Tag: ریلوے

لاہور: وفاقی وزیر ریلوے شیخ رشید کا کہنا ہے کہ پہلے 15 ٹرینوں کا کہا تھا لیکن رواں سال 20 نئی ٹرینیں چلائیں گے بڑا اعلان کر رہا ہوں۔ ٹرینوں میں کرایوں کی 3 کیٹگریز بنانے جا رہے ہیں۔

تفصیلات کے مطابق وفاقی وزیر ریلوے شیخ رشید نے پریس کانفرنس کرتے ہوئے کہا کہ روہڑی میں سندھی ثقافت کے مطابق نیا ریلوے اسٹیشن بنا رہے ہیں، روہڑی ریلوے اسٹیشن میں 200 نئی دکانیں بنانے جا رہے ہیں۔ ہماری تمام نئی ٹرینیں کمائی میں چل رہی ہیں۔

وزیر ریلوے نے کہا کہ 24 گھنٹے ٹکٹنگ کی سہولت کا بھی مثبت ردعمل آیا ہے، 24 گھنٹے ٹکٹنگ کی وجہ سے ایک ماہ میں 39 ہزار ٹکٹوں کا فائدہ ہوا، جو افسر کام نہیں کرے گا وہ گھر جائے گا، کرپشن پر زیرو ٹالرنس ہے۔

انہوں نے کہا کہ تمام اسٹیشنوں پر 15 دنوں میں پولیس ٹکٹ چیک کیا کرے گی، پہلے 15 ٹرینوں کا کہا تھا لیکن اب چھلانگ لگا کر 20 کا کہتا ہوں، رواں سال 20 نئی ٹرینیں چلائیں گے بڑا اعلان کر رہا ہوں۔ اس کے علاوہ اب ہماری گنجائش نہیں اور نہ مسافروں کی گنجائش ہے۔

شیخ رشید نے کہا کہ جو شخص 3 ماہ پہلے ٹکٹ لے اس کو ایک فیصد رعایت بھی دے سکتے ہیں، 2 نئی فریٹ ٹرینیں کل سے چلانے جا رہے ہیں۔ مارچ تک 2 مزید ٹرینیں بھی چلائی جائیں گی۔

انہوں نے کہا کہ وی آئی پی ٹرین شروع کرنے جا رہے ہیں جس کے مزید کرائے بڑھائیں گے، وی آئی پی ٹرین میں فائیو اسٹار سہولتیں فراہم کریں گے۔ ٹرینوں میں کرایوں کی 3 کیٹگریز بنانے جا رہے ہیں، کسی کو مجبور نہیں کریں گے ہر شخص اپنی کیٹگری خود منتخب کرے گا۔

شیخ رشید نے کہا کہ رواں سال پاکستان کی ترقی کا سال ہے، عمران خان کی قیادت میں ملک ترقی کرے گا، چیئرمین پی اے سی سے متعلق شہباز شریف کے خلاف عمران خان کو خط لکھ رہا ہوں، عمران خان سے درخواست کروں گا مجھے بھی پی اے سی میں شامل کیا جائے۔

انہوں نے کہا کہ شہباز شریف پر 121 کیسز ہیں وہ کیا احتساب کریں گے، کوئی کیس یا فائل نہیں دبائی گئی، جو بھی کیسز ہیں سب پر کارروائی ہوگی۔ آصف زرداری اور شریف خاندان کا مستقبل نہیں دیکھ رہا۔

لاہور: وفاقی وزیر ریلوے شیخ رشید کا کہنا ہے کہ پبلک اکاؤنٹس کمیٹی کے چیئرمین کے خلاف سپریم کورٹ جانے کا سوچ رہا ہوں۔ شہباز شریف کو کیسے چیئرمین پی اے سی بنایا گیا۔

تفصیلات کے مطابق وفاقی وزیر ریلوے شیخ رشید نے نیوز کانفرنس کرتے ہوئے کہا کہ آج ریلوے کی تاریخ کا بہت بڑا دن ہے، ریلوے کے مزدور چیف جسٹس ثاقب نثار کے مشکور ہیں۔ چیف جسٹس نے وہ کام کیا جو دس سال سے اٹکا ہوا تھا۔

شیخ رشید کا کہنا تھا کہ ریلوے کے اربوں روپے کے 123 کیسز ہیں، لاکھوں ایکڑ زمین پر قبضہ کرنے والے سمجھتے تھے کچھ نہیں ہوگا۔ ریلوے افسران میرٹ پر 3 سال کی رکی لیزوں پر کام شروع کریں۔ تین سال سے زائد میرٹ پر لیز کی اجازت ہے۔

انہوں نے کہا کہ 23 مارچ سے پہلے 2 ٹرینیں شروع کر رہے ہیں، رحمٰن بابا ایکسپریس بہت کامیاب ہوئی ہے۔ ایم ایل ون آخری مرحلے میں ہے۔ 2 اے سی اور 2 اکانومی ٹرینیں چلائیں گے، کراچی سے پشاور تک نیا ٹریک لگایا جائے گا۔

