Tag: ریاض

ریاض: سعودی عرب کے 80 سالہ شہری نے اس عمر میں ہائیکنگ کر کے اور پہاڑوں کی چوتیاں سر کر کے ثابت کردیا کہ عمر شوق کی راہ میں رکاوٹ نہیں۔

اردو نیوز کے مطابق سعودی عرب کے 80 سالہ شہری اور سابق سفارت کار عبداللہ القویز نے ہائیکنگ کے میدان میں نئی نسل کو چیلنج دیا ہے، اپنے عزم و ہمت کی وجہ سے وہ آج بھی خود کو نوجوانوں سے زیادہ مضبوط اور توانا ثابت کرنے کی کوشش کر رہے ہیں۔

ڈاکٹر عبد اللہ القویز نے مہم جو کی حیثیت سے چیلنج بک میں اپنا نام ریکارڈ کروایا ہے، انہیں ہائیکنگ کا جنون ہے اور اب بھی وہ پہاڑوں کی چوٹیاں سر کرنے کی مہم میں لگے رہتے ہیں۔

انہوں نے پوری دنیا کو پیغام دیا ہے کہ عمر انسان کی خواہش کی تکمیل کی راہ میں کوئی رکاوٹ نہیں، عمر محض ایک ہندسہ ہے۔

معمرسعودی شہری کا کہنا ہے کہ اپنی پوری زندگی دنیا کی سیاحت، پہاڑی چوٹیاں سر کرنے اور قدرتی مناظر سے لطف اندوز ہونے میں گزاری۔

عبداللہ القویز کا کہنا تھا کہ تعلیم کے ابتدائی دور میں فٹ بال کا شوق تھا تاہم کسی ٹیم نے شامل نہیں کیا جس کے بعد فٹ بال کے شوق کو ہمیشہ کے لیے خیر باد کہہ دیا۔

ڈاکٹر عبد اللہ القویز کہتے ہیں کہ گزشتہ صدی کے چھٹے عشرے کے اواخر میں امریکا جانا ہوا تو محسوس کیا کہ جب بھی گھر والوں کے ہمراہ شاپنگ سینٹر جاتا ہوں تھکاوٹ محسوس کرتا ہوں۔ پیروں اور کمر میں درد ہونے لگتا ہے۔

اسی دوران جوتوں کے ایک دکاندار نے میرے پیر دیکھ کر کہا کہ آپ کے فلیٹ فٹ ہیں، اس نے میرے جوتے میں اضافی سول لگایا۔ جس کے بعد مجھے چلنے پھرنے میں آسانی ہوئی۔

انہوں نے بتایا کہ ایک بار سوئٹزر لینڈ میں اپنے کویتی دوست کے آمادہ کرنے پر پہلی مرتبہ ہائیکنگ کی تو جسم درد سے اکڑ گیا، ایک ہفتہ یہی حال رہا۔ پھر علاج کے بعد ہا‎‎ئیکنگ کو میں نے اپنی زندگی کا حصہ بنا لیا اور اب تک یہ شوق جاری ہے۔

ڈاکٹر عبداللہ القویز کا مزید کہنا تھا کہ یہ ایک کم لاگت کا شوق ہے، اس کے لیے آپ کو کسی کلب کی ممبر شپ اختیار کرنے اور سالانہ فیس کی ضرورت نہیں۔