Tag: ریلوے

ملتان: محکمہ ریلوے ملتان ڈویژن نے کرونا وائرس کے پھیلاؤ کو روکنے کے سلسلے میں سستا ترین ڈی انفیکشن گیٹ تیار کر لیا۔

اے آر وائی نیوز کے مطابق محکمہ ریلوے ملتان ڈویژن نے اپنی مدد آپ کے تحت سستا ڈی انفیکشن گیٹ تیار کر لیا ہے، ڈی ایس ملتان شعیب عادل کا کہنا تھا کہ کرونا وائرس کے خدشے کے پیش نظر ملتان ڈی ایس آفس اور بڑے اسٹیشنز پر ڈی انفیکشن گیٹ لگائے جائیں گے۔

اس سلسلے میں ٹرین آپریشن شروع ہونے سے پہلے ڈی ایس ملتان ڈویژن کے اسٹاف نے اپنی مدد آپ کے تحت ڈی انفیکشن گیٹ کا ماڈل تیار کر لیا، ریلوے اسٹاف نے یہ گیٹ محض 2 دن میں تیار کیا ہے۔ خیال رہے کہ وفاقی وزیر ریلوے شیخ رشید نے اسٹیشنز پر حفاظتی اقدامات کی ہدایت کی تھی، جس کے بعد سب سے پہلے ملتان ڈویژن نے کم خرچ پر ڈی انفیکشن گیٹ بنا لیا، اس طرح کے 8 ڈی انفیکشن گیٹ بنائے جائیں گے۔

ریلوے کا ایک ہفتے میں 1ارب کا نقصان ہو رہا ہے،شیخ رشید

بتایا گیا کہ ڈی انفیکشن گیٹ ڈی ایس آفس، ملتان اسٹیشن، خانیوال، ساہیوال، بہاولپور میں ٹرین سروس شروع ہوتے ہی لگا دیے جائیں گے، دوسرے مرحلے میں لوکوشیڈ، واشنگ لائن، رننگ روم میں بھی ڈی انفیکشن گیٹ لگائے جائیں گے، ملتان ریلوے اسٹیشن سمیت ڈویژن بھر کے ریلوے اسٹیشنز پر جراثیم کش اسپرے اور صفائی کا عمل بھی جاری ہے، ملتان کینٹ اسٹیشن پر 2 اے سی کوچز پر مشتمل عارضی کرونا کیئر اسپتال بھی قائم کیا جا چکا ہے، ریلوے ملتان ڈویژن سے گزرنے والی فریٹ ریل گاڑیوں کے ملازمین کی اسکریننگ بھی کی جا رہی ہے-

وفاقی وزیر ریلوے شیخ رشید کی جانب سے ہدایت کی گئی ہے کہ 14 اپریل کے بعد ممکنہ ٹرین آپریشن کی بحالی کی صورت میں ریلوے اسٹیشنز پر ہر ممکن حفاظتی اقدامات کیے جائیں۔

لاہور: پاکستان ریلویز نے ٹرین آپریشن محدود کرنے کا فیصلہ کر لیا ہے، محکمے کے ترجمان نے کہا ہے کہ  ٹرین آپریشن محدود کرنے پر عمل درآمد 25 مارچ سے شروع ہوگا۔

اے آر وائی نیوز کے مطابق وزیر ریلوے شیخ رشید کی زیر صدارت اعلیٰ سطح اجلاس میں ٹرین آپریشن محدود کرنے کا فیصلہ کر لیا گیا ہے، پہلے مرحلے میں 10 مسافر ٹرینوں کو بند کیا جائے گا، صورت حال کو مد نظر رکھتے ہوئے مزید ٹرینوں کی بندش کا فیصلہ ہوگا۔

ریلوے ترجمان کے مطابق پاکستان میں اس وقت 134 مسافر ٹرینیں چل رہی ہیں۔ محکمے کی جانب سے کراچی سے چلنے والی 8 ٹرینیں بھی منسوخ کرنے کا فیصلہ کیا گیا ہے، وزیر ریلوے شیخ رشید کا کہنا تھا کہ مکمل ٹرین آپریشن بند کرنا میرے اختیار میں نہیں ہے، اس حوالے سے وزیر اعظم فیصلہ کریں گے۔

کرونا وائرس، شیخ رشید کی صوبائی حکومتوں کو بڑی پیشکش

شیخ رشید کا کہنا تھا کہ کم مسافروں والی مختلف ٹرینوں کو آپس میں یک جا کیا جاسکتا ہے، ریلوے محکمہ مسافروں اور عملے کی حفاظت کے ہر ممکن اقدامات کر رہا ہے۔

ذرایع کا کہنا تھا کہ ٹرینیں بند کرنے کا فیصلہ سندھ حکومت کی درخواست پر کیا گیا ہے، جو ٹرینیں معطل کی جا رہی ہیں ان مسافروں کے لیے متبادل انتظامات کیے جائیں گے، پاکستان ریلوے کے پاس اتنے پیسے نہیں کہ کرایہ واپس کر دیا جائے۔

خیال رہے کہ گزشتہ روز ریلوے انتظامیہ کراچی کی ایک اور غفلت سامنے آئی تھی، ریلوے کا عملہ ماسک اور ہینڈ سینیٹائزر کے بغیر کام کرنے پر مجبور ہے، غیر متعلقہ افراد کی بغیر چیکنگ آمد و رفت بھی عملے اور مسافروں کے لیے خطرہ بن گئی ہے، ریلوے اسٹیشنز پر مسافروں کے تحفظ کے لیے خاطر خواہ انتظامات نہیں کیے گئے۔ ذرایع کا کہنا تھا کہ ریلوے انتظامیہ نے کلرک، واشنگ لائن کے کسی اہل کار کو سہولت نہیں دی، کلرکس، ٹکٹ چیکر بغیر ماسک اور سینیٹائزر کے کام کر رہے ہیں۔