لاہور: ریلوے پولیس نے رحیم یار خان میں تیزگام ایکسپریس میں آگ لگنے کی ابتدائی تحقیقاتی رپورٹ مکمل کر لی ہے، فرانزک ذرایع کا کہنا ہے کہ حادثہ ٹرین میں سلنڈر پھٹنے کے باعث پیش آیا۔
تفصیلات کے مطابق تیزگام حادثے کا مقدمہ ٹرین گارڈ محمد سعید کی مدعیت میں نامعلوم افراد کے خلاف درج کر لیا گیا ہے، مقدمہ تھانہ ریلوے پولیس خان پور ملتان ڈویژن میں درج کیا گیا، ابتدائی تحقیقات کے مطابق واقعے کی بنیادی وجہ گیس سلنڈر کا پھٹنا قرار دیا گیا۔
ڈی جی فرانزک ایجنسی کا کہنا ہے کہ پولیس اور فرانزک ماہرین نے سلنڈر کے ٹکڑے جمع کر کے فرانزک لیبارٹری بجھوا دیے، فرانزک ٹیمیں جائے وقوعہ پر تاحال کام میں مصروف ہیں۔
ڈاکٹر اشرف طاہر نے بتایا کہ بہاولپور ملتان کے فرانزک ماہرین شواہد جمع کر رہے ہیں، اطلاعات کے مطابق 65 لاشیں ناقابل شناخت ہیں، جن کا ڈی این اے ٹیسٹ کیا جائے گا، لواحقین کو ٹریس کر کے ان کا بھی ٹیسٹ کیا جائے گا۔
تازہ ترین: لیاقت پور: تیزگام کی 3 بوگیوں میں آگ لگ گئی، 74 افراد جاں بحق
ڈی جی کا کہنا تھا کہ ٹرین کی بجلی سے آگ لگنے کے امکانات کم ہوتے ہیں، تاہم اس سلسلے میں حتمی کچھ نہیں کہا جا سکتا، سانحے کی حتمی رپورٹ آنے میں وقت لگے گا۔
متضادات بیانات
ادھر تیزگام سانحہ ریلوے انتظامیہ کی اہلیت پر سوال اٹھا گیا ہے، مسافر بھی متضادات بیانات دے رہے ہیں، ایک زخمی مسافر نے بیان دیا کہ تیز گام ایکسپریس میں آگ چولھا جلانے کے دوران لگی، چائے بنا رہے تھے کہ آگ بھڑک اٹھی۔ بعض مسافر کہتے ہیں آگ اے سی کمپارٹمنٹ میں لگی، جب کہ فوٹیج کے مطابق آگ پہلے اکانومی کلاس میں لگی، اور اے سی بوگی صحیح سلامت تھی۔
خاندان لاپتا، مسافروں کا احتجاج
کراچی سے راولپنڈی جانے والے ایک خاندان کا تاحال پتا نہیں چل سکا ہے، خاتون ریحانہ، امجد، ذوالفقار، 7 سال کا جسٹن کل روانہ ہوئے تھے، اہل خانہ کا کہنا ہے کہ امجد کا موبائل کسی اور شخص کے پاس ہے، جس نے زخمی ہونے کی اطلاع دی ہے، امجد کا فون اٹھانے والے شخص نے امجد سے بات نہیں کروائی، کینٹ اسٹیشن پر بھی کوئی مدد یا معلومات نہیں دی جا رہی، رشتہ داروں کو لیاقت پور روانہ کر دیا ہے۔
ادھر ملتان میں سانحہ تیزگام کے متاثرہ مسافروں نے احتجاج شروع کر دیا ہے، مسافروں نے تیز گام ٹرین کو روک لیا، ان کا کہنا تھا کہ وزیر ریلوے غلط بیانی کر رہے ہیں، ٹرین میں آگ بجھانے کا کوئی سامان موجود نہیں تھا، آگ شارٹ سرکٹ کے باعث لگی۔
