Tag: ریفرنس سماعت کیلئے مقرر

اسلام آباد : احتساب عدالت نے پیپلز پارٹی کی سینیٹر روبینہ خالد کے خلاف دائر ریفرنس سماعت کیلئے مقرر کر دیا، سماعت 16 جولائی کو سماعت ہوگی ، روبینہ خالد پر لوک ورثہ کے فنڈز میں خورد برد کا الزام ہے۔

تفصیلات کے مطابق اسلام آباد کی احتساب عدالت نے نیب کی جانب سے پیپلز پارٹی کی سینیٹر روبینہ خالد کے خلاف دائر ریفرنس سماعت کیلئے مقرر کر دیا، جج محمد بشیر کی جانب سے شریک ملزمان محمد شفیع , تابندی ظفر اور روبینہ خالد کے خلاف نوٹسز جاری کئے گئے ۔

احتساب عدالت میں روبینہ خالد کے خلاف دائر ریفرنس کی سماعت 16 جولائی کو ہوگی۔

گذشتہ روز نیب راولپنڈی نے لوک ورثہ اسیکنڈل میں پیپلز پارٹی کی سینیٹر روبینہ خالد کے خلاف ریفرنس دائر کیا تھا ، ریفرنس میں الزام لگایاگیاکہ ملزمان نے لوک ورثہ کے فنڈز میں خورد برد کی اور اختیارات کا ناجائز استعمال کیا، جس سے قومی خزانے کو 30 ملین سے زائد کا نقصان پہنچا۔

مزید پڑھیں : لوک ورثہ اسیکنڈل ، پیپلز پارٹی کی سینیٹر روبینہ خالد کے خلاف ریفرنس دائر

یاد رہے 15 مئی کو چیئرمین نیب جسٹس (ر) جاوید اقبال کی زیرصدارت ایگزیکٹوبورڈ کا اجلاس ہوا تھا، جس میں سینیٹرروبینہ خالداور مظہرالاسلام کے خلاف ریفرنس کی منظوری دی گئی تھی۔

اس موقع پر چیئرمین نیب نے کہا تھا میگا کرپشن مقدمات کومنطقی انجام تک پہنچاناترجیح ہے، مقدمات کوقانون کےمطابق انجام تک پہنچایا جارہا ہے، بدعنوانی تمام برائیوں کی جڑہے، نیب “احتساب سب کے لئے” کی پالیسی پر سختی سے عمل پیرا ہے۔

ان کا کہنا تھا نیب بد عنوان عناصر ، اشتہاری اور مفرور ملزمان کے مقدمات کو قانون کے مطابق منطقی انجام تک پہنچانے پر یقین رکھتاہے اور اس ضمن میں ہر ممکن کوشش کی جا رہی ہے۔