ریاض: سعودی حکام نے وضاحت پیش کی ہے کہ آجر کی منظوری کے بغیر کن صورتوں میں گھریلو ملازم کا نقل کفالہ ممکن ہوسکتا ہے۔
سعودی ویب سائٹ کے مطابق سعودی وزارت افرادی قوت و سماجی بہبود نے گھریلو ملازمین کے نقل کفالہ کی مشروط اجازت دی ہے۔
وزارت افرادی قوت نے کہا ہے کہ گھریلو کارکن کسی اور آجر کے نام نقل کفالہ کروا سکتے ہیں اس کے لیے موجودہ آجر کی منظوری ضروری نہیں۔
وزارت افرادی قوت نے گھریلو عملے کے لیے آزمائشی مرحلے اور نئے آجر کی جانب سے پیش کش کے ضوابط بھی مقرر کیے ہیں، وزارت ملازمت کا معاہدہ مکمل ہونے پر گھریلو کارکن کو خروج نہائی (فائنل ایگزٹ) کی کارروائی کا موقع مہیا کرے گی۔
بیان میں کہا گیا کہ گھریلو کارکن اور وہ اجیر جو گھریلو کارکن کے دائرے میں آتے ہوں انہیں کسی اور کے یہاں نقل کفالہ کی اجازت ہے، اس کے لیے بعض صورتوں میں موجودہ آجر کی منظوری ضروری نہیں۔
اگر مسلسل 3 ماہ یا کل ملا کر 3 ماہ تک گھریلو کارکن کے کفیل نے تنخواہ نہ دی ہو اور اس کا ذمے دار گھریلو کارکن نہ ہو تو اس صورت میں نقل کفالہ کی اجازت ہوگی۔
اس صورت میں بھی نقل کفالہ کروایا جا سکتا ہے کہ اگر گھریلو ملازمہ باہر سے آئی ہو اور اس کے اسپانسر نے ریکروٹنگ ایجنسی یا اسے پناہ دینے والے ادارے سے اطلاع کے بعد پندرہ روز کے اندر اپنے یہاں نہ بلایا ہو۔
ایک صورت یہ ہے کہ گھریلو ملازمہ کے آجر نے ملازمہ کا اقامہ نہ بنوایا ہو یا اقامے کی تاریخ ختم ہونے پر 30 روز گزر چکے ہوں اور اقامے کی توسیع نہ کروائی ہو، گھریلو کارکن کے آجر نے ملازم یا ملازمہ کو محنتانے پر کسی اور کے حوالے کردیا ہو۔
ڈرائیور ویزے کی نئی شرط
گھریلو کارکن کے ساتھ آجر یا اس کے خاندان کے کسی فرد نے برا سلوک کیا ہو، گھریلو ملازم نے اپنے آجر کے خلاف شکایت درج کروائی ہو اور شکایت کے فیصلے میں تاخیر کا ذمے دار اس کا آجر ہو اور گھریلو ملازم شکایت نمٹانے میں تاخیر کا ذمے دار نہ ہو۔
گھریلو کارکن کے آجر نے گھریلو کارکن کے خلاف ہروب کی غلط رپورٹ درج کروائی ہو، گھریلو کارکن کا آجر یا اس کا نمائندہ شکایت کیس کی تاریخ پر متعلقہ کمیٹی کے سامنے پیش نہ ہوا ہو اور 2 تاریخوں پر غیر حاضر رہ چکا ہو۔
شکایت کی سماعت کے دوران متعلقہ ادارے نے سفارش کی ہو کہ اگر نقل کفالہ نہ ہوا تو ایسی صورت میں گھریلو ملازم ممکنہ مسائل سے دو چار ہوسکتا ہے، اگر گھریلو ملازم کا آجر سفر یا قید ہوجانے یا کسی اور وجہ سے غیر حاضر ہو اور اس وجہ سے وہ گھریلو ملازم کا محنتانہ ادا نہ کر پا رہا ہو۔
ایسی تمام صورتوں گھریلو ملازم کا نقل کفالہ دوسرے آجر کے یہاں پہلے آجر کی لا علمی میں ہوسکتا ہے، گھریلو ملازم کے آجر نے آزمائشی مرحلے میں ملازمت کا معاہدہ ختم کردیا ہو۔
