ممبئی : دنیا کے امیر ترین افراد کی فہرست میں شامل اور ریلائنس انڈسٹریز کے چیئرمین مکیش امبانی کو قتل کی دھمکی دینے والا ملزم پکڑا گیا۔
اس حوالے سے مہاراشٹر پولیس نے بتایا ہے کہ ملزم کی شناخت 19 سالہ گنیش رمیش وانپاردھی کے طور پر کی گئی ہے جسے گرفتار کرکے عدالت میں پیش کیا گیا اور 8 نومبر تک پولیس کی تحویل میں بھیج دیا گیا ہے۔
بھارتی میڈیا رپورٹس کے مطابق یاد رہے کہ مکیش امبانی کو 27 اکتوبر سے یکم نومبر تک جان سے مارنے کی دھمکیوں پر مشتمل پانچ ای میل بھیجی گئی تھیں جس میں 400 کروڑ روپے کا مطالبہ کیا گیا تھا۔
پولیس کے مطابق تمام دھمکیاں ایک ہی میل آئی ڈی سے موصول ہوئی تھیں، امبانی کو 27 اکتوبر کو پہلا دھمکی آمیز میل موصول ہوا۔ اس میں 20 کروڑ روپے کا مطالبہ کیا گیا تھا۔ اگلے دن 28 اکتوبر کو ایک اور میل موصول ہوئی۔ اس میں رقم بڑھا کر 200 کروڑ روپے کر دی گئی۔ پھر 30 اکتوبر کو بھی ایک میل آیا، جس میں 400 کروڑ روپے کا مطالبہ کیا گیا تھا۔
میل میں کہا گیا کہ اگر رقم نہ ملی تو اسے ملک کے بہترین شوٹرز کے ہاتھوں قتل کر دیا جائے گا۔ 27اکتوبر کو پہلی میل موصول ہونے کے بعد، گامدیوی پولیس نے نامعلوم شخص کے خلاف ایف آئی آر درج کرکے تحقیقات شروع کی تھی۔
