Tag: ریسپی

  • بیکڈ سگار رول بنانے کی آسان ترکیب

    بیکڈ سگار رول بنانے کی آسان ترکیب

    چائے کے ساتھ رول اور سموسے کھانا تو عام بات ہے لیکن آج ہم آپ کو کچھ مختلف قسم کے رول بنانے کی ترکیب بتا رہے ہیں۔

    مزیدار بیکڈ سگار رول بنانے کے لیے آپ کو مندرجہ ذیل اجزا کی ضرورت ہوگی۔

    اجزا

    چکن: 200 گرام

    تازہ ڈبل روٹی: رول بنانے کے لیے، حسب ضرورت

    تیل: 2 کھانے کے چمچ

    پیاز کٹی ہوئی: 1 عدد

    شملہ مرچ کٹی ہوئی: 1 عدد

    آلو کدو کش کیا ہوا: 1 عدد

    گاجر کدو کش کیا ہوا: 1 عدد

    ٹماٹر کٹا ہوا: 1 عدد

    ہری مرچ کٹی ہوئی: 2 عدد

    نمک: حسب ذائقہ

    لال مرچ پاؤڈر: 1 چائے کا چمچ

    چاٹ مصالحہ: 1 چائے کا چمچ

    زیرہ پاؤڈر: آدھا چائے کا چمچ

    سویا ساس: 2 چائے کے چمچ

    لیموں کا رس: 2 چائے کے چمچ

    ترکیب

    ایک پین میں تیل گرم کر کے اس میں پیاز کو فرائی کرلیں یہاں تک کہ پیاز کی رنگت ہلکی گلابی ہو جائے۔

    اب شملہ مرچ ڈال کر چند منٹ فرائی کر کے اس میں لہسن ڈال کر سوتے کرلیں۔

    اب چکن شامل کر کے پکنے دیں یہاں تک کے اس کا رنگ تبدیل ہوجائے۔

    پھر آلو، گاجر، ٹماٹر اور ہری مرچ ڈال کر اچھی طرح مکس کریں۔

    اب نمک، لال مرچ پاؤڈر، چاٹ مصالحہ اور زیرہ پاؤڈر ڈال دیں۔

    تھوڑا سا پانی شامل کریں، اسے ڈھانپ کر ہلکی آنچ پر پکنے دیں یہاں تک کہ چکن نرم ہوجائے اور گل جائے۔

    سویا ساس اور لیموں کا رس شامل کر کے مکس کریں اور چولہے سے ہٹا کر ایک طرف رکھ دیں۔

    ڈبل روٹی کے کنارے ہٹا دیں اور بیلنے کی مدد سے اسے بیل کر پتلا کرلیں۔

    پھر اس کے ایک طرف چکن مکسچر رکھیں اور دوسری طرف سے احتیاط کے ساتھ رول کر دیں اور پانی کی مدد سے کناروں کو بند کردیں۔

    اب ان رولز کو پہلے سے چکنی کی ہوئی بیکنگ ٹرے پر رکھ کر 180 سینٹی گریڈ پر بیک کرلیں یہاں تک کہ خستہ اور سنہرے ہو جائیں۔

    اگر اوون نہیں ہے تو توے پر ڈبل روٹی کو دونوں طرف سے ہلکی آنچ پر ٹوسٹ کرلیں۔

    مزیدار بیکڈ سگار رول کیچپ یا چلی گارلک ساس کے ساتھ سرو کریں۔

  • مزیدار دنبہ کڑاہی بنانے کی ترکیب

    مزیدار دنبہ کڑاہی بنانے کی ترکیب

    دنبے کا گوشت تاثیر میں گرم اور ذائقہ دار ہونے کے ساتھ صحت پر بھی مثبت اثرات مرتب کرتا ہے، یہ آئرن کی کمی پوری کرنے کے ساتھ قوت مدافعت بھی بڑھاتا ہے۔

    دنبے کے گوشت کو مناسب مقدار میں کھانا انسان کی مجموعی صحت کے لیے بہتر قرار دیا جاتا ہے۔ آج آپ کو مزیدار دنبہ کڑاہی بنانے کی ترکیب بتائی جارہی ہے۔

