Tag: ریاض

ریاض: سعودی حکام نے وضاحت کی ہے کہ کرونا وائرس ویکسین کے دونوں انجیکشن لگوانے والے ہی وائرس سے محفوظ سمجھے جائیں گے۔

سعودی ویب سائٹ کے مطابق توکلنا ایپ کی انتظامیہ کا کہنا ہے کہ جو لوگ کرونا ویکسین کے دونوں انجیکشن لگوالیں گے انہیں ایپ میں محفوظ کیٹگری میں دکھایا جائے گا۔

توکلنا ایپ سے ایک شخص نے استفسار کیا تھا کہ اس نے پہلا انجیکشن لگوا لیا ہے مگر ابھی تک ایپ میں اسے محفوظ کیٹگری میں شامل نہیں کیا گیا، اس کی کیا وجہ ہے۔

ایپ انتظامیہ نے جواب دیتے ہوئے کہا کہ دونوں انجیکشن لگوانے کے بعد ایپ میں صارف کو محفوظ کیٹگری میں شامل کیا جائے گا۔

خیال رہے کہ توکلنا ایپ میں صارفین کی مختلف کیٹگریز ہیں، جن لوگوں کو کرونا وائرس نہیں ہوا انہیں گرین کیٹگری میں رکھا گیا ہے۔

ویکسین کا کورس مکمل کرنے والوں کو محفوظ کیٹگری میں شامل کیا جارہا ہے جس کا رنگ گہرا سبز ہے، اس کا مطلب یہ ہے کہ صارف ویکسین لگوا کر وائرس سے محفوظ ہوگیا ہے۔

ریاض: سعودی عرب میں کرونا وائرس ویکسین لگوانے والے شہری حکام کے نہایت شکر گزار ہیں، شہریوں کا کہنا ہے کہ ویکسی نیشن کا عمل نہایت سہولت سے انجام پایا۔

سعودی ویب سائٹ کے مطابق الجوف ریجن میں کرونا ویکسین لینے کے بعد ایک خاتون نے اپنے اطمینان کا اظہار کرتے ہوئے سعودی قیادت اور وزارت صحت کا خصوصی شکریہ ادا کیا۔

سکاکا شہر کے ویکسی نیشن سینٹر میں موجود لوگوں کا کہنا ہے کہ سعودی عرب کی اعلیٰ قیادت نے کرونا وائرس سے تحفظ فراہم کرنے کے لیے مثالی خدمات انجام دی ہیں۔

کرونا کی ویکسین لینے والی ایک خاتون نے اپنے تاثرات بیان کرتے ہوئے کہا کہ حقیقت یہ ہے کہ جب میں ویکسین لینے کے لیے آرہی تھی تو بہت خوفزدہ تھی لیکن جب ویکسی نیشن سینٹر میں داخل ہوئی اور یہاں کا ماحول دیکھا تو میرا خوف ختم ہوگیا۔

اس سے ملتے جلتے خیالات دیگر افراد کے بھی تھے، لوگوں کا کہنا تھا کہ وزارت صحت کی جانب سے جس طرح کے انتظامات کیے گئے ہیں وہ مثالی ہیں خاص کر ویکسین لینے کے لیے پیشگی وقت لینے کا سسٹم بہت بہترین ہے۔

ایک اور خاتون کا کہنا تھا کہ کرونا ویکسین لینے سے قبل جو نفسیاتی طور پر ایک الجھن تھی وہ ختم ہوگئی جبکہ سینٹر میں کام کرنے والوں کی جانب سے جب ویکسین کی اہمیت و افادیت کے بارے میں معلوم ہوا تو جو تھوڑی بہت پریشانی تھی وہ بھی دور ہوگئی۔

خیال رہے کہ سعودی حکومت کی جانب سے لوگوں کو کرونا مفت ویکسین مفت فراہم کیے جانے کے لیے مختلف شہروں میں خصوصی طور پر ویکسی نیشن سینٹرز قائم کیے گئے ہیں جہاں انتہائی منظم انداز میں لوگوں کو ویکسین لگائی جاتی ہے۔

سعودی حکومت کی جانب سے کرونا وائرس سے بچاؤ کے لیے شروع کیا جانے والا مفت ویکسی نیشن پروگرام مملکت میں موجود ہر شخص کے لیے ہے، مملکت میں مقیم غیر ملکی بھی اس سے مستفید ہو رہے ہیں۔