ARYNews.tv | Urdu – Har Lamha Bakhabar

Tag: ریاست بہار

  • زہریلی شراب پینے سے 39 بھارتی شہری ہلاک

    زہریلی شراب پینے سے 39 بھارتی شہری ہلاک

    بھارت کی ریاست بہار میں زہریلی شراب پینے سے 39 افراد ہلاک ہوگئے۔

    بھارتی میڈیا رپورٹ کے مطابق ریاست بہار کے ضلع سارن میں گزشتہ روز شراب پینے سے متعدد افراد کی حالت خراب ہوئی جس کے بعد انہیں اسپتال منتقل کیا گیا۔

    بھارتی میڈیا نے نے بتایا کہ 3 افراد اسپتال جاتے ہوئے راستے میں ہی دم توڑ گئے جب کہ دیگر اموات کل اور آج ہوئی ہے۔

    میڈیا رپورٹس کے مطابق واقعے کے بعد پولیس نے شراب کی غیر قانونی دکانوں کے خلاف کریک ڈاؤن کرتے ہوئے کئی افراد کو گرفتار کرلیا۔

    انٹرنیشنل اسپرٹس اینڈ وائن ایسوسی ایشن آف انڈیا کے مطابق بھارت ہر سال تقریباً پانچ بلین لیٹر شراب پی جاتی ہے، جس میں سے تقریباً 40 فیصد غیر قانونی طور پر تیار کی جاتی ہے۔

    اس سے قبل جولائی میں مغربی ریاست گجرات میں شراب پینے سے 42 افراد ہلاک ہو گئے تھے، اور گزشتہ سال بھی اسی طرح کے ایک واقعے میں شمالی ریاست پنجاب میں تقریباً 100 افراد ہلاک ہو گئے تھے۔

     

  • بڑا نقصان، کرونا ٹیسٹ کے لیے جمع سیکڑوں سیمپلز بارش کے پانی میں بہہ گئے

    بڑا نقصان، کرونا ٹیسٹ کے لیے جمع سیکڑوں سیمپلز بارش کے پانی میں بہہ گئے

    بہار: بھارتی ریاست بہار کے ایک اسپتال میں کو وِڈ 19 کے ٹیسٹ کے لیے جمع کیے گئے سیکڑوں سیمپلز بارش کے پانی میں بہہ گئے۔

    بھارتی میڈیا کے مطابق بہار کے ضلع آرا میں صدر اسپتال میں بارش کی وجہ سے پانی بھرنے کے باعث کرونا کی جانچ کے لیے جمع شدہ سیکڑوں سیمپل ضایع ہو گئے۔

    اسپتال میں موجود تقریباً 300 سیمپلز 5 اور 6 جولائی کو لائے گئے تھے، تاہم ضلع میں لگاتار بارشوں کے باعث صدر اسپتال میں پانی بھر گیا تھا، اسپتال انتظامیہ نے سیمپلز کی حفاظت کی خاطر انھیں آئس باکس میں رکھ دیا تھا۔

    بھارت میں لاپرواہی کی بدترین مثال، کرونا مریض کی لاش کسی اور خاندان کے حوالے

    بارش کی وجہ سے اسپتال کے اندر میڈیکل، سرجیکل وارڈ اور او پی ڈی کے سامنے ایک فٹ پانی کھڑا ہو گیا تھا، جسے پمپ لگا کر باہر نکالا گیا، تاہم پانی نکالے جانے کے بعد معلوم ہوا کہ کو وِڈ نائنٹین کے لیے لائے گئے سیمپل پانی میں بہہ چکے ہیں۔

    اسپتال میں پانی بھرنے سے مریضوں اور تیمارداروں کو بھی شدید پریشانی کا سامنا کرنا پڑا۔

    واضح رہے کہ ریاست بہار میں کرونا وائرس کی وبا تیزی سے پھیلتی جا رہی ہے، دن بہ دن ریاست میں کرونا کیسز بڑھتے جا رہے ہیں، اب تک بہار میں کرونا کے 14 ہزار 575 کیسز کی تصدیق کی جا چکی ہے، وائرس انفیکشن سے 119 مریض ہلاک بھی ہو چکے ہیں۔

  • نیپال سرحدی فورس کے ہاتھوں بھارتی شہری ہلاک، تین زخمی

    نیپال سرحدی فورس کے ہاتھوں بھارتی شہری ہلاک، تین زخمی

    بہار: نیپال سرحدی فورس کے ہاتھوں ایک بھارتی شہری ہلاک جب کہ 3 زخمی ہو گئے۔

    غیر ملکی میڈیا کے مطابق ایک بھارتی شہری کی ہلاکت اور تین زخمی ہونے کا یہ واقعہ نیپال کی سرحد سے جڑی بھارتی ریاست بہار کے ضلع سیتامڑھی میں آج صبح پیش آیا۔

