بالی ووڈ اداکارہ امیشا پٹیل نے ایک انٹرویو میں انکشاف کیا ہے کہ جب ریتھک روشن کو فلم انڈسٹری میں ’لانچ‘ کیا جا رہا تھا تو ہر کوئی اس کے خلاف تھا۔
تفصیلات کے مطابق ایک انٹرویو کے دوران ’غدر 2‘ کی اداکارہ امیشا پٹیل نے بتایا کہ جب ریتھک روشن لانچ ہونے والا تھا، اسی وقت امیتابھ بچن کے بیٹے ابھیشیک بچن کو بھی لانچ کیا جا رہا تھا، جس نے کرش اداکار کے لیے پریشانی کھڑی کر دی۔
امیشا پٹیل کے مطابق انڈسٹری میں ابھیشیک کی آمد کے موقع پر ریتھک پر کسی کو بھروسہ نہیں تھا۔ امیشا نے بتایا کہ جب وہ 2000 میں کیریئر کی پہلی فلم ’کہو نا پیار ہے‘ سے آغاز کرنے جا رہی تھیں تو ریتھک کو دوسری طرف کرینہ کپور کے ساتھ لانچ کیا جا رہا تھا۔
انھوں نے یہ انکشاف بھی کیا کہ راکیش روشن کی فلم کہو نا پیار ایک کم زور فلم سمجھی جا رہی تھی، انھی دنوں شاہ رخ خان اور عامر خان کی فلمیں ان کی فلم سے پہلے ریلیز ہونے والی تھیں، اس لیے کئی لوگوں نے راکیش روشن پر فلم کی ریلیز کی تاریخ آگے بڑھانے کے لیے دباؤ ڈالا۔
شاہ رخ خان اور عامر خان کی فلمیں ’پھر بھی دل ہے ہندوستانی‘ اور ’میلہ‘ جیسی فلمیں ریلیز ہو رہی تھیں، انڈسٹری کے لوگوں کا خیال تھا کہ فلم بری طرح پٹ جائے گی لیکن راکیش روشن ڈٹ گئے تھے، ان کا کہنا تھا کہ انھیں اپنی فلم پر بھروسہ ہے۔
