Tag: ریلوے خسارہ

اسلام آباد: وفاقی وزیر ریلوے شیخ رشید کا کہنا ہے کہ 5 کے بجائے 3 سال میں ریلوے کا خسارہ ختم کردیں گے، جو افسر یا ملازم 8 بجے ڈیوٹی پر نہیں پہنچے گا اس کی غیر حاضری لگے گی۔

تفصیلات کے مطابق وفاقی وزیر ریلوے شیخ رشید کا کہنا ہے کہ فریٹ ٹرین کو 80 کے بجائے 40 گھنٹے میں تبدیل کیا، پاکستان واحد ملک ہے جس نے پسنجر میں 10 ارب زیادہ کمائے۔ اس سال میں ہم نے 3 ماہ میں ٹارگٹ سے آدھا ملین زیادہ کمایا۔

شیخ رشید کا کہنا تھا کہ 5 کے بجائے 3 سال میں ریلوے کا خسارہ ختم کردیں گے، وزیر اعظم سے درخواست ہے وہ ننکانہ صاحب اسٹیشن کا افتتاح کریں۔ جو افسر یا ملازم 8 بجے ڈیوٹی پر نہیں پہنچے گا اس کی غیر حاضری لگے گی۔ ریلوے ہیڈ کوارٹرز میں کمانڈ اینڈ کنٹرول سسٹم لگا دیا گیا ہے۔

انہوں نے کہا کہ جناح ایکسپریس کے ساتھ اکانومی کلاس کے ڈبے لگا رہے ہیں، آرمی چیف کا شکریہ ادا کرنا چاہتا ہوں، ٹینڈر کھلنے جا رہے ہیں۔ ایم ایل ون منصوبہ پاکستان کی ریڑھ کی ہڈی کی طرح ہے۔ سنہ 1861 کی پٹڑی برطانیہ نے ڈالی تھی اب پہلی دفعہ کام ہونے جا رہا ہے۔ ایک ہزار دکانیں ریلوے اسٹیشنوں پر بنانے جا رہے ہیں۔

وفاقی وزیر کا کہنا تھا کہ فضل الرحمٰن اور شہباز شریف کی کوئی چیز فائنل نہیں۔ مولانا کے آگے کنواں ہے اور پیچھے کھائی ہے۔ وزیر اعظم عمران خان نے ملک کو ڈیفالٹ ہونے سے بچا لیا ہے، عمران خان نے مودی کو پھنسا دیا ہے نہ جان چھوٹ سکتی ہے نہ بچ سکتی ہے۔

انہوں نے کہا کہ پاکستان کے عوام اور پاک فوج کشمیریوں کے ساتھ کھڑی ہیں، کرفیو اٹھے گا تو کشمیر کے مجاہد اور کشمیری جان ہتھیلی پر رکھ کر باہر نکلیں گے۔

شیخ رشید نے مزید کہا کہ انتخابات کی باتیں کرنے والوں کی چیخیں سنائی دیں گی، سب کہتے ہیں فوج پولنگ اسٹیشنز کے باہر نہ ہو، اگر فوج نہ ہو تو یہ پولنگ کے ڈبے اٹھا کر اپنے ساتھ لے جائیں۔ عمران خان 6 آدمی رہا کر دیں تو یہ ساری تحریکیں ٹھس ہوجائیں۔ یہ پرانے کیس ہیں، عمران خان تو ابھی ان پر کیس بنائیں گے۔