    یہ معلوم نہیں ہو سکا کہ بھارتی شہریوں پر فائرنگ کیوں کی گئی، تاہم واقعے کی تحقیقات کی جا رہی ہیں، اس سلسلے میں سرحدی فورس کے افسران کی ایک میٹنگ بھی طلب کی گئی ہے۔

    بھارتی میڈیا کے مطابق یہ واقعہ ایک ایسے وقت میں پیش آیا ہے جب انڈیا اور نیپال کے درمیان کالاپانی ریجن پر قبضے کے تنازعات چل رہے ہیں، بھارت نے اپنے نقشے میں درہ لیپولیک، درہ لمپیادھورا اور کالا پانی کو اپنے علاقے بتایا ہے۔

    بھارت کو ایک اور جھٹکا : نیپالی پارلیمنٹ نے نیا نقشہ منظور کرلیا

    دوسری طرف نیپال بھی ان علاقوں پر ملکیت کا دعویٰ کرتا ہے اور اپنے سیاسی نقشے میں انھیں شامل کیا ہے، جس پر دونوں ممالک میں سیاسی اور سفارتی تناؤ پیدا ہو چکا ہے۔ یاد رہے کہ کچھ عرصہ قبل نیپال کے وزیر اعظم نے نیا نقشہ جاری کیا تھا جس میں مذکورہ علاقے بھی نیپال میں شامل کیے گئے تھے، اب نیپالی پارلیمنٹ نے یہ نقشہ منظور بھی کر لیا ہے۔

    دونوں ممالک کے درمیان اس تنازعے کے بعد متعدد بار سرحدی جھڑپیں بھی ہوئی ہیں، جس پر نیپال کے نائب وزیر اعظم کو بھارت کو دھمکی دینی پڑی کہ وہ باز نہ آیا تو نیپال کی فوج لڑنے سے بھی پیچھے نہیں ہٹے گی۔

  • امتحان گاہ میں جوتے اور موزے پہن کر داخلے پر پابندی عائد

    امتحان گاہ میں جوتے اور موزے پہن کر داخلے پر پابندی عائد

    نئی دہلی: بھارت کی شمال مشرقی ریاست بہار میں شروع ہونے والے میٹرک کے امتحانات میں طالب علموں کو جوتے اور موزے پہن کر امتحان گاہ میں داخلے پر پابندی ہوگی۔

    تفصیلات کے مطابق امتحانات میں کھلے عام نقل اور اس کی تصاویر سوشل میڈیا پر وائرل ہونے کے سبب بورڈ امتحانات کمیٹی نے طلبہ کے جوتے اور موزے پہن کر امتحان گاہ میں آنے پر پابندی عائد کردی ہے، تاکہ نقل کے بڑھتے ہوئے رجحان پر قابو پایا جاسکے۔

    بھارت:‌ اہلیہ کو نقل کروانے والا پولیس اہلکار نوکری سے برطرف

    ریاستی حکومت کا کہنا ہے کہ امتحانات میں ہونے والے نقل کی روک تھام کو بڑی سنجیدگی سے لے رہے ہیں، اس کا اندازہ اس بات سے لگایا جا سکتا ہے کہ مذکورہ اقدام کے لیے ریاست کے تمام 38 اضلاع کی پولیس انتظامیہ اپنے پیشہ ورانہ خدمات سر انجام دیں گے۔

    بورڈ امتحانات کمیٹی کے مطابق پرچے کے لیے آئے طالب علموں کو سینڈل اور سلیپرز میں ہی امتحان ہال میں داخل ہونے کی اجازت دی جائے گی، جبکہ سارے مراکز کے صدر کو عام فون خریدنے کے لیے 1200 روپے دینے کا فیصلہ کیا ہے، اس کے علاوہ بچوں پر نظر رکھنے کے لیے سی سی ٹی وی کیمرے اور تمام امتحانات کی ویڈیو گرافی کا منصوبہ بھی بنایا گیا ہے۔

    بھارت ایشیاء کا کرپٹ ترین ملک قرار

    خیال رہے رواں سال ریاست بہار میں 17 لاکھ 70 ہزار طلبہ دسویں کے امتحانات میں شامل ہورہے ہیں جو بدھ سے شروع ہوکر نو دن تک جاری رہیں گے۔

    یاد رہے ماضی میں امتحانات میں کھلے عام نقل کی تصاویر سوشل میڈیا پر وائرل ہونے سے بھارت کی دنیا بھر میں بدنامی ہوئی تھی، کرپشن اور اثر و رسوخ کے بل بوتے پر بورڈ امتحانات میں غلط طریقے سے پوزیشن حاصل کرنے اور امتحان سے پہلے سوالات لیک ہو جانے کا معاملہ بھی مقامی میڈیا میں شہ سرخیوں میں رہا تھا۔

    خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہنچانے کےلیے سوشل میڈیا پرشیئر کریں۔