Tag: ریاض

ریاض: سعودی عرب نے مملکت میں مقیم شہری اور تارکین وطن کو خوشخبری سنادی جس کے مطابق غیرملکی شہری اپنے رشتے داروں کو عمرہ ویزا پر بلاسکیں گے۔

عرب میڈیا کے مطابق سعودی حکام نے کہا ہے کہ سعودی عرب کے شہری اور ملک میں مقیم تارکین وطن اپنے قریبی رشتے داروں کے لیے عمرہ ویزا جاری کرسکیں گے، وزارت حج عمرہ کے سیکریٹری ڈاکٹرعبدالعزیز وزان نے بتایا کہ ویزے سے متعلق اس نئے قانون کو بہت جلد نافذ کیا جائے گا۔

نئے قانون کے مطابق سعودی عرب میں مقیم تمام تارکین وطن اپنے تین سے پانچ رشتے داروں کو عمرہ ویزا جاری کرواسکتے ہیں، سعودی شہری اور غیرملکی سال میں تین مرتبہ اپنے عزیزوں کو عمرہ کے لیے سعودی عرب بلاسکیں گے۔

عمرہ ویزا جاری کرنے کا طریقہ یہ ہے کہ عمرے کے خواہش مند افراد اپنے ملک میں کسی عمرہ ایجنٹ سے پیکیج خریدتے ہیں اور اسی کے مطابق انہیں عمرہ ویزا جاری کیا جاتا ہے۔

مزید پڑھیں: سعودی عرب: نئی ویزا پالیسی جاری کردی گئی

ڈاکٹر عبدالعزیز وزان کے مطابق اس قانون کے شرائط کے تحت رشتے دار قریبی ہونے چاہئیں اور جن رشتے داروں کو عمرہ ویزا پر بلایا جائے گا ان کی مکمل میزبانی اور ان کے ویزے کی مدت ختم ہونے سے پہلے ان کی وطن واپسی کی ذمہ داری بھی ان کے قریبی عزیر پر ہوگی۔

نئی پالیسی کے مطابق کسی بھی فلسطینی مسلمان کو اردن اور لبنان کے ویزے پر داخلے کی اجازت نہیں دی جائے گی، جس سے لاکھوں فلسطینیوں کے متاثر ہونے کا خدشہ ہے۔

خیال رہے کہ سعودی عرب نے گزشتہ سال نومبر میں اپنی نئی ویزا پالیسی کے تحت فلسطینیوں پر حج اور عمرہ کی ادائیگی پر پابندی عائد کردی تھی۔

ریاض: سعودی عرب کی الحائر جیل میں ایک قیدی شادی کے بندھن میں بندھ گیا، شادی کی تقریب کے تمام تر انتظامات جیل انتظامیہ نے انجام دئیے۔

عرب میڈیا کے مطابق سعودی عرب کی جیل میں قید ایک قیدی کی شادی جیل حکام کی جانب سے دھوم دھام سے کرادی گئی، تقریب میں پولیس اہلکاروں سمیت قیدی کے قریبی رشتے داروں نے بھی شرکت کی، شادی کے تمام اتر انتظامات جیل انتظامیہ نے بخوبی انجام دئیے۔

تقریب کے اختتام پردولہا دلہن کو نقدی کے علاوہ تحفے تحائف بھی پیش کیے گئے تھے، ریاستی سلامتی کے ادارے نے شادی کی تقریب کی تصاویر بھی جاری کیں۔

جیل انتظامیہ کے مطابق قیدی کو اپنی نوبیہاتا دلہن کے ساتھ مہینے میں ایک بار تین سے پانچ گھنٹے ملاقات کا موقع بھی مل سکے گا۔

مزید پڑھیں: میکسیکو کی جیل میں 63 قیدی رشتہ ازدواج میں منسلک

سعودی عرب میں زیادہ تر افراد کی جانب سے جیل انتظامیہ کے اس اقدام کو سراہا گیا ہے جبکہ کچھ لوگوں کی جانب سے اس پر تنقید کی گئی ہے۔

قبل ازیں مارچ 2016 میں بھی ایک اور قیدی کی اسی طرح کی شادی کی تقریب منعقد ہوئی تھی جس میں جیل انتظامیہ کی طرف سے تمام انتظامات کیے گئے تھے، دولہا قیدی کو اس وقت کے ولی عہد اور وزیر داخلہ شہزادہ محمد بن تائف کی طرف سے نقد رقم کے علاوہ تحائف بھی دئیے گئے تھے۔

یاد رہے کہ ریاض کی مرکزی جیل کا نام الحائر جیل ہے یہ ریاض شہر سے 29 کلو میٹر دور واقع ہے، اس کا افتتاح 1983 میں ہوا تھا، حکومت اسے جیل کے بجائے اصلاحیہ کا نام دیتی ہے، اصلاحیہ سے مراد وہ مقام جہاں منحرف لوگوں کی اصلاح کی جاتی ہے۔

