اسلام آباد : وفاقی وزیر ہوا بازی خواجہ سعدرفیق نے ریلوے کی اکانومی کلاس اور پی آئی اے کی ڈومیسٹک پروازوں کے کرایوں میں کمی کا اعلان کردیا۔
تفصیلات کے مطابق وفاقی وزیر ہوا بازی خواجہ سعدرفیق کی جانب سے بیان میں کہا گیا ہے کہ ریلوے کی اکانومی کلاس کرائے میں 10 فیصد کمی کی جارہی ہے۔
خواجہ سعدرفیق کا کہنا تھا کہ پی آئی اے کی ڈومیسٹک پروازوں کی دونوں کلاسز کے کرایوں میں بھی 10 فیصد رعایت دی جائے گی۔
وفاقی وزیر نے کہا کہ فیصلوں کا اطلاق 17 جولائی سے آئندہ30 دن کے لیے ہو گا اور کرایوں میں کمی کا نوٹیفکیشن کل جاری کیا جائے گا۔
خیال رہے ریلوے میں 94 جبکہ پی آئی اے میں 90 فیصد سےزائدمسافر اکانومی میں سفر کرتے ہیں۔
گذشتہ روز پیٹرولیم مصنوعات کی قیمتوں میں کمی کے بعد وفاقی وزیر ریلوے سعد رفیق نے ریلوے انتظامیہ کو ٹرینوں کے کرایوں میں کمی کی ہدایت کی تھی۔
خیال رہے کہ گزشتہ ماہ وزارت ریلوے کی جانب سے ٹرین کرایوں میں دو بار اضافہ کیا گیا تھا، محکمہ ریلوے نے تمام مسافر ٹرینوں کے کرایوں میں مجموعی طور پر 15 فیصد جبکہ فریٹ ٹرینوں کے کرائے 25 فیصد اضافہ کیا تھا۔