وزیر ریلوے کا کہنا تھا کہ 7 رکنی کمیٹی کو سرمایہ کاری اور دیگر امور کا اختیار دیا ہے، ریلوے کی زمین پر کوئی ہاؤسنگ اسکیم نہیں بنائی جاسکے گی۔ جو ٹریک اکھاڑیں گے اسے دوسری جگہ بچھائیں گے۔

انہوں نے کہا کہ شالیمار ٹرین اور شالیمار اسپتال کیس نیب کو بھیجے ہیں، پنڈی کی بیکری کا کیس دینا چاہتا ہوں اربوں روپے کا کیس ہے۔ پی اے سی چیئرمین کے خلاف سپریم کورٹ جانے کا سوچ رہا ہوں۔ شہباز شریف کو کیسے چیئرمین پی اے سی بنایا گیا۔

شیخ رشید نے کہا کہ کارگو کی کامیابی کے بعد مزید گاڑیاں نجی شعبے کے اشتراک سے چلائیں گے، خسارہ مسافر ٹرینوں سے نہیں زیادہ مال گاڑیاں چلانے سے کم ہوگا۔ تاجر کارگو ٹرین کی معلومات ٹریکنگ سسٹم سے حاصل کر سکیں گے۔ پاک فوج کی 50 بوگیاں کھڑی ہیں، باجوہ صاحب سے چلانے کی اجازت لوں گا۔

انہوں نے کہا کہ زرداری صاحب خود کہتے ہیں جیل میرا سسرال ہے، مجھے کہنے کی کیا ضرورت ہے، معاشی غداروں کو سزا دلانے میں عمران خان کی قیادت میں کامیاب ہوجائیں گے۔

وفاقی وزیر کا کہنا تھا کہ کرپشن کی ہے تو نواز شریف کو 7 سال ہوئی مجھے 14 سال کی سزا دے دیں، نواز شریف اور زرداری خاندان کا سیاست میں مستقبل نہیں دیکھ رہا۔

لاہور: وفاقی وزیر ریلوے شیخ رشید کا کہنا ہے کہ 15 نومبر کو وزیر اعظم حیدر آباد ایکسپریس کا افتتاح کریں گے۔ ریلوے میں نوکریوں کے لیے مقامی لوگوں کو ترجیح دی جائے گی۔

تفصیلات کے مطابق وفاقی وزیر ریلوے شیخ رشید نے پریس کانفرنس کرتے ہوئے کہا کہ ریلوے میں ویجی لینس سیل ختم کر دیا، ریلوے کی والٹن اکیڈمی کو یونیورسٹی بنایا جائے گا۔

انہوں نے کہا کہ ایندھن مہنگا ہونے کے باوجود کرایوں میں اضافہ نہیں کیا جائے گا، تیل مہنگا ہوتا رہا تو ہمیں کرائے بڑھانے کا بھی سوچنا ہوگا۔ ریلوے میں 10 ہزار خالی اسامیوں پر بھرتی کی اجازت مل گئی ہے۔

شیخ رشید نے کہا کہ 15 نومبر کو وزیر اعظم حیدر آباد ایکسپریس کا افتتاح کریں گے۔ تمام ڈائر یکٹر اپنے اپنے پراجیکٹ میں موجود ہونے چاہیئں۔ ہماری پپری یارڈ میں 1800 ایکڑ قیمتی زمین ہے۔

انہوں نے کہا کہ ریلوے میں نوکریوں کے لیے مقامی لوگوں کو ترجیح دی جائے گی، بے روزگاری کے سمندر کو ختم کرنے میں ریلوے بھی حصہ ڈالے گی۔ ٹریکنگ سسٹم سے ہر کوئی دیکھ سکے گا مال گاڑی کہاں پہنچی ہے۔

شیخ رشید کا کہنا تھا کہ خواجہ سعد رفیق میرا لیول نہیں ان سے الجھنا نہیں چاہتا، دنیا میں کوئی بھی چیز شخصیت پر نہیں چلتی۔ میرے بعد آنے والا شخص شاید ریلوے کو زیادہ اچھا چلائے۔

وفاقی وزیر نے نیب کے بارے میں اظہار خیال کرتے ہوئے کہا کہ صرف نیب کیا کرے گا؟ کرپشن کا بازار لگا ہوا ہے۔ نئے سال سے کرپٹ خاندانوں کی سیاست ختم ہونے جارہی ہے۔

شیخ رشید کا مزید کہنا تھا کہ بچپن سے چین جا رہا ہوں سینئر سیاستدان ہوں، عمران خان کے دورے کے بعد چین میں تاثر تبدیل ہوگیا ہے۔ ’تحریک انصاف 100 دن میں 20 فیصد بھی ڈیلیور کرتی ہے تو بڑی بات ہے‘۔