    اجزا

    دنبے کی ران کا گوشت: 1 کلو

    نمک: حسب ذائقہ

    ہری مرچ کٹی ہوئی: 4 سے 5 عدد

    کالی مرچ پسی ہوئی: 1 چائے کا چمچ

    ٹماٹر کٹے ہوئے: 4 سے 5 عدد

    ترکیب

    ایک کڑاہی میں چربی ڈال کر اسے پگھلا لیں۔

    اس میں گوشت اور نمک ڈال کر 20 سے 25 منٹ کے لیے ڈھانپ کر پکنے کے لیے رکھ دیں۔

    اب اس میں ہری مرچیں اور ٹماٹر ڈال کر مزید دس منٹ تک ڈھانپ کر پکائیں۔

    پھر اس کے اوپر کالی مرچ چھڑک کر مکس کردیں۔

    گرما گرم مزیدار دنبہ کڑاہی تیار ہے۔

  • فش نگٹس گھر میں بنانے کی آسان ترکیب

    فش نگٹس گھر میں بنانے کی آسان ترکیب

    موسم سرما میں مچھلی کا استعمال بڑھ جاتا ہے جو صحت و غذائیت کے لیے ضروری بھی ہے، اس سے مختلف طرح کی ڈشز بنائی جاسکتی ہیں۔

    آج ہم آپ کو مزیدار فش نگٹس بنانے کی ترکیب بتا رہے ہیں۔

    اجزا

    فش فلے: 250 گرام

    انڈے کی سفیدی: 1 عدد

    ہری مرچ: 2 عدد

    لہسن کے جوئے: 2 عدد

    کالی مرچ: 1 چائے کا چمچ

    پسی ہوئی رائی: آدھا چائے کا چمچ

    پسی ہوئی لال مرچ: آدھا چائے کا چمچ

    نمک: آدھا چائے کا چمچ

    اوریگانو: آدھا چائے کا چمچ

    چائنیز سالٹ: آدھا چائے کا چمچ

    چاول کا آٹا: 2 کھانے کے چمچ

    بریڈ کرمز: حسب ضرورت

    تیل تلنے کے لیے

    ترکیب

    سب سے پہلے چوپر میں ہری مرچ، لہسن، لال مرچ، رائی، چائنیز سالٹ، اوریگانو، نمک اور چاول کا آٹا ڈال دیں اور چوپ کریں۔

    فش فلے بھی ڈال لیں اور اچھی طرح چوپ کریں۔

    اب اس آمیزے کو پلاسٹک کی تھیلی میں ڈال کر چپٹا کر لیں اور 2 منٹ کے لیے مائیکرو ویو میں رکھ دیں۔

    اس کے بعد اسے نکال کر چھوٹے چھوٹے ٹکڑے کر کے کاٹ لیں۔

    انڈے اور حسب ضرورت بریڈ کرمز لگا کر تیل میں ڈیپ فرائی کر لیں۔

    مزیدار فش نگٹس تیار ہیں۔

  • کشمیری چائے: موسم سرما کی خاص سوغات

    کشمیری چائے: موسم سرما کی خاص سوغات

    کشمیری چائے موسم سرما کی خاص سوغات ہے۔ گرما گرم کشمیری چائے سرد موسم میں توانائی کے ساتھ ساتھ حرارت بھی بخشتی ہے۔

    آج ہم آپ کو کشمیری چائے بنانے کی بے حد آسان ترکیب بتا رہے ہیں۔

    اجزا

    سبز چائے کی پتیاں: 1 کھانے کا چمچ

    لونگ: 4 عدد

    دار چینی: 1 بڑا ٹکرا

    چھوٹی الائچی: 4 سے 5 عدد

    کھانے کا سوڈا: 1 چٹکی

    نمک: 1 چٹکی

    شکر: حسب ذائقہ

    دودھ: 1 کلو

    پانی: 4 کپ

    بادام اور پستہ: حسب ذائقہ

    ترکیب

    ایک بڑے سوس پین میں پانی ڈالیں۔

    اس کے بعد اس میں سبز چائے کی پتیاں، لونگ، دار چینی، الائچی اور نمک ڈال کر ابال لیں۔

    جب پانی ابلنے لگے تو اس میں سوڈا ڈال کر اچھی طرح پھینٹ لیں، یہاں تک کہ پانی کا رنگ سرخ ہو جائے۔

    اب اس کو اتنا پکائیں کہ پانی خشک ہو کر ایک پیالی رہ جائے۔

    اس کے بعد اس میں دودھ اور چینی شامل کر کے پکائیں اور بادام اور پستے پیس کر اس میں شامل کردیں۔

