لاہور: پاکستان ریلوے کی ایک اور ٹرین کو حادثہ پیش آ گیا، کراچی جاتے ہوئے تیز گام کی لاہور یارڈ میں 3 بوگیاں پٹری سے اتر گئیں۔
تفصیلات کے مطابق تیزگام ٹرین کی تین بوگیاں لاہور یارڈ میں پٹری سے اتر گئیں، ریل کراچی جا رہی تھی، ترجمان ریلوے کا کہنا تھا کہ متبادل کوچز لگا کر 40 منٹ تک ٹرین کو روانہ کر دیا جائے گا۔
ریلوے ترجمان نے بتایا کہ اسٹیشن پر آنے اور جانے والی ٹرینوں کے لیے راستہ کلیئر ہے، پٹری سے اترنے والی کوچز کو ٹریک سے اٹھایا جا رہا ہے، جلد ہی ٹریک بھی کلیئر کر دیا جائے گا۔
یاد رہے کہ دو دن قبل حیدر آباد کے قریب کراچی سے جانے والی جناح ایکسپریس ایک ہی ٹریک پر چلنے والی مال گاڑی سے ٹکرا گئی تھی، اس حادثے میں تین افراد جاں بحق اور متعدد زخمی ہو گئے تھے۔
یہ بھی پڑھیں: کراچی سے جانے والی جناح ایکسپریس مال گاڑی سے ٹکرا گئی، تین افراد جاں بحق
جاں بحق ہونے والوں میں جناح ایکسپریس کا ڈرائیور اور اسسٹنٹ ڈرائیور اور گارڈ شامل تھے، حادثہ اتنا شدید تھا ٹرینوں کے ٹکرانے کی آواز دور دور تک سنی گئی، جناح ایکسپریس کا انجن جل کر مکمل تباہ ہو گیا۔
ذرایع کے مطابق نا تجربہ کار افسران کی وجہ سے ریلوے آپریشن کئی عرصے بری طرح متاثر ہے، چند ماہ میں متعدد گاڑیوں کے پٹری سے اترنے کے واقعات رونما ہو چکے ہیں۔
گزشتہ روز اپوزیشن نے وفاقی وزیر ریلوے شیخ رشید احمد کو تنقید کا نشانہ بناتے ہوئے کہا تھا کہ جب سے انھیں وزارت ملی ہے، ٹرینوں کے حادثات بڑھ گئے ہیں۔
