کراچی : شہریوں کو اے ٹی ایم فراڈ کے ذریعے چونا لگانے والے پانچ چینی باشندوں کو عدالت میں پیش کردیا گیا، عدالت نے تین دن کا ریمانڈ دے کرآئندہ سماعت پر مترجم ساتھ لانے کی ہدایت کردی۔
تفصیلات کے مطابق اے ٹی ایم اسکیمنگ کے ذریعے شہریوں کے بینک اکاؤنٹ خالی کرنے والے پانچ چینی باشندوں کو آج سٹی کورٹ کراچی میں پیش کیا گیا۔
سماعت کے موقع پر جج نے ملزمان سے استفسار کیا کہ کیا آپ پر تشدد ہوا ہے؟ جس پر ملزمان نے اشارے سے بتایا کہ ان کی آنکھوں پر پٹی باندھ کر تشدد کیا گیا ہے۔
عدالت میں تفتیشی افسر نے دعویٰ کیا مذکورہ ملزم نے خود دیوار پر ٹکر ماری، تفتیشی افسر کا کہنا تھا کہ ملزمان سے مزید اے ٹی ایم کارڈ اور خفیہ کیمرے برآمد کرنے ہیں لہٰذا ان کا ریمانڈ دیا جائے، عدالت نے مزید تین دن کاریمانڈ دیتے ہوئے آئندہ سماعت پر مترجم کو لازمی ساتھ لانے کی ہدایت کی۔
مزید پڑھیں: اے ٹی ایم سے رقم چوری کرنے والے دو چینی باشندے گرفتار
یاد رہے کہ صدر کراچی کے علاقے عبداللہ ہارون روڈ زینب مارکیٹ کے سامنے نجی بینک میں قائم اے ٹی ایم میں اسکمنگ مشین لگانے والے دو چینی باشندوں کو تھانہ آرٹلری میدان پولیس نے رنگے ہاتھوں گرفتار کیا تھا۔
مزید پڑھیں: اے ٹی ایم ڈیٹا چوری کرنیوالا چینی باشندہ رنگے ہاتھوں گرفتار
بعد ازاں کراچی پولیس نے شبیر آباد میں کارروائی کرتے ہوئے شارع فیصل پر واقع نجی بینک کے قریب سے چینی باشندے کو گرفتار کیا جو اے ٹی ایم اسکیمنگ ڈیوائس کے ذریعے صارفین کا ڈیٹا حاصل کر کے رقم نکال لیا کرتا تھا۔