    گرما گرم مزیدار کشمیری چائے تیار ہے۔

  • مزیدار گرما گرم تندوری چکن بنانے کی ترکیب

    مزیدار گرما گرم تندوری چکن بنانے کی ترکیب

    کون نہ ہوگا جس کی گرما گرم تندوری چکن دیکھ کر بھوک تیز نہ ہوجائے، روزانہ ویسے بھی ایک ہی طرح کی معمول کی ڈشز کھا کر طبیعت اکتا جاتی ہے، اسی لیے آج ہم آپ کو مزیدار چکن تندوری بنانے کی ترکیب بتا رہے ہیں۔

    اجزا

    مرغ سالم کھال اترا ہوا: 1 کلو

    پیاز: 1 عدد

    لہسن: 6 جوئے

    ادرک: 15 گرام

    سرخ مرچ ثابت: 4 عدد

    ثابت دھنیہ: 2 کھانے کے چمچ

    پسا ہوا مصالحہ (پیسٹ)

    ہلدی: آدھا چمچ

    گرم مصالحہ: 2 چائے کے چمچ

    نمک: حسب ضرورت

    زعفران: آدھا چائے کا چمچ

    لیموں کا رس: 2 کھانے کے چمچ

    گھی: 4 کھانے کے چمچ

    سجاوٹ کے لیے

    لیموں گولائی میں کٹے ہوئے: 4 عدد

    پیاز درمیانی لچھے دار کٹی ہوئی: 1 عدد

    ترکیب

    سب سے پہلے مرچ، ہلدی، دھنیہ، گرم مصالحہ، لہسن، پیاز اور ادرک کو باریک اور گاڑھا گاڑھا پیس لیں۔

    مرغ کو ابلتے ہوئے پانی میں 10 منٹ تک پکائیں۔

    مرغ کو پانی سے نکال کر کسی کانٹے کی مدد سے مرغ کو گود دیں۔ اب نمک اور لیموں کا رس پسے ہوئے آمیزے میں ملا کر مرغ پر اس طرح لگائیں کہ مصالحہ اچھی طرح جذب ہو جائے۔

    مرغ کو اسی طرح دس منٹ تک رکھا رہنے دیں۔

    ایک کڑھائی میں گھی ہلکی آنچ پر گرم کریں، گھی میں اوپر زعفران چھڑک دیں۔

    اس کے بعد مرغ کو احتیاط سے کڑھائی میں ڈالیں۔ دس منٹ تک فرائی کریں۔ اس دوران مرغ کو پلٹتے رہیں۔

    تھوڑی دیر بعد مرغ کو کڑھائی سے نکال لیں۔ کڑھائی میں بچا ہوا گھی ایک پتیلی میں ڈال کر مرغ کو بھی اس کی پتیلی میں ڈال کر ڈھکنا اچھی طرح سے بند کر دیں۔

    پہلے سے گرم کیے ہوئے اوون میں 400 فارن ہائٹ پر رکھ کر 30 منٹ تک پکائیں۔ جب گل جائے تو لیموں اور کٹی ہوئی لچھے دار پیاز کے ساتھ پیش کر یں۔

  • مزیدار بادامی قورمہ بنانے کی آسان ترکیب

    مزیدار بادامی قورمہ بنانے کی آسان ترکیب

    یوں تو بہت زیادہ مرغن غذائیں کھانا ہاضمے کی خرابی کا باعث بن سکتی ہیں، تاہم کبھی کبھار خصوصاً سرد موسم میں ان کا استعمال فائدہ مند ہوسکتا ہے۔

    اسی لیے آج ہم آپ کو مزیدار بادامی قورمہ بنانے کی ترکیب بتا رہے ہیں۔

    اجزا

    بکری کا گوشت، گول بوٹی والا: 1 کلو

    باریک پیاز: 3 عدد

    ثابت دھنیہ: 2 چائے کے چمچ

    دہی: 1 پیالی

    لال دیگی مرچ: 4 عدد

    چھوٹی الائچی: 6 عدد

    سیاہ زیرہ: آدھا چائے کا چمچ

    لہسن ادرک: 1 چائے کا چمچ

    گرم مصالحہ پسا ہوا: آدھاچائے کا ایک چمچ

    تیل: 1 پیالی

    نمک: حسب ذائقہ

    بادام: 10 سے 15 عدد

    ترکیب

    سب سے پہلے ایک دیگچی میں تیل ڈال کر پیاز سنہری کرلیں، جب براؤن ہوجائے تو اس کو نکال کر ایک کاغذ پر پھیلا دیں۔

