Tag: ریلی نکالنے کا اعلان

کراچی : ایم کیوایم کے قائد الطاف حسین نے شہدائے پشاور سے اظہارِ یکجہتی کے لیے آج کراچی میں ریلی نکالنے کا اعلان کیا ہے، ان کا کہنا تھا کہ آج وہ داعش دہشتگردوں کے چہروں سے نقاب اٹھائیں گے اور ایسے حقائق بیان کریں گے، جو قوم کے سامنے کبھی نہیں لائے گئے، چاہے اس کے بعد خطاب پرپابندی لگ جائے۔

ایم کیو ایم آج پاک فوج سے اظہارِ یکجہتی اور سانحہ پشاور کے شہداء کو خراج عقیدت پیش کرنے کے لیے قومی یکجہتی ریلی نکالے گی۔

ایم کیو ایم رابطہ کمیٹی نے ایک بار پھر سانحۂ پشاور کی شدید مذمت کرتے ہوئے کہا کہ الطاف حسین نے روز اول سے شہروں میں بڑھتی طالبانائزیشن کے خلاف آواز بلند کی لیکن ایم کیو ایم کا مذاق اڑایا گیا۔

رابطہ کمیٹی کا کہنا تھا کہ دہشت گردوں کے خلاف پاک فوج اور سانحہ پشاور کے لواحقین سے اظہار یکجہتی کے لیے ایم کیو ایم آج قومی یکجہتی ریلی کا انعقاد بعد نماز جعمہ دوپہر دو بجے نمائش چورنگی سے تبت سینٹر تک کرے گی، جس سے ایم کیو ایم کے قائد اہم خطاب کریں گے۔

متحدہ رہنماؤں کا کہنا تھا کہ وقت آگیا ہے کہ طالبان کو اپنا بچہ کہنے والوں کا محاسبہ کیا جائے، ایم کیو ایم نے تمام سیاسی جماعتوں ، وکلاء ،تاجر برادری، سول سوسائٹی اور مختلف شعبہ ہائے زندگی سے تعلق رکھنے واے افراد سے اپیل کی ہے کہ وہ پھر پور طریقے سے ریلی میں شرکت کریں۔

ایم کیوایم رابطہ کمیٹی کا کہنا تھا کہ قومی یکجہتی ریلی ملک میں امن و امان اور دہشت گردوں کے خلاف اہم سنگ میل ثابت ہوگی۔

سانحہ پشاور کے شہداء سے اظہارِ یکجہتی کیلئے کراچی میں ایم کیو ایم کی قومی یکجہتی ریلی میں شمعیں روشن کی جائیں گی اورغائبانہ نماز جنازہ بھی ادا کی جائے گی، ریلی کے اختتام پر شہداء کو خراج عقیدت پیش کرنے کیلئے قائداعظم کے مزار سے متصل روڈ پر شمعیں روشن کی جائیں گی اور غائبانہ نماز جنازہ ادا کی جائے گی۔

ایم کیو ایم کے جاری روٹ پلان کے مطابق لانڈھی ، کورنگی ،ملیر ، شاہ فیصل ،ڈیفنس ، محمود آباد ، رنچھوڑ لائن گلشن ، گلستان جوہر، گلشن معمار اور پیر الہٰی بخش کالونی سے آنے والے افراد کے لیے باغ جناح میں پارکنگ کا انتظام کیا گیا ہے، سرجانی ٹاؤن ، نیو کراچی ، نارتھ کراچی ، نارتھ ناظم آباد ، ناظم آباد سے آنیوالوں کیلئے پاکنگ کا انتظام کراچی ایکسرے کے سامنے کیا گیا ہے۔