولھے ٹھنڈے پڑ گئے ہیں۔
