کراچی: شہر قائد کے سپر ہائی وے ایریا میں ایک تیز رفتار ٹریلر نے سواری کے انتظار میں کھڑے رکشے کو کچل دیا جس سے رکشہ ڈرائیور جاں بحق ہو گیا۔

تفصیلات کے مطابق سپر ہائی وے بس ٹرمنل کے قریب ایک ٹریلر کی ٹکر سے رکشہ ڈرائیور جاں بحق ہو گیا، رکشہ پنجاب بس اڈہ کے قریب سواری کے انتظار میں کھڑا تھا۔

اس افسوس ناک حادثے میں رکشہ ڈرائیور موقع ہی پر جاں بحق ہو گیا تھا، پولیس نے ٹریلر ضبط کر لیا، اور ٹریلر ڈرائیور کو بھی گرفتار کر لیا گیا ہے، جس کے خلاف مقدمہ درج کر لیا گیا ہے، مقدمہ قتل خطا اور غفلت سے ڈرائیونگ کی دفعات کے تحت درج کیا گیا ہے۔

پولیس حکام کا کہنا ہے کہ رکشہ ڈرائیور کی لاش ورثا کے سپرد کر دی گئی ہے، متوفی رکشہ ڈرائیور کی شناخت قطب الدین کے نام سے ہوئی ہے، متوفی بس اڈے کے قریب سڑک کنارے سواری کے انتظار میں تھا کہ تیز رفتار ٹریلر آ کر چڑھ دوڑا۔

کراچی میں ڈمپر نے باپ بیٹے سمیت 3 افراد کی جان لے لی

کراچی میں ہیوی گاڑیوں کے حادثات نہیں رک سکے ہیں، گزشتہ روز بھی ایک اور افسوس ناک حادثے میں ایک خاندان کی زندگی کا چراغ گل ہو گیا تھا، یہ واقعہ سرجانی ٹاؤن میں ناردرن بائی پاس پر پیش آیا تھا، جس میں ایک ڈمپر نے کار کو ٹکر مار دی تھی۔

ریسکیو حکام کے مطابق اس حادثے میں کار سوار باپ بیٹے سمیت 3 افراد جاں بحق ہوئے تھے، جاں بحق افراد منگھوپیر کے علاقے گل محمد قلندرانی گوٹھ کے رہائشی تھے۔ 9 مئی کو بھی کراچی میں ہیوی ٹریفک نے ایک فیملی کو اجاڑ دیا تھا، جب ایک ٹرک نے موٹر سائیکل سوار باپ بیٹے کو کچل دیا تھا۔ یہ حادثہ اورنگی 15 نمبر میں تیز رفتار ٹرک کی ٹکر سے پیش آیا تھا۔

کراچی : ناظم آباد میں جہیز کا سامان لوٹنے والے رکشہ ڈرائیور کے بھائی کو گرفتار کرکے لوٹا ہوا جہیز کا کچھ سامان برآمد کرلیا۔

تفصیلات کے مطابق کراچی کے علاقے ناظم آباد میں جہیز کا سامان لوٹنے والے رکشہ ڈرائیور کے بھائی کو گرفتار کرلیا گیا۔

ایس ایس پی سینٹرل شفیق صدیقی نے بتایا کہ ملزم شہزاد سے لوٹا ہوا جہیز کا کچھ سامان برآمد کرلیا ہے ، جس میں جگ گلاس سیٹ، ڈائننگ اسپون سیٹ اور کولر شامل ہیں۔

ذیشان شفیق صدیقی کا کہنا تھا کہ فرارملزم وقاس نے گزشتہ روز2خواتین کولوٹاتھا، رکشہ چلانےوالافرارملزم وقاص عادی مجرم ہے۔

ایس ایس پی سینٹرل نے کہا ملزم رکشہ میں سواریوں کو بٹھا کر پہلے بھی لوٹ مار کر چکا ہے جبکہ ملزم وقاص اس سے قبل گرفتار ہوچکا ہے۔

مزید پڑھیں : کراچی میں ڈاکو رکشہ ڈرائیور بن کر وارداتیں کرنے لگے

گذشتہ روز کراچی کے علاقے ناظم آباد نمبر چار پر ایک سفید پوش فیملی سے جہیز کا سامان لوٹ لیا تھا، واردات کرنے والے رکشہ ڈرائیور کی ویڈیو بھی سامنے آئی تھی، جس میں رکشہ ڈرائیور کو سی سی ٹی وی کیمرے سے بچنے کی کوشش کرتا رہا۔

اہلخانہ کا کہنا تھا کہ اس کی بہن کی اس ماہ کے آخر میں شادی ہے جس کے لیے والدہ اور خالہ جہیز کا سامان خریدنے لیاقت آباد مارکیٹ گئی تھی۔

اہلخانہ کا کہنا تھا کہ والدہ نے ایک لاکھ سے زائد مالیت کے برتن اور دیگر سامان خریدا جسے اورنگی ٹاون میں گھر لے جانا تھا، مارکیٹ میں موجود رکشے والے سے کرایہ طے کیا، کچھ سامان رکشے کے اندر باقی چھت پر رسی سے باندھا، رکشے پر سامان لوڈ کرکے ناظم آباد چار نمبر پر پہنچے تھے کہ اچانک رکشے والے رکشہ روک کر والدہ اور خالہ کو زبردستی اتارا اور سامان لے کر فرار ہوگیا تھا۔

کراچی : شہر قائد میں وارداتیں کرنے والے رکشہ گینگ کو گرفتار کرلیا گیا، گینگ شہرِ کے مختلف علاقوں میں سرگرم تھا۔

تفصیلات کے مطابق کراچی میں ڈاکوؤں نے رکشہ ڈرائیور بن کر وارداتیں شروع کر دی ہیں، ایسے ہی ایک تین رکنی گروہ کو پولیس نے گرفتار کر لیا۔

پولیس نے بتایا کہ رکشہ گینگ کے کارندوں کو جمشید کوارٹرز سے گرفتار کیا گیا، گینگ شہرِ کے مختلف علاقوں میں سرگرم تھا۔

حکام نے کہا کہ ملزمان شہریوں کو رکشہ میں بیٹھا کر اسلحہ کے زور پر لوٹ مار کرتے تھے۔

گرفتار ملزمان کے قبضے سے وارداتوں میں استعمال ہونے والے تین پستول اور رقم برآمد کرلی گئی جبکہ ملزمان کے زیرِ استعمال رکشہ بھی پکڑا گیا۔

ملزمان نے کچھ عرصہ قبل شہری کو رکشے میں بیٹھا کر تین لاکھ ستر روپے لوٹے تھے، گرفتار ملزمان میں معشوق علی، سجاد حسین اور محمد علی شامل ہیں۔

ملزمان اس سے قبل بھی تھانہ رضویہ، ناظم آباد اور آرام باغ سے گرفتار ہوکر جیل جا چکے ہیں۔