بالی ووڈ کے معروف اداکار و سپر اسٹار سلمان خان نے ایکشن ڈرامے فلم ’ شعلے ‘ کا ریمیک بنانے کی خواہش کا اظہار کیا ہے۔
حال ہی میں بالی ووڈ کے معروف فلم نگار’سلیم جاوید‘ کی زندگی پر بننے والی دستاویزی سیریز ’اینگری ینگ مین ‘ ریلیز ہوئی ہے اسی سلسلے میں پرائم ویڈیو کے یوٹیوب چینل پر فرح خان کے ساتھ ایک انٹرویو میں سلمان خان، زویا، نمرتا، جاوید اختر، سلیم خان اور فرحان اختر نے شرکت کی۔
View this post on Instagram
دورانِ انٹرویو فرح خان نے سلمان خان سے سوال کیا کہ آپ ’سلیم جاوید ‘کی تحریر کردہ کونسی فلم کا ریمیک بنانا چاہتے ہیں؟ جس پر سلمان خان نے کہا کہ اگر مجھے ان کی کسی بھی فلم کا ریمیک بنانے کا موقع ملا تو میں فلم شعلے کا ریمیک بنانا چاہوں گا۔
جس پر فرح خان نے پوچھا کہ وہ جے یا ویرو میں سے کس کا کردار ادا کرنا چاہیں گے جس پر اداکار سلمان خان نے کہا کہ میں اس فلم میں جے، ویرو گبر تینوں کا کردار اداکرسکتا ہوں۔
واضح رہے کہ یہ فلم جاوید اختر اور سلیم خان کی جوڑی کا شاہکار ہے جو بھارتی فلم نگری میں سلیم-جاوید کے نام سے مشہور تھی۔
اس جوڑی نے کئی نامور فلمیں لکھیں جن میں ’زنجیر‘، ’دیوار‘، جیسی متعدد بلاک بسٹر فلمیں شامل ہیں لیکن فلم ’شعلے‘ ان کی سب سے کامیاب فلم ثابت ہوئی، اس فلم میں امجد خان، سنجیو کمار، ہیما مالنی اور جیا بچن نے بھی اہم کردار ادا کیے تھے۔
