Tag: ریلوے کی خبریں

راولپنڈی: وفاقی وزیر ریلوے شیخ رشید کا کہنا ہے کہ آئی ایم ایف مجبوری ہے، ڈاکو لٹیرے ملک کو لوٹ کر گئے ہیں۔ عمران خان کو معلوم ہی نہیں تھا کہ کس طرح ملک کو لوٹا گیا۔

تفصیلات کے مطابق گزشتہ روز وزیر اعظم کی جانب سے افتتاح کی جانے والی تھل ایکسپریس آج صبح راولپنڈی سے ملتان روانہ ہوگئی۔ وزیر ریلوے شیخ رشید بھی ٹرین میں سوار ہیں۔

ٹرین کندیاں، میانوالی، لیہ، کوٹ ادو اور مظفر گڑھ سے ہوتے ہوئے ملتان پہنچے گی۔ ٹرین روزانہ ملتان سے راولپنڈی اور راولپنڈی سے ملتان چلا کرے گی، دونوں شہروں کے درمیان سفر کا دورانیہ 4 گھنٹے کم ہو کر 11 گھنٹے رہ جائے گا۔

750 سے زائد مسافروں کی گنجائش والی تھل ایکسپریس میں 10 بوگیاں ہیں۔

پہلے روز تھل ایکسپریس میں سفر کرنے والے مسافروں کے لیے مفت سفر کی سہولت رکھی گئی ہے۔

ٹرین روانگی سے قبل وزیر ریلوے شیخ رشید نے میڈیا سے گفتگو کرتے ہوئے کہا کہ یہ ٹرین مزدوروں نے بنائی ہے، ان کا شکریہ ادا کرتا ہوں۔ 20 فریٹ ٹرینیں چلانا میرا ہدف ہے۔

شیخ رشید کا کہنا تھا کہ جہاں جہاں غریب بستی ہے وہاں تک پٹری لے کر جاؤں گا، آرام ہم پر حرام ہے۔ سعودی ولی عہد کا دورہ پاکستان تاریخی ہوگا۔ عمران خان نے ملک کے لیے سعودی ولی عہد سے ذاتی تعلقات بنائے ہیں۔

انہوں نے کہا کہ متحدہ عرب امارات کے سربراہ سے بھی پاکستان کے لیے ذاتی تعلقات بنائے گئے۔ آئی ایم ایف مجبوری ہے، ڈاکو لٹیرے ملک کو لوٹ کر گئے ہیں۔ عمران خان کو معلوم ہی نہیں تھا کہ کس طرح ملک کو لوٹا گیا۔

شیخ رشید نے کہا کہ میں بھی وزیر اعظم ہوتا تو آئی ایم ایف کے پاس جاتا، 40 بندوں کی لائن لگی ہے، سب جیل جائیں گے۔ ’گولی اندر ہوگی اور یہ چوہے جالندھر ہوں گے‘۔

لاہور: وفاقی وزیر ریلوے شیخ رشید کا کہنا تھا کہ 23 دسمبر کو رحمٰن بابا ایکسپریس کراچی سے پشاور تک چلنا شروع ہوگی۔ 31 دسمبر تک لاہور کراچی میں تمام ٹکٹیں ختم ہو چکی ہیں۔ قبل از وقت ٹکٹوں کی فروخت عوام کا اعتماد ہے۔

تفصیلات کے مطابق وفاقی وزیر ریلوے شیخ رشید نے پریس کانفرنس کرتے ہوئے کہا کہ اللہ نے ہماری مدد کی، پچھلے ہفتے آمدن 26 کروڑ 12 لاکھ تھی، اس ہفتے آمدن 45 کروڑ ہے، ساڑھے 6 لاکھ لیٹر تیل بچایا ہے۔ 31 دسمبر تک لاہور کراچی میں تمام ٹکٹیں ختم ہو چکی ہیں۔ قبل از وقت ٹکٹوں کی فروخت عوام کا اعتماد ہے۔

وفاقی وزیر ریلوے نے کہا کہ 23 دسمبر کو رحمٰن بابا ایکسپریس کراچی سے پشاور تک چلنا شروع ہوگی۔ ریلوے میں سرمایہ کاری کا خیر مقدم کریں گے۔ تمام ریلوے اسٹیشنوں پر اسٹال اور میڈیکل اسٹور کا کہا ہے۔

انہوں نے کہا کہ 24 تاریخ کو سپریم کورٹ میں ریلوے سے متعلق سماعت ہے۔ ایک ہزار پٹرول پمپس کی جگہیں لیز پر دینا چاہتے ہیں۔ 70 ہزار ویگنوں کا اسٹاک موجود ہے۔ دھند کے باعث موٹر وے پر لوڈ زیادہ ہوا تو ریلوے مدد کے لیے بھرپور تیار ہوگی۔

شیخ رشید کا کہنا تھا کہ جمعے اور ہفتے کو لوگ ٹرینوں کی چھتوں پر آرہے ہیں، میں نے سختی سےمنع کیا۔ لوگوں نے ریلوے پر اعتماد کا اظہار کیا ہے۔ 31 دسمبر تک اچھی خبر سنائیں گے، امید ہے ایم ایل ون کا فیصلہ ہو جائے گا۔

