کراچی: شہر قائد میں پولیس کی ایک اور رکشہ گینگ سے مڈبھیڑ ہو گئی ہے، جس میں فائرنگ کے تبادلے کے دوران ایک اہل کار کے بازو میں گولی لگ گئی اور وہ شدید زخمی ہو گیا۔
تفصیلات کے مطابق کراچی کے علاقے شیریں جناح کالونی میں عمر شریف پارک کے قریب مبینہ پولیس مقابلہ ہوا، جس میں رکشہ گینگ کے ملزمان کی فائرنگ سے پولیس اہل کار دیدار زخمی ہو گیا۔
شیریں جناح کالونی کے قریب پولیس مقابلے میں کلفٹن پولیس نے فائرنگ کے تبادلے کے بعد 2 ملزمان کو گرفتار بھی کر لیا ہے، جب کہ ایک ملزم فرار ہونے میں کامیاب ہو گیا۔
زخمی ہونے والے پولیس اہل کار دیدار کے دائیں بازو میں کہنی کے پاس گولی لگی جو اندر پھنس گئی، پولیس اہل کار کو فوری طور پر اسپتال منتقل کیا گیا جہاں ان کے بازو سے گولی نکالی گئی، اس سلسلے میں سامنے آنے والی تصویر میں دیکھا جا سکتا ہے کہ گولی سے بازو میں واضح سوراخ بن گیا ہے۔
ایس ایس پی ساؤتھ نے بتایا کہ پولیس نے مشکوک رکشے کو روکنے کی کوشش کی تھی تاہم رکشے میں سوار ملزمان پولیس کو دیکھ کر فرار ہو گئے، ملزمان نے عمر شریف پارک کے قریب رکشہ چھوڑا اور قریب خالی پلاٹ میں گھس گئے۔
رکشہ گینگ سے جڑے 2 انتہائی مطلوب ملزمان فوٹیج کی مدد سے گرفتار
ایس ایس پی ساؤتھ کے مطابق پولیس جیسے ہی خالی پلاٹ میں اندر داخل ہوئی ملزمان نے فائرنگ کر دی، جس کے بعد پولیس نے جوابی فائرنگ کی، اور دو ملزمان کو حراست میں لے لیا۔
گرفتار ملزمان کے قبضے سے 2 پستول، ایک بیٹری اور ایک رکشہ برآمد ہوئے ہیں، پولیس فرار ہونے والے ملزم کو تلاش کر رہی ہے۔
یاد رہے کہ گزشتہ روز کراچی ماڈل تھانہ فیروزآباد نے ایک کارروائی میں دو انتہائی مطلوب ملزمان کو گرفتار کیا تھا، ملزمان کا تعلق رکشہ گینگ سے تھا۔