    اب گوشت کو ایک پیالے میں ڈال دیں۔ دہی، لہسن، پیاز، ادرک ، دیگی لال مرچ، گرم مصالحہ (تھوڑے سے پانی میں ابال کر دھنیے کے ساتھ گرینڈر میں پیس لیں) گوشت میں ملا دیں۔

    اب مصالحہ ملا ہوا گوشت تیل میں ڈال دیں، ساتھ پیاز بھی کرش کر کے ملا دیں اور ہلکی آنچ پر پکنے دیں۔

    جب گوشت کا پانی خشک ہو جائے تو بھون کر ڈیڑھ پیالی گرم پانی ڈال کر پھر سے ہلکی آنچ پر 10 منٹ کے لیے رکھ دیں۔

    اس کے بعد سیاہ زیرہ اور چھوٹی الائچی پیس کر ڈال دیں۔

    بادام ڈال کر ہلکی آنچ پر دوبارہ دم پر رکھ دیں، جتنی دیر دم پر رکھیں گے اتنا ہی مزیدار ہوگا۔

    گرم گرم بادامی قورمہ شیر مال کے ساتھ سرو کریں۔

  • مزیدار حیدر آبادی قیمہ بریانی بنانے کی ترکیب

    مزیدار حیدر آبادی قیمہ بریانی بنانے کی ترکیب

    بریانی ایسا پکوان ہے جو بچوں بڑوں سب ہی کا پسندیدہ ہوتا ہے، اس پکوان کو مختلف طریقوں اور جدتوں کے ساتھ بھی بنایا جاتا ہے۔

    آج ہم آپ کو مزیدار حیدر آبادی قیمہ بریانی بنانے کی ترکیب بتا رہے ہیں۔

    اجزا

    قیمہ: 2 کلو

    دہی: 1 کپ

    چاول: 2 کلو

    پیاز: 2 عدد

    ٹماٹر: 3 عدد

    ہری مرچ: 6 عدد

    لہسن: 3 جوئے

    لہسن ادرک کا پیسٹ: 2 کھانے کے چمچ

    کڑی پتہ: 12 عدد

    پودینہ: 1 کپ

    نمک، لال مرچ: 1 چائے کا چمچ

    ہلدی: 1 چائے کا چمچ

    زیرہ: 1 کھانے کا چمچ

    گرم مصالحہ: 1 کھانے کا چمچ

    تیز پات: 2 پتے

    لونگ: 6 دانے

    دار چینی: 2 اسٹک

    آلو بخارا: 12 عدد

    تل: 1 کھانے کا چمچ

    خشخاش: 1 کھانے کا چمچ

    ترکیب

    سب سے پہلے چاول میں تیز پات، لونگ اور دار چینی ڈال کر ابال لیں۔

    پیاز فرائی کرکے اس میں ہری مرچ، لہسن، ادرک، کڑی پتہ، نمک، لال مرچ، زیرہ، دھنیہ، گرم مصالحہ اور آلو بخارا ڈال کر بھونیں اس کے بعد قیمہ ڈال کر بھونیں۔

    اب پین میں نیچے قیمہ ڈالیں پھر اوپر چاول ڈالیں، اس کے بعد پودینہ، ٹماٹر اور لہسن ڈالیں پھر دوبارہ قیمہ پھر چاول، ٹماٹر، لیموں، پودینہ اور پیلا رنگ ڈال کر دم دے دیں۔

    گرما گرم مزیدار حیدر آبادی قیمہ بریانی تیار ہے۔

  • دیگی قورمہ بنانے کی آسان ترکیب

    دیگی قورمہ بنانے کی آسان ترکیب

    قورمہ ایسی ڈش ہے جو کسی بھی دعوت کے طعام کا لطف دوبالا کردیتی ہے، آج ہم آپ کو دیگی قورمہ بنانے کی آسان ترکیب بتا رہے ہیں۔

    اس کے لیے آپ کو مندرجہ ذیل اجزا کی ضرورت ہوگی۔

    اجزا

    چکن: 1 کلو

    پیاز تلی اور پسی ہوئی: آدھا کپ

    لونگ: 8 عدد

    دار چینی: 1 انچ کا ٹکڑا

    ہری الائچی: 8 عدد

    جائفل جاوتری: ایک چوتھائی ٹکڑا

    ادرک لہسن کا پیسٹ: 1 کھانے کا چمچ

    نمک: ڈیڑھ چائے کا چمچ

    لال مرچ پسی ہوئی: ڈھائی چائے کا چمچ

    دھنیا پسا ہوا: 2 چائے کے چمچ

    دہی: ڈیڑھ کپ

    تیل: آدھا کپ

    کیوڑا: 1 چائے کا چمچ

    ترکیب

    سب سے پہلے پیاز کو لونگ، دار چینی، ہری الائچی، جائفل اور جاوتری کے ساتھ پیس لیں۔

    اب تیل گرم کر کے اس میں چکن کے ٹکڑے، ادرک لہسن کا پیسٹ اور نمک ڈال کر پانچ منٹ کے لیے فرائی کریں۔