انہوں نے کہا کہ راولپنڈی لاہور کے درمیان ایک گھنٹے کا سفر کم ہو جائے گا، کوشش ہے کہ چین سے مناسب قیمت اور شرح سود پر ایم ایل ون لے کر چلیں۔ مال گاڑیوں سے متعلق کچھ نجی شراکت داروں نے دلچسپی دکھائی ہے۔

شیخ رشید کا کہنا تھا کہ لاہور اور راولپنڈی کے درمیان ایک اور ٹرین چلانے کا منصوبہ ہے۔ کراچی پشاور کا کرایہ بس کے راولپنڈی لاہور کے کرائے کے برابر ہے۔ ہم سے پہلے منصوبہ بندی نہیں صرف خریداری ہی کی گئی، 8 ارب پر سگنل چھوڑ کر آئے تھے 32 ارب پر آگئے ہیں۔

انہوں نے کہا کہ ریلوے کا تمام عملہ بہت محنت کر رہا ہے۔ چاہتا ہوں کہ وزیر اعظم عملے کا ایک گریڈ بڑھا دیں۔ ڈھائی لاکھ پودے اور 24 نئی نرسریاں لگائی ہیں۔ 25 دسمبر کو کارکردگی میں ریلوے نمبر ون ہوگا۔

وفاقی وزیر نے کہا کہ پچھلی حکومتوں میں 55 انجنوں کی حالت زیادہ ٹھیک نہیں۔ 68، 69 انجنوں کی حالت ٹھیک نہیں۔ اپنے محصولات سے ریلوے چلا رہے ہیں۔

انہوں نے کہا کہ اعظم سواتی نے چھوٹے مسئلے پر استعفی ٰدیا ان کو سراہنا چاہیئے، پاک فوج حکومت کے شانہ بشانہ کھڑی ہے۔ پاک فوج ملک کی معیشت کو مضبوط دیکھنا چاہتی ہے، عدلیہ آئین کی حکمرانی کے لیے کھڑی ہے، عوام چیف جسٹس کی طرف دیکھتے ہیں۔

لاہور: وفاقی وزیر ریلوے شیخ رشید کا کہنا ہے کہ ریلوے میں 23 ہزار نوکریوں کی ضرورت ہے جبکہ فوری طور پر 10 ہزار نوکریوں کی ضرورت ہے۔

تفصیلات کے مطابق وزیر ریلوے شیخ رشید احمد نے نیوز کانفرنس کرتے ہوئے کہا کہ ریلوے میں ایمرجنسی کے حالات ہیں، افرادی قوت کی کمی ہے۔

انہوں نے کہا کہ ریلوے میں 23 ہزار نوکریوں کی ضرورت ہے جبکہ فوری طور پر 10 ہزار نوکریوں کی ضرورت ہے۔ گولڑہ ریلوے اسٹیشن اور میوزیم کے لیے لوگ آئیں اور سرمایہ کاری کریں۔

انہوں نے کہا کہ 15 اکتوبر سے ریلوے اسٹیشن پر صاف پانی کا ٹینڈر کھول رہے ہیں، ریلوے ٹریکنگ اور وائی فائی سے متعلق لوگ کام کر رہے ہیں۔ ریلوے کے بکنگ آفس رات 12 بجے تک کھلے رہیں گے۔

شیخ رشید کا کہنا تھا کہ ٹرینوں میں وائی فائی کی سہولت جلد فراہم کریں گے۔ ایم ایل ون اور ٹو ریلوے کی بہتری کے لیے بہترین منصوبے ہیں، ایم ایل ون یا ٹو پر فوری کام شروع ہونے جا رہا ہے۔ یہ سی پیک میں بھی اہم منصوبہ ہے۔

انہوں نے کہا کہ ٹرینوں کی تعداد 100 دنوں میں 10 سے 15 پر لے کر جائیں گے، ٹرینوں کی تعداد بڑھانے سے متعلق معاہدے ہوگئے ہیں۔ 30 ستمبر تک ٹرینوں کی تعداد 10 سے بڑھ کر 15 ہوجائے گی۔

وفاقی وزیر ریلوے کا مزید کہنا تھا کہ سرمایہ کاروں کو ویلکم کرتے ہیں کہیں بھی سرمایہ کاری کر سکتے ہیں، خوشحال خان ایکسپریس کے حادثے سے متعلق رپورٹ طلب کی ہے۔ حادثے سے متعلق 30 ستمبر تک رپورٹ دی جائے گی۔

انہوں نے کہا کہ فریٹ کی تعداد 100 دنوں میں 10 سے 15 پر لے کر جائیں گے، فریٹ کی تعداد بڑھانے سے متعلق معاہدے ہو گئے ہیں۔

ان کا کہنا تھا کہ ریلوے ہیڈ کوارٹرز کراچی منتقل کر رہے ہیں، ریلوے میں سرمایہ کاری بڑھانے کے لیے مانیٹرنگ کمیٹی بنا دی ہے۔ اس وقت ریلوے کا خسارہ 38 ارب روپے ہے۔