کراچی : شہریوں سے لوٹ مار کرنے والے رکشہ گینگ کے سرغنہ سمیت انتہائی مطلوب 4 ملزمان کو گرفتار کرلیا گیا۔
تفصیلات کے مطابق کراچی میں شاہ لطیف ٹاؤن پولیس کی بڑی کارروائی کرتے ہوئے رکشہ گینگ سرغنہ سمیت انتہائی مطلوب 4 ملزمان کو گرفتار کرلیا۔
ایس ایس پی ملیر کاشف عباسی نے بتایا کہ ملزمان سے 2 پستول ، 5 موبائل فونز اور رکشہ برآمد ہوا ہے، ملزمان میں سرغنہ رحیم بخش، صابر، عاشق اور آصف شامل ہیں۔
کاشف عباسی کا کہنا تھا کہ ملزمان کا ساتھی آصف مختلف مقامات سے سواریاں اٹھاتا تھا اور مسافر کے پاس کیش اور قیمتی سامان کی اطلاع گینگ سرغنہ کو کورڈ ورڈ میں دیتا تھا۔
ایس ایس پی ملیر نے بتایا کہ ملزم رحیم بخش 18 سال سے زائد جیل میں سزا کاٹ کر آیا ہے جبکہ ملزم نے ساتھی کے ساتھ عدالت سے فرار ہوتے وقت پولیس اہلکار کو شہید کیا تھا۔
حکام کا کہنا تھا کہ ملزم زخمی حالت میں گرفتار ہوا تھا اور جیل سے باہر آتے ہی نیا گینگ تشکیل دیا تھا۔
کاشف عباسی نے مزید بتایا تھا کہ ملزم رحیم بخش کو پولیس نے 70 لاکھ کی ڈکیتی میں 1998 میں گرفتار کیا تھا تاہم ملزمان کا مزید کرمنل ریکارڈ کیلئے تمام ڈسٹرکٹ سے رابطہ کررہے ہیں، ملزمان کیخلاف مقدمہ درج کر کے مزید تفتیش کا آغاز کر دیا گیا ہے۔