    اس میں پسی لال مرچ، پسا دھنیا، دہی اور پیاز کا مکسچر شامل کر کے اچھی طرح پکائیں۔

    چکن کے گلنے تک ہلکی آنچ پر ڈھک کر چھوڑ دیں۔

    اب اسے 15 منٹ کے لیے دم پر چھوڑ دیں۔

    آخر میں کیوڑا چھڑکیں اور شیر مال کے ساتھ سرو کریں۔

  • مزیدار چائنیز پکوڑے جو بارش کا لطف دوبالا کردیں

    مزیدار چائنیز پکوڑے جو بارش کا لطف دوبالا کردیں

    پکوڑے بارشوں کے موسم کی خاص سوغات ہیں جو اس موسم کا لطف دوبالا کردیتے ہیں، آج ہم آپ کو مزیدار چائنیز پکوڑے بنانے کی ترکیب بتا رہے ہیں۔

    اجزا

    بینگن: 2 عدد

    پھول گوبھی: 1 پھول چھوٹا

    آلو: 2 عدد

    پیاز 2 عدد

    شملہ مرچ: 3 عدد

    میدہ: 2 کپ

    لال مرچ: 1 چائے کا چمچ

    زیرہ پاوڈر: 1 چائے کا چمچ

    نمک: حسب ذائقہ

    لیموں کا جوس: 2 کھانے کے چمچ

    پانی: 1 کپ

    تیل: حسب ضرورت

    اجینو موتو (چائینیز سالٹ): 1 چائے کا چمچ

    ترکیب

    ایک پیالے میں میدہ، سفید زیرہ، نمک، لال مرچ، لیموں کا جوس اور پانی ملا کر پیسٹ بنالیں۔

    بینگن کو چھلکوں سمیت چھوٹے کیوبز کی طرح کاٹ لیں۔

    گوبھی کے پھول الگ کرلیں۔

    پیاز اور شملہ مرچ کو بھی باریک کاٹ لیں۔

    اب ان سب کٹی ہوئی سبزیوں پر تھوڑا میدہ چھڑک دیں۔

    ایک پین میں تیل گرم کریں پھر سبزیوں کو پیسٹ میں مکس کر کے تیل میں ڈال کر فرائی کریں۔

    سبزیاں تھوڑی تھوڑی کر کے فرائی کریں اور جب یہ پکوڑوں کی طرح فرائی ہوجائیں تو نکال لیں۔

  • گرمی بھگانے کے لیے مزیدار سوڈا گھر میں بنانے کی آسان ترکیب

    گرمی بھگانے کے لیے مزیدار سوڈا گھر میں بنانے کی آسان ترکیب

    کلکی سوڈا بھارتی ریاست تامل ناڈو کا ایک خاص قسم کا سوڈا ہے جو گھر میں بھی بنایا جاسکتا ہے۔ یہ سوڈا گرمی دور کرنے اور ہاضمے کے لیے نہایت بہترین سمجھا جاتا ہے۔

    کلکی سوڈا کو ٹھنڈا رکھنے کے لیے مٹکے میں بنایا جاتا ہے۔

    سب سے پہلے مٹکے میں برف ڈالیں، اس میں ایک بڑی مرچ، 1 چھوٹی مرچ کٹی ہوئی اور پودینہ شامل کریں۔

    اس کے بعد اس میں ایک لیموں کا رس شامل کریں۔

    بعد ازاں اس میں لاہوری نمک، کالا نمک، کالی مرچ اور اجوائن سے بنا ہوا مصالحہ شامل کیا جاتا ہے، اس کے بعد اس میں فلیور شامل کیا جاتا ہے جو مختلف پھلوں پر مشتمل ہوسکتا ہے۔

    اس کے بعد اس میں سوڈا شامل کریں اور اچھی طرح مکس کرلیں۔ ٹھنڈا ٹھار سوڈا نوش کریں۔