ریاض: سعودی حکومت نے ملک میں کام کرنے والے غیرملکیوں کے اہل خانہ پر وزٹ ویزا کی تجدید کے لیے ہیلتھ انشورنس کی شرط عائد کردی۔

عرب میڈیا کے مطابق سعودی عرب کی حکومت نے ملک میں کام کرنے والے غیرملکیوں کے اہل خانہ پر ہیلتھ انشورنس کی شرائط عائد کردیں، ہیلتھ انشورنس کی شرط کا اعلان گزشتہ روز ڈائریکٹوریٹ جنرل آف پاسپورٹس کی جانب سے کیا گیا۔

ڈائریکٹوریٹ کی طرف سے جاری بیان کے مطابق آئندہ جب غیرملکی ورکرز اپنے خاندان کے افراد کے وزٹ ویزے کی الیکٹرانک تجدید کرائیں گے تو انہیں انشورنس کا سرٹیفکیٹ بھی دکھانا ہوگا بصورت دیگر تجدید نہیں کی جائے گی۔

اس نئی شرط کے حوالے سے جنرل سیکریٹریٹ آف دی کونسل آف کو آپریٹو ہیلتھ انشورنس اور نیشنل انفارمیشن کے اشتراک سے تمام انتظامات مکمل کرلیے گئے ہیں۔

مزید پڑھیں: سعودی حکام کا غیرملکی سیاحوں کی ویزہ فری انٹری پرغور

رپورٹ کے مطابق حج اور عمرہ ویزے اور سفارتی ویزے پر آنے والے وزیٹرز اس شرط سے مستثنیٰ ہوں گے۔

وزٹ ویزے کی تجدید کی مدت ختم ہونے میں 7 روز باقی ہونے سے لے کر مدت ختم ہونے کے تین دن بعد تک تجدید کروائی جاسکے گی۔

واضح رہے کہ سعودی عرب میں پہلے ہی غیرملکی ورکرز پر نئی شرائط لاگو کی جاچکی ہیں جس میں سالانہ فیس، غیرملکیوں کے کاروبار میں سعودی عرب کے مقامی لوگوں کی شمولیت شامل ہے۔

سعودی عرب کے اس اقدام کے سبب بیشتر غیرملکی سعودی عرب چھوڑنے پر مجبور ہوچکے ہیں اور بعض تنہا سعودی عرب میں ملازمت کررہے ہیں اور اہل خانہ کو اپنے وطن واپس بھیج دیا ہے۔

ریاض: سعودی عرب کے ولی عہد شہزادہ محمد بن سلمان کے دورہ چین کے موقع پر جہاں دونوں ملکوں میں اقتصادی تعاون کے فروغ کے کئی معاہدے طے پائے  وہیں سعودی عرب کے تعلیمی اداروں میں چینی زبان سکھانے کے منصوبے کا بھی آغاز ہورہا ہے۔

عرب میڈیا کے مطابق سعودی عرب کے تعلیمی اداروں میں چینی زبان سکھانے کے منصوبہ کا مقصد چین کی اہمیت اور دونوں ملکوں کے درمیان جاری تعلقات کو مستقبل میں مزید مستحکم کرنا ہے تاکہ دونوں ملک مستقبل میں ایک دوسرے کی اقتصادی قوت اور سرمایہ کاری کے موقع پر بھرپور طریقے سے استفادہ کرسکیں۔

سعودی عرب چینی کلچر اور ثقافت سے آگاہی کے لیے چینی طلباء کو اپنے ہاں تعلیم کے حصول کی اجازت دے گا اور ویژن 2030 کے اہداف کے حصول کے لیے سعودی عرب میں چینی زبان سے آگاہی کو یقینی بنایا جائے گا۔

مزید پڑھیں: سعودی ولی عہد دیوار چین کے مناظر دیکھ کر حیران، ویڈیو وائرل

مبصرین کا خیال ہے کہ سعودی عرب میں چینی زبان سکھانے کے کورسز کا آغاز دونوں ملکوں میں تعلیمی افق میں اہم پیش رفت ثابت ہوں گے، چینی زبان سعودی اور چینی قوموں کے درمیان پل کا کام کرے گی، اور دونوں قوموں کے درمیان تجارتی روابط میں اضافہ ہوگا۔

سعودی عرب کے تعلیمی اداروں میں چینی زبان سکھانے سے یہ واضح ہورہا ہے کہ سعودی عرب بیجنگ کو کس قدر اقتصادی اہمیت دیتا ہے، چین سعودی عرب کے لیے بہت بڑا اقتصادی شراکت دار ہوسکتا ہے، چین اس وقت دنیا کی دوسری بڑی معاشی طاقت ہے اور سعودی عرب چینی اقتصادی حجم سے بھرپور فائدہ اُٹھا سکتا ہے۔

مبصرین کے مطابق سعودی عرب میں چینی زبان سکھانے کے کورسز سے 50 ہزار افراد کو روزگار ملے گا جبکہ سالانہ 2 کروڑ چینی سیاح سعودی عرب میں سیاحت کی غرض سے آئیں گے۔